6

Mate ho Kristu iha baptismu

                ¹ Ita sei dehan sa? Ita sei halo sala bei-beik atu grasa bele sai wa’in liu tan? La iha liu!  ² Oin sa ita nebe mate ona ba sala bele moris fali iha nia? ³ Ka imi la hatene katak ita nebe simu tiha baptismu iha Kristu Jesus simu tiha baptismu iha nia mate? ⁴ Tebes duni, ita hakoi tiha ona ho Nia iha baptismu ba Nia mate, atu nune’e, nudar Kristu moris  hi’as  housi mate tan Aman nia gloria, ita mos sei moris ba moris foun.

                ⁵ Basa ita neon no laran ida deit ho Nia liu tan karik housi mate hanesan Nia mate, ita sei sai ida deit ho Nia iha moris hi’as. ⁶ Ita hatene katak ema tuan iha ita an hedi ona ba krus hamutuk ho Nia, atu nune’e ita nia isin nebe maksalak bele lakon, atu ita la bele sai ona sala nia atan. ⁷ Basa ema mate ida hetan ona perdua ba nia sala. ⁸ Ne’e duni, ita mate ona ho Kristu karik, ita fiar katak ita mos sei moris hamutuk ho Nia. ⁹ Ita hatene katak Kristu, moris  hi’as ona  housi mate, sei la mate tan; mate la bele ukun ona Nia. ¹⁰ Kona ba Nia mate: Nia mate dala ida deit ba nafatin; kona ba nia moris, Nia moris ba Maromak. ¹¹ Ne’e duni, imi mos ten ke hare imi nia an nudar mate ona ba sala no moris dau-daun ba Maromak iha Kristu Jesus.

                ¹² Ne’e duni, sala la bele ukun tan imi nia isin nebe sei mate hodi halo tuir isin nia hakarak. ¹³ Keta saran imi nia isin nia liman ain ba sala nudar kilat atu halo hahalok aat, maibe saran imi an ba Maromak nudar ema nebe moris hi’as ona housi mate no imi nia liman ain nudar kilat atu halo hahalok diak. ¹⁴ Basa sala la bele ukun tan imi, tamba imi la iha  ona ukunfuan nia ukun maibe iha grasa nian.

                ¹⁵ Ne’e katak sa? Ita sei halo sala basa ita la iha ona ukunfuan nia ukun maibe iha grasa nian? La iha! ¹⁶ Imi la hatene katak imi saran an karik ba ema ruma nudar nia atan, imi mak ema nebe imi tuir nia atan: atan sala nian, nebe lori ba mate; ka atan halo tuir nian nebe lori ba moris? ¹⁷ Maibe, agradese ba Maromak katak, maski uluk imi sala nia atan, ohin imi, ho laran, halo tuir ona hanorin nebe ba nia imi saran an ona. ¹⁸ Sai tiha housi sala nia ukun, imi sai atan ba justisa. ¹⁹ Ha’u koalia tuir ema nia hanoin tan imi kbiit laek. Basa, nudar imi saran imi isin nia liman ain nudar atan ba sala foer no hahalok aat ba hahalok aat, nune’e, ohin saran imi nia liman ain nudar atan ba justisa atu sai santu. ²⁰ Basa wainhira imi sala nia atan, imi dook  housi moris santu. ²¹ Maibe imi manan sa los housi buat sira nebe ohin halo imi moe ona? Basa buat sira ne’e hotu lori ba mate. ²² Maibe oras ne’e, imi sai tiha housi sala nia ukun no sai ona Maromak nia atan, diak nebe imi hetan lori ba moris santu, nebe lori ba moris rohan laek. ²³ Basa sala nia kolen mak mate, maibe Maromak nia presente mak moris rohan laek iha Kristu Jesus, ita Na’i.