24

Paulo iha Felix nia tribunal

                ¹ Liu tiha loron lima am’lulik boot Ananias tun hamutuk ho katuas balun ho lia na’in ida naran Tertulio; no sira foti lia hasouru Paulo ba gubernador. ² Wainhira sira bolu nia, Tertulio hahu koalia nune’e dehan, “Tan ami hetan hakmatek barak tamba ita, no ita halo buat foun barak iha nasaun ida ne’e ho ita nia hahalok, ³ ami simu  ita iha buat hotu no iha fatin hotu, O Felix kmanek liu, hodi agradese teb-tebes. ⁴ Maibe atu ami la bele halo ita lakon tempu, ha’u husu ita atu fo tempu uitoan atu rona ami ho laran luak nudar ita halo bai-bain. ⁵ Ami hetan ema ne’e nudar moras aat ida; nia halo rungu-ranga iha ema Judeu sira leet iha mundu tomak no nia mak religiaun Nazareno nia ulun ida. ⁶ Nia buka halo foer ami nia templu, maibe ami kaer nia. ⁷ (Maibe kapitaun Lisias mai no hadau nia ho kbiit maka’as housi ami, hodi haruka sira nebe iha liafuan hasouru nia atu koalia ho ita) ⁸ Ita rasik husu nia di-diak karik, ita sei hatene housi nia kona ba buat hotu nebe ami foti lia hasouru nia.” ⁹ Ema Judeu sira mos koalia hodi hametin katak buat sira ne’e los duni.

                ¹⁰ Gubernador fo sinal ba Paulo atu koalia no nia hatan, “Ha’u hatene katak ita boot juis ba nasaun ida ne’e ba tinan barak, tan ne’e ha’u haksolok atu defende ha’u an iha ita nia oin. ¹¹ Nudar ita bele hatene lo-los, seidauk loron sanulu resin rua mak ha’u sa’e ba Jerusalem atu harohan. ¹² Iha templu ka iha fatin seluk iha sidade laran sira la hare ha’u haksesuk malu ho ema ruma ka halo rungu-ranga iha povu sira leet. ¹³ Sira la bele hatudu ba ita boot katak lia nebe ohin sira foti hasouru ha’u nune’e duni. ¹⁴ Maibe buat nebe ha’u simu duni iha ita futar oin mak ne’e, katak tuir Dalan, nebe sira hanaran religiaun foun, ha’u adora ami bei-ala sira nia Maromak no ha’u fiar buat hotu nebe tuir ukunfuan no buat nebe hakerek tiha ona iha profeta sira. ¹⁵ Ha’u iha esperansa iha Maromak hanesan sira nian katak ema diak no ema aat sei moris hi’as. ¹⁶ Tan ne’e ha’u buka nafatin atu sai laran mos iha Maromak futar oin no iha ema nia oin. ¹⁷ Liu tiha tinan barak, ha’u mai atu lori esmola ba ha’u nia nasaun no ha’u nia buat karan. ¹⁸ Ha’u halo ne’e dau-daun wainhira sira hetan ha’u hamos ha’u nia laran iha templu; la ema lubun boot ka halo rungu-ranga. ¹⁹ Maibe ema Judeu balun housi provinsia Asia nian, nebe lo-los, ten ke iha ne’e mos iha ita futar oin atu, iha karik buat ruma, foti lia hasouru ha’u. ²⁰ Ka husik ema sira ne’e  rasik foti lia kona ba hahalok aat nebe sira hetan iha ha’u wainhira ha’u hamriik iha Sinedriu. ²¹ Buat ida deit karik nebe ha’u dehan wainhira ha’u hamriik iha sira leet, katak ‘Ha’u iha tribunal ida ne’e iha loron ne’e tamba moris hi’as housi mate.”

                ²² Tuir mai, Felix nebe hatene lo-los kona ba Dalan, haruka sira atu mai fali iha loron seluk, hodi dehan, “Wainhira komandante Lisias tun mai, ha’u sei tesi lia kona ba buat ne’e.” ²³ Nia haruka senturiaun atu tahan Paulo maibe husik nia uitoan no la bele taka dalan ba nia belun sira nebe lori buat nebe nia kuran.

Dadur iha Sesareia

                ²⁴ Liu tiha loron ruma, Felix mosu mai ho nia feen Drusila, ema Judeu ida. Nia haruka bolu Paulo no rona nia koalia kona ba fiar iha Kristu Jesus. ²⁵ Maibe wainhira nia koalia kona ba moris los no ukun an no Na’i nebe sei hiit an mai atu tesi lia, Felix hahu tauk hodi dehan,  “Ohin o bele ba ona; wainhira ha’u hetan fali tempu, ha’u sei haruka bolu o.” ²⁶ Nia hein katak Paulo sei fo osan ba nia, tan ne’e nia haruka bolu nia fila fali no koalia ho nia.

                ²⁷ Tinan rua liu ba, Porcio Festo taka Felix nia fatin. Tan nia hakarak katak ema Judeu sira gosta nia, Felix husik Paulo iha dadur laran.