7

Mate ona ba  ukunfuan

                ¹ Imi la hatene, maun-alin sira, katak  ukunfuan ukun deit ema wainhira nia moris hela (ha’u koalia ba ema nebe hatene  ukunfuan)?   ² Tuir  ukunfuan, feto ida metin ba nia laen wainhira nia laen sei moris, maibe wainhira nia laen mate ona, ukunfuan husik ona nia housi nia laen. ³ Ne’e duni, wainhira nia laen sei moris no nia hela ho mane seluk karik, ema sei hare nia hanesan sala foer na’in. Maibe wainhira nia laen mate ona, ukunfuan ne’e husik ona nia; nia hela ho mane seluk karik, nia la’os sala foer na’in.

                ⁴ Nune’e mos, maun-alin sira, ema oho tiha ona imi ba ukunfuan tan Kristu nia isin, atu imi bele sai ema seluk nian, katak ba Ida nebe moris hi’as ona housi mate, atu ita bele fo fuan ba Maromak. ⁵ Basa, wainhira ita sei iha isin, ita nia hakarak aat, nebe  ukunfuan hamanas liu tan, book ita nia liman ain atu fo fuan nebe lori ba mate. ⁶ Maibe, oras ne’e, ita sai ona housi ukunfuan nia ukun, ita mate ona ba buat nebe kaer ita, atu nune’e ita bele serbi ho laran foun espiritu nian, la’os tan iha  ukunfuan nia ukun nebe kbiit laek ona.

Hatene sala tan  ukunfuan

                ⁷ Ita bele dehan sa? Katak ukunfuan mak sala? La iha liu! Maibe, tan  ukunfuan deit mak ha’u hatene sala, no ha’u la hatene “hakarak buat nebe ema seluk nian” katak sa molok ukunfuan dehan “O labele hakarak buat nebe ema seluk nian.” ⁸ Maibe sala nebe hetan dalan tan ukunfuan, hanorin ha’u atu hakarak buat oi-oin nebe ema seluk nian. Ketak housi ukunfuan, sala mate ona. ⁹ Uluk ha’u moris dook  housi ukunfuan nia ukun, maibe wainhira ukunfuan mosu mai, sala hahu moris: ¹⁰ tuir mai, ha’u mate, no  ukunfuan nebe atu fo moris nakfila fali ba mate mai ha’u. ¹¹ Basa sala, hetan tiha fatin iha ukunfuan, lohi ha’u no housi ukunfuan ne’e, oho ha’u. ¹² Ne’e duni, ukunfuan ne’e santu, no  ukunfuan nia haruka sira ne’e santu, los no diak.

Sala no mate

                ¹³ Ne’e duni, buat nebe diak sai fali mate mai ha’u? Lae! Sala, atu bele hatudu an nudar sala, lori mate mai ha’u housi buat nebe diak, atu sala bele sai sala boot liu tan ukunfuan. ¹⁴ Ita hatene katak  ukunfuan mak buat nebe espiritu nian, maibe ha’u fali isin nian nebe faan tiha ona atu sai atan ba sala. ¹⁵ Buat nebe ha’u halo, ha’u la hatene. Basa ha’u la halo buat nebe ha’u hakarak, maibe ha’u halo buat nebe ha’u lakohi. ¹⁶ Ne’e duni, ha’u halo buat nebe ha’u lakohi karik, ha’u simu katak ukunfuan ne’e diak. ¹⁷ Oras ne’e, la’os tan ha’u mak halo nia, maibe sala nebe horik iha ha’u laran. ¹⁸ Basa ha’u hatene katak diak la horik iha ha’u, katak, iha ha’u nia isin. Laran atu halo iha duni; maibe hahalok diak, lae. ¹⁹ Basa ha’u la halo hahalok diak nebe ha’u hakarak halo, maibe halo hahalok aat nebe ha’u lakohi. ²⁰ Ha’u halo karik buat nebe ha’u lakohi, la’os tan ha’u mak halo nia, maibe sala nebe horik iha ha’u. ²¹ Ne’e duni, ha’u hare katak wainhira ha’u hakarak halo buat nebe los, buat aat mosu. ²² Basa iha ha’u nia laran, ha’u haksolok iha Maromak nia ukunfuan, ²³ maibe ha’u hare iha ha’u nia liman ain buat seluk tan nebe halo funu hasouru ukunfuan iha ha’u nia laran, hodi kesi ha’u metin ba  ukunfuan sala nian nebe horik iha ha’u nia liman ain. ²⁴ Ha’u kasihan los duni! Se mak sei hasai ha’u  housi ha’u nia isin nebe sei mate ne’e? ²⁵ Obrigadu ba Maromak, housi Jesus Kristu, ita Na’i. Ne’e duni, ha’u rasik serbi Maromak nia ukunfuan ho ha’u nia laran, maibe ho ha’u nia isin, ha’u serbi  ukunfuan sala nian.