SAUN PAULO NIA SURAT SIRA ROMA
1
Kumprimentu
1
Paulo, Kristu Jesus nia atan ida, nebe Maromak bolu
atu sai apostolu no haketak tiha atu serbisu ba evangeliu 2
nebe Maromak hakotu nanis ona houri uluk housi profeta sira iha Sagrada
Eskritura, 3 evangeliu kona ba nia Oan Mane, Jesus
Kristu, ita Na’i, David nia oan tuir isin, 4 maibe
Maromak nia Oan Mane tuir espiritu santidade nian housi nia moris hi’as housi mate. 5 Housi
Nia, ami simu knaar apostoladu nian atu halo ema halo tuir tan fiar iha gentiu sira leet tan Nia naran. 6
Iha sira ne’e nia leet Maromak bolu mos imi atu sai Kristu nian; 7
ba Maromak nia doben sira hotu iha Roma, nebe Maromak bolu atu sai santu:
kmanek no dame ba imi housi Maromak, ita Aman no housi Na’i Jesus Kristu.
Fo agradese
8
Uluk knanain, ha’u fo agradese ba ha’u nia Maromak,
housi Jesus Kristu, tamba imi hotu, basa imi nia fiar hetan naran boot iha
raiklaran tomak. 9 Maromak nebe ha’u serbi ho neon
hodi haklaken nia Oan Mane nia evangeliu mak ha’u nia sasin katak ha’u temi imi
bei-beik iha ha’u nia orasaun, 10 hodi husu nafatin
atu, Maromak hakarak karik, ha’u sei hetan dalan atu to’o ba imi. 11 Basa
ha’u hakarak mana-manas hare imi, atu ha’u bele hato’o ba imi kmanek espiritual
nebe bele sai imi nia kbiit, 12 ka diak liu tan,
atu ita hotu hamutuk bele hametin malu housi ita nia fiar; imi nian no ha’u
nian. 13 Ha’u hakarak katak imi hotu, maun alin
sira, hatene katak ha’u hanoin fila-fila atu ba hare imi, (maski to’o ohin buat
ruma taka dalan nafatin), atu ha’u bele ku’u fuan ruma iha imi nia leet nudar
ha’u halo ona iha gentiu seluk sira. 14 Ba ema gregu
sira no mos ba sira nebe la’os gregu, ba sira nebe matenek no ba sira nebe
beik; ha’u iha obrigasaun, 15 tan ne’e mak ha’u
laran manas atu haklaken mos evangeliu ba imi iha Roma.
Maromak nia kbiit atu soi ema
16
Basa ha’u la moe kona ba evangeliu. Evangeliu ne’e
mak Maromak nia kbiit atu soi ema sira nebe fiar: ba ema Judeu sira, uluk
knanain, hafoin ba ema gentiu sira, 17 basa iha
evangeliu ne’e mak fo hatene tiha ona Maromak
nia justisa housi fiar ba fiar, nudar hakerek nanis: “Ida nebe los tamba
fiar sei moris.”
Todan housi Maromak
18
Housi lalehan Maromak hatudu nia laran nakali
hasouru ema fiar laek no laran aat nebe, tan sira nia laran aat, halakon
lialos. 19 Basa buat nebe ema bele hatene kona ba
Maromak, sira hatene mo-mos, basa Maromak hatudu ona ba sira. 20
Houri mundu hahu, ema hatene ona Maromak nia kbiit rohan laek no kmanek
Maromak nian nebe matan la hare iha buat hotu nebe Nia halo. Nune’e sira la
bele fase liman, 21 basa maski sira hatene Maromak,
sira la hanai Nia nudar Maromak ka fo agradese ba Nia; maibe sira nia hanoin la
los ona no sira nia ulun sai nakukun hela. 22 Sira
dehan katak sira matenek, maibe lo-los sira beik, 23 hodi
troka Maromak rohan laek nia kmanek ba ema, manu ka balada ho ain haat ka samea nia ilas.
24 Tan
ne’e, Maromak husik sira monu ba sala foer tan sira nia laran foer, hodi hafoer
malu nia isin, 25 basa sira troka tiha lialos kona
ba Maromak ho lia bosok hodi hahi, no serbi buat nebe Maromak halo iha Ida nebe
halo sira nia fatin, nebe kmanek ba nafatin. Amen. 26 Ne’e
duni, Maromak husik sira monu ba sala nebe hafoer sira. Feto la ba ona ho mane
hanesan bai-bain maibe halo buat oi-oin nar-naran deit; 27
no mane sira mos, husik tiha feto sira, buka mane maluk hodi halo buat
nebe hamoe ema. Nune’e sira simu iha sira nia isin todan nebe lo-los deit ba
sira nia laran foer ne’e. 28 No tamba sira ne’e
lakohi simu Maromak, Maromak husik sira ba sira nia hanoin nebe nakukun atu
halo buat nebe la los. 29 Sira nakonu ho buat hotu
nebe aat: laran aat, karakten, laran foer: nakonu ho laran moras, oho ema,
hirus malu, bosok malu no hasara malu. Sira konta ema nia vida, 30
lori lia kona ba ema seluk, hirus Maromak, foti an, gaba an, loko an,
matenek atu halo aat, no refila sira nia aman inan, 31 beik,
ema la bele konfia, fuan tos, laran tos. 32 Maski
sira hatene Maromak nia ukunfuan lo-los katak sira nebe halo buat hirak ne’e
soi mate, sira la’os deit la halo sira maibe fo tan tulun ba sira nebe halo
nia.
|