5

Fiar, domin no esperansa

                ¹ Ne’e duni, tan ita sai ema los ona tan fiar, ita dame malu ona ho Maromak  housi ita nia fiar iha ita Na’i, Jesus Kristu. ² Housi Nia ita bele to’o tan fiar ba kmanek nebe ita hela ohin, no ita bele gaba an iha esperansa Maromak nia gloria nian. ³ La’os ida ne’e deit, maibe ita bele gaba an mos iha ita nia terus laran, hodi hatene katak terus ne’e halo ita maka’as atu tahan, ⁴ no ita nia laran maka’as halo ita sai ema nebe ukun an, no ita nia ukun an lori ita ba esperansa; ⁵ no esperansa halo ita laran la nakraik, basa Maromak nia domin fakar tiha ba ita nia fuan housi Espiritu Santu nebe ita simu ona. ⁶ Basa Kristu, wainhira ita sei kbiit laek, mate iha tempu lo-los atu soi ema fiar laek sira. ⁷ Tebes duni, susar ba ema atu saran an ba mate tan ema diak ida. Maski tan ema diak ida ema bele hetan aten berani atu mate. ⁸ Maibe Maromak hatudu nia domin ba ita iha ne’e: katak, wainhira ita ema maksalak, Kristu mate tan ita. ⁹ Ne’e duni, tan ita ema los ona housi Nia ran, Nia sei soi ita liu tan  housi hirus boot. ¹⁰ Tebes, wainhira ita sei funubalun ba malu, ita hadame malu ona karik ho Maromak housi nia Oan Mane nia mate, ohin liu tan, ita sei hetan maksoin  housi nia moris. ¹¹ La’os deit ida ne’e; maibe ita sei gaba an kona ba Maromak housi ita Na’i, Jesus Kristu, basa housi Nia, oras ne’e ita dame malu ona.

Adao nia sala

                ¹² Ne’e duni, nudar housi ema ida deit mak sala tama iha mundu, no tan sala, mate; nune’e mate to’o  ba ema hotu, basa ema hotu sala: ¹³ basa to’o ukunfuan nia tempo, sala hela ona iha mundu maski sala la sura wainhira ukunfuan seidauk iha. ¹⁴ Maibe mate ukun housi Adao to’o Moises, ba sira mos nebe la sala tuir Adao nia sala. Adao mak ema nebe atu mai nia ilas.

Moris  housi Kristu

                ¹⁵ Maibe presente la’os hanesan sala. Basa tan ema ida deit nia sala karik mak ema barak mate, liu tan mak Maromak nia grasa no presente boot  housi ema ida, Jesus Kristu, suli ba ema barak. ¹⁶ No presente ne’e la’os hanesan buat nebe ema ida nia sala lori mai, basa sala neba hotu tiha, tesi kedas lia hodi fo todan; maibe presente ne’e, liu tiha sala barak, lori fali perdua. ¹⁷ Basa, housi ema ida nia sala, mate mai atu ukun tan ema ida deit karik; liu tan mak sira nebe simu grasa wa’in ba wa’in  no presente atu sai ema los sei ukun iha moris tan ema ida, Jesus Kristu. ¹⁸ Ne’e duni, nudar  housi sala ida lia todan monu ba ema hotu, nune’e mos housi hahalok diak ida perdaun no moris mosu ba ema hotu. ¹⁹ Basa nudar tan ema ida lakohi halo tuir, ema barak sai maksalak; nune’e mos, tan ema ida halo tuir, ema barak sei sai ema los. ²⁰ Ukunfuan tama mai atu sala bele sai barak; maibe iha nebe sala sai barak duni, iha neba grasa sai barak liu tan; ²¹ nune’e, nudar sala ukun iha mate, nune’e grasa sei ukun housi justisa ba moris rohan laek tan Jesus Kristu, ita Na’i.