11
Israel nia rahun
1
Ne’e duni, ha’u husu: Maromak hewai ona nia povu?
Lae! Basa ha’u mos ema Israel ida, Abraao nia bei-oan, housi suku Benjamin
nian. 2 Maromak la hewai Nia povu nebe Nia hatene
nanis ona. Imi la hatene buat nebe Eskritura dehan kona ba Elias, oin sa nia
harohan ho laran ba Maromak hasouru Israel?
3 “Na’i, sira oho tiha ita nia profeta sira,
sira sobu tiha Ita nia altar sira, no ha’u mesak mak hela, no sira buka halakon
ha’u nia moris.” 4 Maibe Maromak hatan sa ida ba nia?
“Ha’u haketak ba Ha’u nia an ema rihun hitu nebe la tuku tur ba Baal.” 5
Nune’e mos ohin ne’e iha ema balun nebe sei hela, nebe Maromak fihir tan
grasa. 6 Maibe tan grasa karik, ne’e katak la’os
tan hahalok ona; lae karik, grasa la’os grasa ona. 7 Ne’e
duni? Israel la hetan buat nebe nia
buka; maibe sira nebe Na’i fihir hetan nia; sira seluk sai ema laran tos, 8
nudar hakerek nanis: “Maromak halo sira matan dukur liu, fo ba sira matan
nebe la bele hare no tilun nebe la bele rona, to’o loron ne’e.” 9
David dehan tan, “Husik sira nia meja sai lasu atu kaer, fatuk atu sidi
no buat todan ba sira; 10 sira nia matan sei sai
nakukun atu nune’e sira la bele hare, no sira nia kotuk sei hakru’uk ba
nafatin.”
Maksoin ba ema gentiu sira
11
Ne’e duni ha’u husu, sira ne’e sidi atu monu, ka?
Lae! Maibe housi sira nia sala, maksoin to’o
ba ema gentiu sira, nune’e halo sira laran moras. 12
Sira nia sala haburas mundu karik, no tan sira sai uitoan deit mak hawain
gentiu sira nia kmanek liu tan, ne’e sei sai oin sa liu tan wainhira sira tama
hotu? 13 Ohin, ha’u koalia ba imi, ema gentiu sira.
Nudar ha’u mak apostolu ba gentiu sira, ha’u hahi an iha ha’u nia serbisu 14
atu halo ha’u nia povu laran moras no nune’e bele soi sira balun. 15
Basa tan Na’i hewai sira karik mak lori perdaun ba mundu, wainhira Na’i
simu sira sei la sai moris housi mate? 16
Fuan uluk nian santu karik, ne’e katak fuan seluk mos santu; no abut
santu karik, ne’e katak sanak sira mos.
17 Maibe
sanak balun tohar karik, no imi, ai oliveira fuik nia sanak, hatama fali iha nia
fatin hodi halo parte iha abut buras ai oliveira ne’e, 18
keta gaba an hasouru sanak seluk; imi gaba an karik, hanoin katak la’os
imi mak haburas abut maibe abut mak
haburas imi. 19 Tebes duni, imi sei dehan, “Sanak
hatohar tiha atu bele hatama ha’u.” 20 Nune’e duni.
sanak sira ne’e hatohar tiha tan sira la fiar, maibe imi hamriik metin iha neba
tan fiar deit. Ne’e duni, keta foti an, maibe hamriik ba hodi tauk. 21
Basa, Maromak la hanoin sanak lo-los karik, Nia sei la hanoin mos imi. 22
Ne’e duni, hare ba Maromak nia laran luak no nia laran nakali: laran
nakali ba sira nebe monu; maibe laran luak ba imi, naran imi hela nafatin iha Nia laran luak; lae
karik, imi mos sei hatohar tiha. 23 Sira mos, sira
la hela nafatin iha sira nia fiar laek karik, Na’i sei hatama sira, basa
Maromak iha kbiit hatama sira fali. 24 Basa imi
nebe mai housi ai oliveira fuik karik, no, la hanesan bai-bain, hatama tiha ba
ai oliveira diak ida; liu tan mak sira bele tama fali iha ai oliveira diak nebe
lo-los sira nian ona.
Maromak mak bolu
25
Ha’u hakarak katak imi hatene di-diak misteriu
ne’e, maun alin sira, atu imi la bele sai matenek hodi foti an. Ema Israel
balun sai ona laran tos to’o tempu nebe gentiu sira tama to’o wa’in
lo-los, 26 no nune’e mak Israel tomak sei
hetan maksoin, nudar hakerek nanis: “Na’i Maksoin sei sai housi Siao, Nia sei halakon fiar laek housi
Jacob;” 27 no “ne’e mak moruk nebe Ha’u sei halo ho
sira wainhira Ha’u sei kasu sira nia sala.”
28 Tuir
evangeliu, sira Maromak nia funubalun ba imi nia diak; maibe tuir buat nebe
Maromak fihir, sira Maromak nia doben tan sira nia bei-ala sira. 29
Basa wainhira Maromak fo no bolu, la bele hasai fali.
Maromak
nia laran luak sei manan
30
Nudar uluk imi la halo tuir Maromak nia hakarak,
maibe ohin imi simu ona laran luak tan sira nia ulun tos, 31
nune’e mos sira la tuir ohin ne’e atu, tan laran luak nebe Na’i hatudu ba
imi, sira mos sei hetan laran luak. 32 Basa Maromak
saran ema hot-hotu atu sai ulun tos, atu Nia bele hatudu nia laran luak ba sira
hotu.
33 Ah,
riku soi no hatene no matenek wa’in Maromak nian klean teb-tebes! Ita nia
hanoin la to’o wainhira Nia tesi lia; Nia dalan ita la bele hatene! 34
“Basa ema se mak bele hatene Na’i nia hanoin; ka ema se mak hanorin Nia?”
35 “Ka se mak fo ba Nia buat ruma hodi hein atu
simu fali?” 36 Basa, housi Nia no tan Nia no ba Nia
mak buat hotu. Ba Nia gloria ba nafatin. Amen.
|