26
Liurai Agripa rona Paulo
1 Agripa
dehan ba Paulo, “Oras ne’e, o bele koalia ona atu defende o nia an.” Nune’e
Paulo lolo nia liman hodi hahu koalia. 2 “Ha’u hare
ha’u sorte teb-tebes, liurai Agripa, katak ohin ha’u atu defende ha’u nia an
iha ita futar oin hasouru lia hirak nebe ema Judeu sira foti hasouru ha’u, 3
liu-liu tamba ita hatene lo-los ema Judeu sira nia lisan tomak no buat
hotu nebe sira sei haksesuk malu. Ne’e duni, ha’u husu ita atu rona ha’u ho
laran diak. 4 Ema Judeu tomak hatene ha’u nia moris
oin sa, hahu wainhira ha’u sei kiik, houri uluk iha ha’u nia povu sira leet no
iha Jerusalem. 5 Sira hatene kona ba ha’u houri
uluk kedas, sira hakarak fo sasin karik, katak ha’u moris nudar fariseu ida,
ema nebe tuir ita nia religiaun maka’as liu hot-hotu. 6 Maibe
ohin ha’u hamriik iha tribunal tan ha’u nia esperansa iha lia nebe Maromak
hakotu ba ita nia bei-ala sira. 7 Ita nia suku
sanulu resin rua hein atu manan
promessa wainhira sira adora Maromak kalan loron ho laran manas, no tan
esperansa ne’e, ou liurai, mak ema
Judeu sira foti lia hasouru ha’u. 8 Tansa imi la
bele fiar katak Maromak halo matebian sira
moris hi’as fali? 9 Uluk ha’u rasik hanoin
katak ha’u ten ke halo buat barak hasouru
Jesus Nazare nia naran, 10 no ha’u halo duni
iha Jerusalem. Ha’u hatama iha dadur laran ema santu barak ho kbiit nebe ha’u simu
housi am’lulik sira, no wainhira sira atu simu kastigu mate nian, ha’u tau ha’u
nia lia hasouru sira. 11 Dala barak, housi sinagoga
ba sinagoga, ha’u fo todan ba sira hodi buka atu halo sira hateten aat Maromak;
ha’u laran nakali teb-tebes hasouru sira tan ne’e ha’u tuir sira to’o sidade
malae sira.”
12 “Hodi
hanoin nune’e, ha’u la’o ba Damasko ho kbiit housi am’lulik boot sira nebe
haruka ha’u. 13 Iha meio-dia tuir dalan, ou liurai,
ha’u hare naroman housi lalehan, nabilan liu loron, hale’u ha’u no maluk sira
nebe la’o hamutuk ha’u. 14 Ami hotu monu ba rai no
ha’u rona lia ida nebe dehan, ‘Saul, Saul, tansa o fo todan mai ha’u? Susar ba
o atu tebe buat nebe kili kuda.’ 15 No ha’u dehan,
‘Ita se, Na’i?’ No Na’i hatan, ‘Ha’u mak Jesus nebe o fo todan. 16
Oras ne’e sa’e ba no hamriik iha o nia ain. Ha’u mosu ba o atu foti o
nudar atan no sasin ida kona ba buat nebe o hare ona no buat nebe o sei hare
tan. 17 Ha’u sei hasai o housi povu ne’e no housi
gentiu sira nebe ha’u sei haruka o, 18 atu loke
sira nia matan; nune’e sira bele fila housi nakukun ba roman no housi Satanas
nia kbiit ba Maromak. Nune’e sira bele
hetan perdua ba sira nia sala no liman rohan iha sira nebe saran tiha ona mai
ha’u iha fiar.’”
19 “Ne’e
duni, liurai Agripa, ha’u la kontra visaun housi lalehan ne’e, 20
maibe, ha’u haklaken uluk ba sira nebe iha Damasko no iha Jerusalem no
iha rai Judeia tomak, hafoin ba gentiu sira, katak ita presisa atu hakribi sala
no fila ba Maromak, hodi halo hahalok nebe hatudu katak ita hakribi duni sala. 21
Tan ne’e mak ema Judeu sira kaer ha’u iha templu laran no buka atu oho
ha’u. 22 Maibe ho ksolok ha’u hetan Maromak nia
tulun to’o ohin, tan ne’e ha’u hamriik iha ne’e hodi fo sasin ba ema boot sira
no ba ema kiik sira, hodi la hateten buat ida nebe oin seluk housi buat nebe
profeta sira no Moises fo hatene tiha ona, 23 katak
Messias ten ke terus no katak nudar Ida nebe atu moris hi’as uluk liu housi
mate sira leet, Nia sei haklaken naroman ba ita nia povu no ba gentiu sira.”
Agripa la hetan buat ruma hasouru Paulo
24 Wainhira
Paulo koalia nune’e hodi defende nia an, Festo dehan ho lia maka’as, “Paulo, o
bulak! Matenek barak liu halo o sai bulak.” 25 Maibe
Paulo hatan, “Ha’u la bulak, ou Festo kmanek liu, ha’u dehan lialos ho neon
mos. 26 Liurai hatene kona ba buat sira ne’e no ba
nia ha’u koalia ho aten berani, basa ha’u la fiar katak nia la hare buat sira
ne’e; buat sira ne’e la mosu iha fatin subar ida. 27 Liurai
Agripa, ita boot fiar profeta sira? Ha’u hatene ita boot fiar.” 28
Tuir mai Agripa dehan ba Paulo, “La kleur o sei halo ha’u sai hanesan
sarani ida.” 29 Paulo hatan, “Ha’u harohan ba
Maromak katak lalais ka nei-neik la’os deit ita maibe ema hotu nebe rona ha’u
iha loron ne’e bele sai hanesan ha’u, maibe la hodi korente sira ne’e.”
30 Hafoin
liurai hamriik hamutuk ho gubernador no Berenice no sira seluk nebe tur hamutuk
ho sira. 31 Wainhira sira sai ona, sira dehan ba
malu, “Ema ne’e la halo buat ida nebe soi mate ka dadur.” 32
No Agripa dehan ba Festo, “Nia la husu karik atu ba Cesar, ita bele husik
ona ema ne’e.”
|