10
Maromak futar lia
1
Maun alin sira, ha’u nia fuan hakarak no harohan ba
Maromak atu sira hetan maksoin. 2 Ha’u fo sasin ba
sira nia laran manas kona ba Maromak, maibe sira nia laran manas ne’e nakukun
hela. 3 Basa, sira la hatene katak justisa mai
housi Maromak; maibe sira haka’as an atu hetan justisa tuir sira dalan, sira la
simu Maromak nia justisa. 4
Ukunfuan nia rohan mak Kristu atu ema hot-hotu nebe fiar bele hetan
maksoin.
5 Moises
hakerek kona ba justisa nebe mai housi
ukunfuan, “Ema nebe halo buat hirak ne’e sei moris tuir sira.” 6
Maibe justisa nebe mai housi fiar dehan, “Keta dehan iha o nia laran,
‘ema se sei sa’e ba lalehan?’ (katak, atu lori Kristu tun mai); 7
ka ‘Ema se sei tun ba rai klean? (katak, ‘atu foti Kristu housi mate sira leet). 8
Maibe, nia dehan sa? “Liafuan besik imi, iha imi nia ibun no iha imi nia
fuan,” (katak, liafuan fiar nian nebe ami haklaken), 9 basa,
imi haklaken ho imi nia ibun katak Jesus mak Na’i no fiar iha imi nia laran
katak Maromak foti Nia housi mate sira leet, imi sei hetan maksoin. 10
Basa ema fiar ho fuan no nune’e ema hetan justisa, no ema haklaken ho
ibun no nune’e mak hetan maksoin. 11 Basa Eskritura
dehan, “La iha ema ida nebe fiar iha Nia sei moe lerik.” 12
Basa ema Judeu no ema gregu hanesan deit; Na’i ida deit mak Na’i ema
hot-hotu nian, nebe haburas ema hotu nebe bolu nia Naran. 13
Basa “ema hot-hotu nebe bolu Na’i nia naran sei hetan maksoin.”
14 Maibe
oin sa sira bele bolu Nia nebe sira la fiar? No oin sa sira bele fiar iha Nia
wainhira sira seidauk rona kona ba Nia? No oin sa sira bele rona wainhira la
iha ema atu haklaken? 15 No oin sa ema bele
haklaken wainhira ema haruka sira? Nudar hakerek nanis, “Furak oin sa ain sira
nebe lori liafuan foun diak mai!” 16 Maibe la’os
ema hot-hotu mak simu evangeliu ne’e; basa Isaias dehan, “Na’i, ema se mak fiar
buat nebe sira rona housi ami?” 17
Nune’e, fiar mai housi buat nebe rona tiha, no buat nebe rona tiha mai
housi Kristu nia liafuan. 18 Maibe ha’u husu, sira
la rona? Los duni, sira rona; basa “Sira nia liafuan belar ba raiklaran tomak,
no sira nia liafuan ba mundu nia rohan.” 19 Maibe
ha’u husu, Israel la komprende? Uluk, Moises dehan, “Ha’u sei halo o laran
moras kona ba sira nebe la’os nasaun ida; ho nasaun nebe beik ha’u sei halo o
laran nakali.” 20 Isaias koalia maka’as hodi dehan,
“Ema sira nebe la buka Ha’u hetan Ha’u; Ha’u hatudu Ha’u An ba sira nebe la
husu kona ba Ha’u.” 21 Maibe kona ba Israel, nia
dehan, “Loron tomak Ha’u lolo Ha’u nia liman ba povu nebe ulun tos no buka deit
istori malu.”
|