8
Isin no espiritu
1
Ne’e duni, la iha lia kastigu nian ba sira nebe iha
Kristu Jesus. 2 Basa ukunfuan espiritu moris nian iha Kristu Jesus hasai ona imi housi
ukunfuan sala no mate nian. 3 Basa buat nebe
ukunfuan la bele halo tamba kuran kbiit tan isin, Maromak halo tiha hodi haruka
nia Oan Mane iha isin nudar ilas ema maksalak nian, no tan sala, tesi lia todan
ba sala iha isin, 4 atu nune’e buat los nebe
ukunfuan haruka bele halo tuir duni iha ita nebe moris, la’os tan tuir isin,
maibe tuir espiritu. 5 Basa sira nebe moris tuir
isin hanoin deit buat nebe isin nian, maibe sira nebe moris tuir espiritu,
hanoin buat nebe espiritu nian. 6 Isin nia hanoin
mak mate, maibe espiritu nia hanoin mak moris no dame. 7 Basa
isin nia hanoin mak atu funu malu ho Maromak; nia lakohi halo tuir Maromak nia
ukunfuan; nia la bele duni; 8 no sira nebe horik
iha isin labele monu los ba Maromak nia laran. 9 Maibe
imi la horik iha isin; lo-los imi iha espiritu wainhira Maromak nia espiritu
horik iha imi. Ema nebe la iha Kristu nia espiritu iha nia, la’os Kristu nian. 10
Maibe Kristu iha imi karik, maski isin mate ona tamba sala, espiritu
moris hela tan justisa. 11 Na’i, nebe halo Jesus
moris hi’as housi mate, nia espiritu
horik iha imi karik, ida nebe halo Kristu moris hi’as fali sei fo moris mos ba imi nia isin nebe bele mate, housi espiritu nebe horik iha imi. 12
Ne’e duni, maun alin sira, ita la iha tusan ba isin, atu moris tuir isin.
13 Imi moris tuir isin karik, imi sei mate; maibe
tuir espiritu, imi oho karik isin nia hahalok, imi sei moris.
Maromak nia oan hakiak
14
Sira nebe Maromak nia espiritu mak ukun mak Maromak
nia oan sira. 15 Basa imi la simu espiritu atan
nian nebe halo imi tauk, maibe imi simu espiritu oan hakiak nian, tan ne’e, ita
haklaken: “Abba, Aman!” 16 Espiritu rasik fo sasin
ho ita nia neon katak ita Maromak nia oan; 17 no
oan karik, ne’e duni liman rohan na’in, liman rohan na’in Maromak nian no liman
rohan na’in hamutuk ho Kristu; naran ita terus hamutuk ho Nia atu ita mos bele
hetan naran boot hamutuk ho Nia
Terus ohin ne’e nian
18
Ha’u hare terus ohin ne’e nian nudar kiik liu
wainhira tau hamutuk ho gloria nebe atu sei hatudu mai ita. 19
Basa mundu tomak hein mana-manas tempu wainhira sei hatudu Maromak nia
oan sira, 20 basa mundu tomak sai tiha folin laek,
la’os tan nia rasik hakarak, maibe tamba Ida nebe halo nia sai nune’e nia
hakarak iha esperansa; basa mundu ne’e sei sai housi situasaun atan nian nebe
sei dodok, hodi halo parte, nudar Maromak nia oan, iha ema nebe la’os atan nia kmanek. 22 Ita
hatene katak ohin ne’e mos mundu tomak hakilar tanis hanesan feto nebe atu tur
ahi; 23 no la’os mundu deit; maibe ita mos tanis
hakilar iha ita nia laran wainhira ita, nebe iha ona espiritu nia fuan uluk
nian, hein dau-daun tempu nebe Maromak sei hakiak ita, katak tempu nebe ita nia
isin sei sai la’os atan ona. 24 Basa iha esperansa
mak ita hetan maksoin. Esperansa nebe hare ho matan rasik la’os esperansa. Se
mak iha esperansa ba buat nebe nia hare ona?
25 Maibe ita iha esperansa kona ba buat nebe
ita la hare karik, ita hein ho pasiensia.
26 Nune’e
mos, Espiritu tulun ita nebe kbiit laek, basa ita la hatene harohan lo-los,
maibe Espiritu rasik harohan hodi tanis hakilar maka’as hanesan liafuan la bele
hato’o. 27 No Ida nebe hatene mo-mos ema nia fuan
hatene buat nebe iha Espiritu nia laran, basa Espiritu harohan ba ema santu
sira tuir Maromak nia hakarak.
Maromak nia domin iha Kristu
28
Ita hatene katak buat hot-hotu lori ba diak ba sira
nebe hadomi Maromak; sira nebe Maromak bolu tuir Nia hakarak. 29
Basa sira nebe Nia hatene nanis ona, nia fo ona destinu atu sai nia Oan
Mane nia ilas, atu Nia bele sai oan boot liu iha maun alin barak sira leet. 30
No sira nebe Nia fo destinu nanis ona, Nia bolu mos; no sira nebe Nia
bolu, Nia mos halo ema los; no sira nebe Nia halo ema los, Nia mos fo naran
boot.
31 Ne’e
duni, ita bele dehan sa kona ba ne’e? Maromak hamutuk ho ita karik, se mak bele
hasouru ita? 32 Nia nebe la hanoin Nia Oan Mane,
maibe saran Nia tamba ita hotu, oin sa Nia sei la fo buat seluk hotu hamutuk ho
Nia? 33 Se mak atu foti lia hasouru sira nebe
Maromak fihir ona? Maromak mak ida nebe halo los. 34 Se
mak tesi lia todan hasouru ita? Kristu (Jesus) nebe mate, liu! Nia moris hi’as, nebe hatodan An iha Maromak nia
kuana, nebe harohan duni tan ita. 35 Buat sa mak
sei haketak ita housi Kristu? Laran
susar, ka laran taridu, ka ema duni todan, ka hamlaha ka hatais la iha; ka
perigu, ka surik? 36 Nudar hakerek nanis: “Tan imi,
ema oho ami loron tomak; ema hare ami hanesan bibi nebe atu oho ona.” 37
Lae, iha buat hotu ne’e ita liu fali sira nebe manan housi Nia nebe
hadomi ita. 38 Basa ha’u fiar lo-los katak mate ka
moris, anju ka lalehan nia kbiit na’in sira; ka sasan ohin ne’e nian ka buat
aban bainrua nian; 39 ka kbiit na’in sira, ka fatin
aas, ka fatin klean, ka buat seluk tan nebe Maromak halo bele haketak ita housi Maromak nia domin, iha Kristu Jesus,
ita Na’i.
|