25

Paulo husu atu lori nia kasu ba Cesar

                ¹ Wainhira Festo to’o provinsia ne’e, liu tiha loron tolu nia la’o housi Sesareia ba Jerusalem. ² Iha neba am’lulik boot no ema Judeu sira nia na’i ulun hato’o ba nia lia nebe sira foti hasouru Paulo. Sira husu nia ³ nudar favor ida atu haruka nia ba Jerusalem, basa sira hanoin atu oho nia tuir dalan. ⁴ Festo hatan katak Paulo hela iha dadur laran iha Sesareia no katak nia rasik sei fila fali lalais neba. ⁵ Nia dehan, “Imi nia na’i ulun sira mai hamutuk ho ha’u, no ema ne’e halo buat ruma nebe la los karik, sira ne’e sei foti lia hasouru nia.”

                ⁶ Festo hela loron neen ka ualu ho sira, hafoin nia fila fali ba Sesareia, no iha loron nebe tuir mai, nia tur iha tribunal no haruka bolu Paulo. ⁷ Wainhira Paulo mosu, ema Judeu sira nebe mai housi Jerusalem hale’u nia no foti lia todan barak hasouru nia, maibe sira la bele hatudu katak nune’e duni. ⁸ Wainhira nia defende an, Paulo dehan, “Ha’u la halo buat aat ida hasouru Judeu sira nia ukunfuan no mos hasouru templu ka hasouru Cesar.” ⁹ Hafoin Festo, hodi hakarak halo ema Judeu sira gosta nia, dehan ba Paulo, “O hakarak ba Jerusalem no defende o nia an iha neba kona ba lia sira ne’e? ¹⁰ Paulo hatan, “Ha’u hamriik iha Cesar nia tribunal; iha ne’e mak sei tesi lia mai ha’u. Ita hatene lo-los katak ha’u la halo buat aat ruma hasouru ema Judeu sira. ¹¹ Ha’u halo aat ka halo buat ruma nebe soi mate, ha’u la buka halai housi kastigu mate nian; maibe lia nebe sira foti hasouru ha’u la los karik, la iha ema ida nebe bele saran ha’u ba sira. Ha’u husu atu ba to’o Cesar.” ¹² Tuir mai, Festo koalia ho nia emar sira no hatan ba Paulo, “O husu atu ba to’o Cesar, no ba Cesar o sei ba.”

Paulo iha liurai Agripa nia oin

                ¹³ Liu tiha loron ruma, liurai Agripa no Berenice to’o Sesareia atu hare Festo. ¹⁴ Tamba sira atu hela iha neba ba loron ruma, Festo haktuir Paulo nia kasu ba liurai dehan, “Iha ema nebe Felix husik iha dadur laran. ¹⁵ Wainhira ha’u iha Jerusalem, am’lulik boot sira no ema Judeu nia katuas sira foti lia hasouru nia no husu atu oho nia. ¹⁶ Ha’u hatan ba sira katak saran ema molok nia bele hare sira nebe foti lia no bele defende nia an hasouru sira nia lia hasouru Romanu sira nia ukunfuan. ¹⁷ Ne’e duni, wainhira sira to’o mai, ha’u la hein kleur; iha loron nebe tuir mai ha’u tur iha tribunal no haruka lori ema ne’e. ¹⁸ Sira nebe foti lia hamriik hale’u nia, maibe la foti lia kona ba hahalok aat ruma nebe ha’u hein. ¹⁹ Sira koalia deit ho nia kona ba sira nia religiaun no kona ba Jesus nebe mate ona maibe Paulo dehan katak moris fali ona. ²⁰ Tamba ha’u la hatene oin sa husu tuir buat ne’e, ha’u husu nia hakarak ba Jerusalem ka lae no hamriik iha tribunal iha neba kona buat hirak ne’e. ²¹ No wainhira Paulo husu katak nia hela iha dadur laran hodi hein liurai boot nia lia, ha’u haruka dadur nia to’o ha’u bele haruka nia ba Cesar.” ²² Agripa dehan ba Festo, “Ha’u mos hakarak hare ema ne’e.” Nia hatan, “Aban o sei rona nia.”

                 ²³ Iha loron nebe tuir mai Agripa no Berenice tun ho kmanek wa’in no tama iha tribunal hamutuk ho komandante bataliaun sira no ema naran boot sira sidade nian, no Festo haruka lori Paulo mai. ²⁴ Festo dehan, “Liurai Agripa no imi hotu nebe iha ne’e hamutuk ho ami, hare ba ema ne’e nebe povu Judeu tomak husu ha’u iha ne’e no iha Jerusalem atu oho. ²⁵ Maibe ha’u hare katak nia la halo buat ida nebe soi mate, ne’e duni, wainhira nia husu atu ba to’o Cesar, ha’u hanoin atu haruka nia ba. ²⁶ Maibe ha’u la iha buat ruma lo-los atu hakerek kona ba nia ba ita nia liurai boot; ne’e duni ha’u lori nia ba imi no liu-liu iha ita oin, liurai Agripa, atu ha’u bele hetan buat ruma atu hakerek wainhira imi husu nia lo-los ona. ²⁷ Basa ha’u hare katak sei la los wainhira ha’u haruka ema dadur ida hodi la hakerek lia nebe ema foti hasouru nia.”