2

Ema Judeu sira mos bele hetan todan

                ¹ Maski o se, o la iha rasaun wainhira o tesi lia ba ema seluk, basa wainhira o tesi lia ba ema seluk, o tesi lia ba o nia an rasik, basa o halo mos hanesan sira. ² Ita hatene katak Maromak tesi lia lo-los ba sira nebe moris hanesan ne’e. ³ O hanoin katak o bele halai  housi Maromak nia justisa wainhira o tesi lia ba sira nebe halo nune’e, maibe o mos halo hanesan sira? ⁴ Ka o fiar Maromak nia laran diak boot liu, nia laran luak no nia pasiensia? O la hatene katak Maromak nia laran diak ne’e ten ke lori o atu hakribi o nia sala? ⁵ Ho nia ulun tos o lakohi hakribi o nia sala; nune’e o haloot hirus ba o nia an iha loron hirus nian, wainhira Maromak hatudu nia justisa nebe los. ⁶ Basa Nia sei selu ema ida-ida tuir ida-ida nia hahalok; ⁷ moris rohan laek ba sira nebe buka, ho sira nia hahalok diak to’o rohan, kmanek no naran boot no moris nebe sei la mate; ⁸ maibe ba sira nebe lakohi tuir lialos tan buka an deit hodi moris tuir sira nia laran aat, Maromak sei haraik nia laran nakali no hirus. ⁹ Los duni, susar no laran taridu sei mosu ba ema nebe halo aat, uluk knanain ema Judeu, tuir mai ema gregu. ¹⁰ Maibe, gloria, hahi no dame ba sira hotu nebe halo diak, uluk knanain ema Judeu, tuir mai ema gregu. ¹¹ Maromak sei la fihir ema.

Maromak sei tesi lia tuir  ukunfuan nebe iha ema nia laran.

                ¹² Sira hotu nebe halo sala, maibe la hatene  ukunfuan, sei lakon maibe tuir sasukat nebe la sura  ukunfuan; no sira nebe iha  ukunfuan nia ukun sei hetan todan tuir ukunfuan nia sasukat. ¹³ Basa la’os sira nebe rona tiha ukunfuan, maibe sira nebe halo tuir nia mak los iha Maromak futar oin. ¹⁴ Ne’e duni, wainhira gentiu sira nebe la hatene  ukunfuan, moris tuir buat nebe ukunfuan haruka tamba buat nebe iha ona sira nia laran, buat hirak ne’e mak ukunfuan ona ba sira maski sira la iha  ukunfuan. ¹⁵ Sira ne’e hatudu katak ukunfuan hakerek nanis ona iha sira nia fuan, sira nia laran fo sasin ba nia; no hanoin oi-oin dehan ba sira katak sira sala ka sira los, ¹⁶ iha loron nebe tuir evangeliu nebe ha’u haklaken, Maromak sei tesi lia ba ema ida-ida nia laran,  housi Jesus Kristu.

                ¹⁷ O bolu o nia an ema Judeu karik, no o fiar teb-tebes iha ukunfuan, no gaba an kona ba o nia Maromak, ¹⁸ hodi hatene Nia hakarak no buat nebe los  housi buat nebe la los, basa ema hanorin ona o kona ba ukunfuan; ¹⁹ o fiar katak o matadalan ida ba ema matan delek no naroman ba sira nebe iha nakukun laran, ²⁰ o hanorin ema beik sira no fo hatene ba sira nebe la hatene tamba  ukunfuan hanorin matenek no lialos tomak; ²¹ ne’e duni, o haklaken katak la bele na’ok, maibe o rasik la na’ok? ²² O dehan katak la bele halo sala foer, maibe o la halo sala foer? O lakohi katak ema adora lulik sira, maibe o rasik la hafoer o nia an ho lulik sira? ²³ Wainhira o gaba an kona ba ukunfuan, maibe o la tuir nia, o la halo ema hewai Maromak tan o la tuir ukunfuan?  ²⁴ Eskritura dehan: “Tamba o nia hahalok aat mak ema hewai Maromak nia naran iha gentiu sira nia leet.”

Sirkunsisaun sei la soi ema

                ²⁵ Sirkunsisaun iha folin wainhira o halo tuir ukunfuan, maibe o la halo tuir ukunfuan, o hanesan deit sira nebe la simu sirkunsisaun. ²⁶ Ema ida nebe la simu sirkunsisaun halo tuir ukunfuan karik, ne’e la’os sirkunsisaun ona ba nia? ²⁷ Tebes, sira nebe la simu sirkunsisaun iha isin, maibe halo tuir ukunfuan sei tesi lia ba o ho o nia  ukunfuan nebe hakerek hela no ho o nia sirkunsisaun. ²⁸ Ema ida la’os Judeu tamba isin. Sirkunsisaun lo-los la’os iha isin; ²⁹ maibe ema ida mak ema Judeu lo-los iha nia laran, no sirkunsisaun mak iha fuan, iha espiritu, la’os iha hakerek; nia hetan hahi la’os housi ema sira maibe  housi Maromak.