18

Paulo iha Korinto

                ¹ Ne’e hotu tiha, Paulo husik Atenas hodi la’o liu ba Korinto. ² Iha neba nia hetan ema Judeu ida naran Aquila, housi rai Ponto nebe foin to’o housi Italia, ho nia feen Priscila, basa emboot Claudio haruka ema Judeu hotu atu sai housi Roma. Paulo ba hare sira, ³ no tan sira na’in rua nia serbisu hanesan, nia hela iha nia uma hodi halo serbisu; basa sira halo tenda.  ⁴ Sabadu Sabadu,  Paulo haksesuk ho ema iha sinagoga, hodi buka lori ema Judeu ho ema gregu sira ba fiar.

                ⁵ Wainhira Silas ho Timoteo tun mai ona housi Masedonia, Paulo saran an tomak atu haklaken liafuan, hodi fo sasin  ba ema Judeu sira katak Jesus mak Messias. ⁶ Wainhira sira ba hasouru nia no hasara nia, Paulo liki rai rahun housi nia hatais hodi dehan ba sira: “Imi nia ran sei nakfakar iha imi nia ulun leten; ba ne’e ha’u la iha sala ida. Houri ohin ba oin, ha’u sei buka deit ema gentiu sira.” ⁷ Ne’e duni, nia sai housi neba no la’o ba ema ida naran Ticio Justo nia uma; nia ne’e hamtauk Maromak no nia uma besik sinagoga. ⁸ Crispo, sinagoga ne’e nia na’i ulun, fiar Na’i ho nia familia tomak, no mos ema Korinto barak nebe rona, fiar no simu baptismu. ⁹ Kalan ida iha mehi,  Na’i dehan ba Paulo: “O keta tauk. Koalia nafatin ba no keta nonok, ¹⁰ basa Ha’u hela ho o. La iha ema nebe sei foti liman hasouru o hodi halo aat ba o, tan Ha’u iha emar barak iha sidade ne’e.” ¹¹ Paulo horik tinan ida ho fulan neen iha neba hodi hanorin Maromak futar lia iha sira leet.

Lia todan iha Galiao nia oin

                ¹² Wainhira Galiao ukun Asia nudar prokonsul, ema Judeu sira futu lia hasouru Paulo hodi lori nia ba tribunal ¹³ dehan, “Ema ne’e lori povu atu adora Maromak hasouru ukunfuan.” ¹⁴ Wainhira Paulo atu koalia Galiao hateten ba ema Judeu sira: “Nia halo karik hahalok aat ruma eh lohi ema hodi hakarak aat, ha’u iha obrigasaun atu rona imi ema Judeu sira hodi tesi lia, ¹⁵ maibe tan liafuan kona ba hanorin no naran no imi nia ukunfuan rasik, imi rasik hare ba! Ha’u lakohi sai juis kona ba buat hirak ne’e.” ¹⁶ Nia haruka sira sai housi nia tribunal. ¹⁷ Sira hotu kaer Sostenes, sinagoga nia ulun, no baku nia iha tribunal nia oin. Maibe Galiao lakohi hatene buat ne’e.

Paulo ba Antiokia Siria nian

                ¹⁸ Ne’e hotu tiha Paulo hela tempu ruma iha ne’e, hafoin nia fo adeus ba maun alin sira, no nia sa’e ro ba Siria, hamutuk ho Priscila no Aquila. Iha Senkreas nia haruka tesi nia fuuk tan nia halo promessa ida. ¹⁹ To’o tiha Efeso, nia husik sira iha neba, maibe nia tama iha sinagoga hodi haksesuk malu ho ema Judeu sira. ²⁰ Maski sira husu nia atu hela kleur liu tan, nia lakohi, ²¹ maibe, wainhira nia fo adeus ba sira, nia hakotu lia, “Maromak hakarak karik, ha’u sei fila fali ba imi.” Tuir mai, nia sa’e ro housi Efeso. ²² Tun tiha housi ro iha Sesareia, nia ba kumprimenta kreda iha neba, hafoin nia la’o ba liu Antiokia. ²³ Nia hela iha neba tempu ruma, hafoin nia la’o ba la’o mai tu-tuir malu iha rai sira Galasia no Frigia nian, hodi hametin eskolante sira hotu.

Apolo

                ²⁴ Iha ema Judeu ida naran Apolo housi Alexandria nebe koalia diak los; nia mai to’o Efeso. Nia hatene lo-los eskritura sira. ²⁵ Nia hatene barak kona ba Na’i nia Dalan no ho laran manas nia koalia no hanorin mo-mos kona ba Jesus, maski nia hatene deit Joao nia baptismu. ²⁶ Nia hahu koalia ho aten berani iha sinagoga, maibe wainhira Priscila no Aquila rona nia, sira haketak nia no fo hatene di-diak ba nia Dalan lo-los. ²⁷ Wainhira nia hakarak hakur ba Akaia, maun alin sira hamanas  nia laran no hakerek ba eskolante sira iha neba atu simu nia. To’o tiha neba, nia fo tulun maka’as ba sira nebe fiar tamba grasa. ²⁸ Nia koalia maka’as hasouru ema Judeu sira nia hanorin iha ema hotu nia oin, hodi hatudu housi Eskritura katak Messias mak Jesus.