10

Maromak futar lia

                ¹ Maun alin sira, ha’u nia fuan hakarak no harohan ba Maromak atu sira hetan maksoin. ² Ha’u fo sasin ba sira nia laran manas kona ba Maromak, maibe sira nia laran manas ne’e nakukun hela. ³ Basa, sira la hatene katak justisa mai housi Maromak; maibe sira haka’as an atu hetan justisa tuir sira dalan, sira la simu Maromak nia justisa.  ⁴ Ukunfuan nia rohan mak Kristu atu ema hot-hotu nebe fiar bele hetan maksoin.

                ⁵ Moises hakerek kona ba justisa nebe mai housi  ukunfuan, “Ema nebe halo buat hirak ne’e sei moris tuir sira.” ⁶ Maibe justisa nebe mai housi fiar dehan, “Keta dehan iha o nia laran, ‘ema se sei sa’e ba lalehan?’ (katak, atu lori Kristu tun mai); ⁷ ka ‘Ema se sei tun ba rai klean? (katak, ‘atu foti Kristu  housi mate sira leet). ⁸ Maibe, nia dehan sa? “Liafuan besik imi, iha imi nia ibun no iha imi nia fuan,” (katak, liafuan fiar nian nebe ami haklaken), ⁹ basa, imi haklaken ho imi nia ibun katak Jesus mak Na’i no fiar iha imi nia laran katak Maromak foti Nia housi mate sira leet, imi sei hetan maksoin. ¹⁰ Basa ema fiar ho fuan no nune’e ema hetan justisa, no ema haklaken ho ibun no nune’e mak hetan maksoin. ¹¹ Basa Eskritura dehan, “La iha ema ida nebe fiar iha Nia sei moe lerik.” ¹² Basa ema Judeu no ema gregu hanesan deit; Na’i ida deit mak Na’i ema hot-hotu nian, nebe haburas ema hotu nebe bolu nia Naran. ¹³ Basa “ema hot-hotu nebe bolu Na’i nia naran sei hetan maksoin.”

                ¹⁴ Maibe oin sa sira bele bolu Nia nebe sira la fiar? No oin sa sira bele fiar iha Nia wainhira sira seidauk rona kona ba Nia? No oin sa sira bele rona wainhira la iha ema atu haklaken? ¹⁵ No oin sa ema bele haklaken wainhira ema haruka sira? Nudar hakerek nanis, “Furak oin sa ain sira nebe lori liafuan foun diak mai!” ¹⁶ Maibe la’os ema hot-hotu mak simu evangeliu ne’e; basa Isaias dehan, “Na’i, ema se mak fiar buat nebe sira rona  housi ami?” ¹⁷ Nune’e, fiar mai housi buat nebe rona tiha, no buat nebe rona tiha mai housi Kristu nia liafuan. ¹⁸ Maibe ha’u husu, sira la rona? Los duni, sira rona; basa “Sira nia liafuan belar ba raiklaran tomak, no sira nia liafuan ba mundu nia rohan.” ¹⁹ Maibe ha’u husu, Israel la komprende? Uluk, Moises dehan, “Ha’u sei halo o laran moras kona ba sira nebe la’os nasaun ida; ho nasaun nebe beik ha’u sei halo o laran nakali.” ²⁰ Isaias koalia maka’as hodi dehan, “Ema sira nebe la buka Ha’u hetan Ha’u; Ha’u hatudu Ha’u An ba sira nebe la husu kona ba Ha’u.” ²¹ Maibe kona ba Israel, nia dehan, “Loron tomak Ha’u lolo Ha’u nia liman ba povu nebe ulun tos no buka deit istori malu.”