9

Paulo nia domin ba Israel

                ¹ Ha’u koalia lialos iha Kristu. Ha’u la bosok; ha’u nia laran fo sasin mai ha’u iha Espiritu Santu, katak ha’u laran susar no neon todan tebes iha ha’u nia fuan. ² Basa ha’u bele hakarak mos atu ha’u hetan malisan no haketak  an housi Kristu tan deit ha’u nia maun alin sira nia diak, ha’u nia maluk uma-kain nian tuir isin. ⁴ Sira ema Israel, Maromak nia oan hakiak; ba sira Maromak fo gloria; ho sira Na’i hametin moruk, ba sira Nia fo  ukunfuan; sira hatene adora nia lo-los, no ba sira Na’i halo promessa. ⁵ Patriarka sira mosu iha sira leet, no housi sira ne’e, tuir isin, Messias mosu. Ba Maromak nebe aas liu buat hotu rahun diak tinan ba tinan. Amen.

Maromak mak hili

                ⁶ Maibe la’os katak Maromak nia futar lia leet deit. Basa la’os buat hotu nebe mai housi Israel mak Israel nian; ⁷ no mos la’os Abraao nia oan sira sai Abraao nia bei-oan, maibe “housi Isaac mak o nia bei-oan sira sei lori o nia naran.” ⁸ Ne’e katak la’os oan sira tuir isin mak Maromak nia oan, maibe oan sira tuir promessa mak sura nudar oan. ⁹ Basa promessa dehan nune’e: “Besik tempu hanesan ne’e, Ha’u sei fila fali no Sarah sei hetan oan ida.” ¹⁰ No la’os ida ne’e deit, maibe mos wainhira Rebeca ko’us oan sira housi mane ida deit, ita nia aman Isaac, ¹¹ molok sira moris mai, ka halo buat ruma, diak eh aat, atu Maromak nia hakarak bele la’o ba oin, ¹² la’os  housi hahalok maibe tan Nia bolu; Maromak dehan nanis ba nia: “Ida boot sei serbi ida kiik liu,” ¹³ nudar hakerek nanis: “Ha’u hadomi Jacob maibe hirus Esau.” ¹⁴ Ne’e duni, ita sei dehan sa? Maromak nia hahalok la los? Lae! ¹⁵ Basa Nia dehan ba Moises: “Ha’u sei hatudu Ha’u nia laran luak ba ida nebe Ha’u hakarak; Ha’u sei sadia ida nebe Ha’u hanoin.” ¹⁶ Ne’e katak la’os tan ema nia hakarak ka hahalok, maibe tan Maromak nia laran luak. ¹⁷ Basa Eskritura dehan ba liurai Egiptu nian: “Tan ne’e mak Ha’u foti o, atu  housi o Ha’u sei hatudu Ha’u nia kbiit, atu Ha’u nia naran sei haklaken iha mundu tomak.” ¹⁸ Ne’e duni, Nia hatudu Nia laran luak ida nebe Nia hakarak, no Nia halo laran tos ida nebe Nia hakarak.

                ¹⁹ Imi sei dehan mai ha’u: “Tan sa Nia sei hare sala? Ema se bele ba hasouru Maromak nia hakarak? ²⁰ Maibe o se los, o ema deit, atu refila Maromak? Buat ida nebe ema halo bele dehan ba ida nebe halo nia, “Tan sa o halo ha’u hanesan ne’e?”  ²¹ Ka ida nebe halo sana rai bele halo buat nebe nia hakarak kona ba tahu, atu halo housi masa rai nian ida deit sana ba buat kmanek ka sana ba buat folin laek? ²² Wainhira Maromak hakarak hatudu nia laran nakali no hatudu nia kbiit, tahan ho pasiensia barak sana laran nakali nian atu sobu rahun hotu, ne’e sa ba o?  ²³ Ne’e mak atu fo hatene nia gloria nia rikusoi ba sana laran luak nian, nebe Nia hadia nanis ona ba gloria, ²⁴ katak ita nebe Nia bolu, la’os deit  housi ema Judeu sira maibe mos  housi ema gentiu sira.

Sasin ba profeta sira

                ²⁵ Tebes duni, Nia dehan duni housi Hoseia: “Sira nebe la’os Ha’u nia povu, Ha’u sei bolu ‘Ha’u nia povu,’ no nia nebe Ha’u la hadomi Ha’u sei bolu ‘Ha’u nia doben.’” ²⁶ No iha fatin lo-los nebe dehan ba sira, ‘Imi la’os Ha’u nia povu,’ iha neba sira sei hanaran an ‘Maromak moris nia oan sira.’”

                ²⁷ No Isaias dehan ho lia maka’as kona ba Israel, “Maski Israel oan sira barak hanesan rai henek iha tasi, balun deit sei hetan maksoin, ²⁸ basa Na’i sei tesi lia no fo todan lalais ho kbiit maka’as ba rai.” No ²⁹ nudar Isaias dehan nanis, “Na’i funu na’in sira nian la husik karik bei-oan mai ita, ita sei sai hanesan Sodom, no hanesan Gomorra.”

Ema laran los tan fiar

                ³⁰ Ne’e duni, ita sei dehan sa? Katak gentiu sira nebe la buka atu sai ema los sai fali ema los; katak, sira sai ema los tan fiar; ³¹ maibe katak Israel nebe buka laran los hodi moris tuir  ukunfuan la to’o moris tuir ukunfuan ne’e. ³² Tan sa lae? Basa sira la buka nia ho fiar, maibe buka nia hanesan nia bele hetan housi hahalok sira. Sira sidi ba fatuk nebe halo sira monu, ³³ nudar hakerek nanis: “Hare ba, ha’u sei tau fatuk sidi iha Siao, nebe sei halo povu monu no fatuk boot ida nebe sei halo sira monu, no ema nebe fiar iha Nia sei la moe.”