2

Ema matenek sira

   ¹ Iha tempu liurai Herodes nian, wainhira Jesus moris iha Belem iha rai Judeia, ema matenek balun housi lorosa'e to'o ba Jerusalem. ² Sira husu; “Judeu sira nia liurai nebe foin moris iha los nebe? Ami hare nia fitun iha lorosa’e no ami mai tuku tur hanai ba Nia.” ³ Rona tiha ne'e, liurai Herodes hamutuk ho sidade tomak hakfodak teb-tebes. ⁴ Nia halibur am'lulik ulun sira no eskriba sira povu nian hodi husu ba sira Messias sei moris los iha nebe. ⁵ Sira hatan ba nia: “Iha Belem, iha rai Judeia, basa profeta hakerek nanis ona: ⁶ ’Belem, rai Juda, iha sidade boot sira Juda nian, la'os  o mak kiik liu; basa housi o mak sei mosu Na’i Ulun ida nebe sei ukun Ha'u nia povu Israel.’”

                ⁷ Tuir mai Herodes haruka bolu sub-subar deit ema matenek sira; nia husu ba sira sa loron fitun ne'e mosu ba sira. ⁸ Hafoin nia haruka sira ba Belem, dehan: “Imi ba to'ok. Imi sei husu tuir di-diak kona ba kiik oan ne'e. Hafoin, hetan tiha nia, imi mai fo hatene ha'u atu ha'u mos bele ba tuku tur hanai ba Nia.”  ⁹ Rona tiha liurai, sira la'o ona. Fitun nebe sira hare iha lorosa’e la'o uluk sira oin, to'o fatin nebe kiik oan hela ba. ¹⁰ Hare tiha fitun, sira laran haksolok teb-tebes. ¹¹ Tama tiha uma laran, sira hare kiik oan ho Nia Inan Maria. Sira tuku tur ba rai hodi adora Nia. Loke tiha sira nia ai-balun, sira hasa’e ba Nia sira nia buat ksolok; osan mean, ai-ben morin no mina morin. ¹² Hatene housi mehi katak sira la bele fila hikas ba Herodes, sira fila ba sira rai housi dalan seluk.

Halai ba Egiptu

 ¹³ Sira ba tiha, Na’i nia anju ida mosu ba Jose iha mehi hodi dehan: “Hamriik ba, lori kiik oan ho nia inan, halai ba Egiptu hodi hela iha neba to’o ha’u fo hatene ba o, basa Herodes sei buka Kiik oan ne'e atu oho.” ¹⁴ Nia hader iha kalan, lori Kiik oan ho nia inan halai ba Egiptu, ¹⁵ hodi hela iha neba to'o Herodes mate. Nune'e sei sai tuir duni buat nebe Na’i fo sai housi profeta: “Ha'u bolu Ha'u nia Oan housi Egiptu.”

¹⁶ Wainhira Herodes hare katak ema matenek sira lohi tiha nia, nia laran nakali teb-tebes; nia haruka oho labarik sira housi sidade no housi reinu tomak iha Belem, kiik oan sira tinan rua ba kraik, tuir tempu nebe nia husu di-diak housi ema matenek sira. ¹⁷ Nune'e sai tuir duni buat nebe profeta: Jeremias uluk dehan: ^18“ Sira rona lia ida iha Rama housi ema nebe halerik no tanis maka'as: lia Raquel nian nebe tanis nia oan sira; nia lakohi katak ema hamaus nia, basa sira la iha ona.”

Fila housi Egiptu

¹⁹ Herodes mate tiha, Na’i nia  anju ida mosu ba Jose iha Egiptu iha mehi hodi dehan: “Hader tiha, lori fali Kiik oan ho nia inan ba rai Israel, basa sira nebe hakarak oho Kiik oan ne’e mate tiha ona.” ²¹ Jose hader mai, lori Kiik oan ho nia inan fila fali ba rai Israel. ²² Maibe, rona katak Arquelau mak ukun iha Judeia hodi nia aman nia fatin, Jose tauk atu ba neba. Nudar mehi hatudu, nia ba rai Galileia, ²³ hodi hela iha sidade ida naran Nazare; nune’e sai tuir duni buat nebe profeta sira dehan; “Ema sei hanaran Nia Nazare Oan.”