19

Paulo iha Efeso

                ¹ Wainhira Apolo iha Korinto, Paulo liu housi foho ba to’o Efeso, iha nebe nia hetan eskolante balun. ² Nia  dehan ba sira: “Imi simu ona Espiritu Santu wainhira imi sai fiarna’in?” Sira hatan, “Ami seidauk rona katak iha Espiritu Santu ida!” ³ Paulo husu: “Imi simu baptismu oin sa?” Sira hatan: “Ho Joao nia baptismu.” ⁴ Paulo dehan teni ba sira: “Joao fo baptismu hakribi sala nian hodi hateten ba povu atu fiar iha Ida nebe sei mai, katak, Jesus.” ⁵ Rona tiha lia hirak ne’e, sira simu fali baptismu hodi Na’i Jesus nia naran. ⁶ Wainhira Paulo tula liman ba sira, Espiritu Santu tun ba sira; sira hahu koalia lia oi-oin no hato’o Maromak nia liafuan. Sira ne’e hamutuk ema na’in sanulu resin rua.

                ⁸ Nia tama ba sinagoga no ba fulan tolu nia haksesuk malu ho aten berani  ho liafuan maka’as kona ba Maromak nia reinu. ⁹ Maibe wainhira ema balun, tan sira ulun tos no fiar laek, hasara Dalan iha ema hotu nia oin, nia dada an housi sira hamutuk ho eskolante balun no hahu hanorin loron loron iha aula boot ida Tirano nian. ¹⁰ Ne’e la’o ba tinan rua, tan ne’e ema hot-hotu nebe horik iha provinsia Asia nian, ema Judeu no mos ema gregu, rona tiha Na’i nia liafuan. ¹¹ Maromak nia hahalok sira kmanek tebes nebe Maromak halo housi Paulo nia liman, ¹² tan ne’e  wainhira lensu ka hena ruma nebe kona nia kona fali ema moris, sira nia moras lakon kedas.

Ema Judeu nebe duni sai diabu

                ¹³ Tuir mai, ema Judeu balun nebe hanoin katak sira bele duni sai diabu koko atu temi Jesus nia naran iha sira nebe iha diabu, hodi dehan “Ha’u haruka o hodi Jesus nebe Paulo haklaken.” ¹⁴ Wainhira ema Judeu sira nia am’lulik boot naran Esceva nia oan na’in hitu, buka halo nune’e, ¹⁵ espiritu aat hatan, “Jesus ha’u hatene; Paulo mos ha’u hatene, maibe imi se?” ¹⁶ Ema nebe iha espiritu aat haksoit ba sira no hatun sira hotu. Nia manan sira maka’as tebes, nune’e sira halai ho isin tanan no kanek housi uma neba. ¹⁷ Wainhira ema hotu hatene buat ne’e, ema Judeu no gregu sira nebe horik iha Efeso tauk teb-tebes, no hamtauk liu tan Na’i nia naran. ¹⁸ Ema fiarna’in barak la’o ba oin hodi haklaken sira nia hahalok uluk nian. ¹⁹ Mos, ema barak nebe uluk halo hahalok sira ne’e halibur sira nia livru hamutuk no sunu tiha sira iha ema hotu nia oin. Sira sura livru sira ne’e nia folin no hetan nia besik osan mutin rihun lima nulu. ²⁰ Nune’e mak Na’i nia liafuan belar ba nafatin hodi hamoris ema no kbiit.

Paulo nia planu

                ²¹ Ne’e hotu tiha, Paul hanoin atu la’o liu housi Masedonia no Acaia, hafoin ba oin ba Jerusalem, hodi dehan, “Wainhira ha’u to’o ona neba, ha’u ten ke hare mos Roma.” ²² Tuir mai, nia haruka maluk na’in rua, Timoteo no Erasto, ba Masedonia; nia fali hela kleur iha provinsia Asia nian.

Badaen osan mutin nian

                ²³ Iha tempu neba, susar boot mosu kona ba Dalan. ²⁴ Iha badaen osan mutin nian ida naran Demetrio nebe halo estatua kiik Artemis nian no serbisu ne’e lori osan barak ba badaen osan mutin nian sira. ²⁵ Demetrio halibur hamutuk badaen sira ne’e no mos badaen sira seluk hodi dehan, “Maluk sira, imi hatene lo-los katak ita nia moris diak hela iha ita nia serbisu ne’e. ²⁶ Nudar imi hare no rona, la’os deit iha Efeso maibe iha provinsia Asia tomak, Paulo ne’e hateten no  lori ema barak hodi dehan katak lulik sira nebe liman mak halo la’os Maromak lo-los. ²⁷ Perigu ne’e sai boot ba dau-daun, la’os deit katak ema la hare diak ona ita nia serbisu maibe mos katak maromak boot Artemis sei lakon ona nia kmanek.”

                ²⁸ Rona tiha lia hirak ne’e, sira laran nakali no hahu hakilar, “Artemis ema Efeso nian boot tebes!” ²⁹ Sidade la hakmatek liu, no ema hotu ho laran ida deit halai ba teatru fatin, hodi kaer Gaio no Aristarco, nebe mai housi Masedonia no la’o hamutuk ho Paulo. ³⁰ Paulo hakarak ba hasouru ema lubun ne’e, maibe eskolante sira la husik nia, ³¹ no na’i ulun sira housi Asia nebe habelun Paulo hameno lia katak nia la bele ba besik teatru ne’e. ³² Ema lubun ne’e, balun hakilar buat ida, seluk buat seluk tan; sira la tuir malu liu, no ema barak la hatene tan sa sira iha neba. ³³ Ema Judeu balun dudu Alexandre ba oin, hodi dehan ba nia atu halo buat ruma, no Alexandre foti nia liman atu hatudu katak nia iha buat ruma atu hato’o ba sira hotu. ³⁴ Maibe wainhira sira hare katak nia ema Judeu ida, sira hakilar hamutuk ba oras rua, “Artemis Efeso nian boot tebes!” ³⁵ Ikus mai, sidade nia na’i ulun ida halo ema lubun ne’e hakmatek hodi dehan, “Imi ema Efeso sira, se mak la hatene katak sidade Efeso nian mak tau matan ba Artemis boot nia templu no fatuk santu nebe tun housi lalehan mai? ³⁶ Tamba ema la bele nega buat hirak ne’e, imi ten ke hakmatek no keta halo buat ida nar-naran deit. ³⁷ Ema sira nebe imi lori mai la na’ok buat ida housi templu ka hateten aat ita nia lulik. ³⁸ Demetrio no nia maluk sira iha buat ruma karik hasouru ema ruma, tribunal loke dau-daun, no prokonsul sira iha. Halo sira lori sira nia liafuan hasouru malu. ³⁹ Imi iha buat ida tan atu buka hatene, ita resolve buat ne’e iha nia fatin lo-los, ⁴⁰ basa, ho buat nebe mosu ohin, ita mos iha perigu katak na’i ulun sira bele tau lia hasouru ita tan ita nia hahalok loron ne’e nian. Ita la bele defende ita an kona ba ida ne’e.” Ho liafuan sira ne’e, nia haruka sira ba uma.