16
Paulo iha Likaonia
1 Paulo
to’o Derbe no Listra iha nebe iha eskolante ida naran Timoteo, feto Judeu ida
nebe fiar nia oan, maibe nia aman mak ema gregu. 2 Maun
alin sira iha Listra ho Ikonio koalia di-diak kona ba nia, 3
no Paulo hakarak katak Timoteo la’o hamutuk ho nia. Tan ema Judeu sira
iha rai neba, Paulo haruka nia atu simu sirkunsisaun, basa sira hotu hatene
katak nia aman ema gregu ida. 4 Iha sidade sira
nebe sira liu ba, sira hateten ba sarani sira atu halo tuir buat nebe apostolu
sira hamutuk katuas sira koalia ona iha Jerusalem. 5 Loron
loron kreda sira sai metin liu tan iha fiar no fiarna’in sira sai barak liu
tan.
Iha Asia tomak
6
Sira la’o liu housi rai Frigia no Galasia, basa Espiritu Santu la husik
sira haklaken lia menon iha Asia tomak. 7 Wainhira
sira to’o rai Misia nia oin, sira haka’as an atu liu ba Bitinia, maibe Jesus
nia Espiritu la husik sira, 8 ne’e duni, sira fila
fali liu housi Misia hodi tun ba Troade. 9 Iha
kalan Paulo hare iha mehi katak ema Masedonia ida hamriik iha nia oin hodi husu
nune’e ba nia: “Mai to’o Masedonia atu tulun ami.” 10 Hare
tiha mehi ne’e, ami ba kedas Masedonia, hodi hanoin katak Maromak bolu ami atu
ba haklaken Nia liafuan ba sira iha rai neba.
Liu ba Eropa
11 Ami
sa’e ro housi Troade, hodi la’o los ba Samotrasia, no loron tuir mai ba
Neapolis, 12 no housi neba ba Filipe, sidade boot
ida iha Masedonia no fatin nebe Romanu sira ukun. Ami hela kleur iha sidade
ne’e. 13 Iha loron Sabadu, ami sai ba sidade liu
besik mota iha nebe ami hanoin katak iha uma orasaun ruma. Ami tur hodi koalia
ho feto sira nebe halibur an iha neba. 14 Sira ne’e
ida, naran Lidia, nebe faan hena mean, housi sidade Tiatira, ema nebe hamtauk
Maromak, rona, no Maromak loke nia fuan atu se tilun ba buat nebe Paulo
hateten. 15 Wainhira nia ho nia uma-kain tomak simu
baptismu, nia fo konvida ida hodi dehan, “Imi hare karik ha’u nudar fiarna’in
ida iha Na’i, mai no hela iha ha’u nia uma,” no nia haka’as ami duni.
Dadur iha Filipe
16 Wainhira
ami la’o dau-daun ba uma orasaun, ami la’o hasouru atan feto ida nebe iha
espiritu atu fo hatene buat sira nebe seidauk mosu; nia lori osan barak ba nia
na’i tan nia hatene si’ik. 17 Nia hahu la’o tuir
Paulo no ha’u hodi hakilar, “Sira ne’e Maromak aas ba nia atan sira, nebe
haklaken ba imi dalan ba maksoin.” 18 Nia halo
nune’e ba loron barak hodi halo Paulo hirus, no nia dehan ba espiritu ne’e,
“ha’u haruka o iha Jesus Kristu nia naran atu sai housi nia.” Espiritu ne’e sai
kedas housi nia.
19 Wainhira
nia na’i hare katak sira nia esperansa atu hetan osan la iha ona, sira kaer
Paulo no Silas hodi dada sira ba fatin luan iha sidade iha na’i ulun sira nia
oin. 20 Sira lori sira ba juis hodi dehan, “Sira
ne’e ema Judeu nebe book ita nia sidade 21 no
hamanas povu atu tuir lisan nebe bandu ba ami ema Roma atu hala’o ka tuir.” 22
Ema lubun boot mos hateten aat sira, no juis sira haruka ema kolo sira
nia hatais no baku sira ho fafulu boot. 23 Baku
tiha dala barak, sira hatama sira iha dadur laran no hateten ba guarda sira atu
hein sira di-diak. 24 Simu tiha lia menon ne’e, nia
tau sira iha fatin laran liu no kesi sira nia ain ba ai ida nebe metin iha rai.
Paulo sai housi dadur laran
25 Besik
kalan fahe rua, wainhira Paulo ho Silas halo dau-daun orasaun hodi hananu
knananuk ba Na’i no ema dadur na’in sira rona sira, 26 teki-teki, rai nakdoko maka’as
tebes, halo dadur nia hun sira doko maka’as, odamatan sira nakloke, no korente
sira monu nakloke. 27 Wainhira dadur nia na’i ulun
hader no hare odamatan sira nakloke, nia losu nia surik atu oho an hodi hanoin
katak ema dadur sira halai lakon ona. 28 Maibe
Paulo hakilar ho lia maka’as: “Keta halo aat ba o nia an, basa ami iha ne’e
hotu.” 29 Nia husu ahi-oan ida no halai tama ba
laran no ho isin nakdedar ho tauk, nia monu ain ba Paulo no Silas. 30
Tuir mai, nia lori sira ba liur hodi husu ba sira, “Na’i, ha’u sei halo
sa los atu soi ha’u an?” 31 Sira hatan ba nia,
“Fiar iha Na’i Jesus, no o ho o nia uma-kain tomak sei hetan maksoin.” 32
Nune’e sira haklaken Na’i nia futar lia ba nia no mos ba nia emar sira
hotu nebe iha nia uma laran. 33 Nia simu sira iha
kalan ne’e kedas, fase apostolu sira nia kanek, hafoin, nia ho nia emar sira
hotu simu kedas baptismu. 34 Nia lori sira ba nia
uma hodi fo han sira; nia ho nia familia tomak haksolok tan simu fiar iha
Maromak.
35 Maibe
to’o tiha loron, juis sira haruka manu ain sira ho liafuan ne’e, “Husik ema
sira ne’e sai tiha.” 36 Dadur nia na’i ulun fo
hatene ne’e ba Paulo, “Juis sira haruka lia menon mai katak ami sei husik imi
ba.” Ne’e duni, sai mai no la’o ba iha dame laran. 37 Maibe
Paulo hatan, “Sira baku ami iha ema hotu nia oin, maski ami ema Roma nian no
ema la tesi lia mai ami, no hatama ami iha dadur laran. No oras ne’e, sira sei
husik ami ba sub-subar deit? La bele. Halo sira mai no lori ami sai ba liur.” 38
Manu ain sira hato’o liafuan sira ne’e ba juis sira no sira ne’e tauk
teb-tebes wainhira sira rona katak sira ne’e ema Roma nian. 39
Tan ne’e sira tun mai no hamaus sira, no lori sira ba liur hodi husu
katak sira husik ona sidade ne’e. 40 Sai tiha housi
dadur laran, sira la’o ba Lidia nia uma iha nebe sira hare no hamanas maun alin
sira, hafoin sira la’o ba.
|