13

Hamtauk ukun na’in sira

                ¹ Ema ida-ida hamtauk ukun na’in sira ba; ba la iha ukun nebe la mai housi Maromak; no Maromak mak foti ukun na’in sira. ² Ne’e duni, ema nebe ba hasouru ukun na’in sira ba hasouru buat nebe Maromak foti tiha, no sira nebe ba hasouru sei lori lia todan ba sira nia an. ³ Basa ukun na’in sira la halo tauk ema nebe diak, maibe ba ema aat. Imi hakarak katak imi la bele tauk kbiit na’in sira? Halo diak ba no sira sei fo laran ba imi, ⁴ basa kbiit mak Maromak nia atan ba imi nia diak. Maibe imi halo aat karik, neon tauk ba, basa kbiit ne’e la kaer surik leet deit. Kbiit mak Maromak nia atan nebe lori todan ba ema nebe halo hahalok aat. ⁵ Ne’e duni, ita sei halo tuir, la’os deit tan tauk ema nia laran nakali, maibe mos tan ita rasik nia konsiensia. ⁶ Tan ne’e mak imi selu impostu, basa kbiit na’in sira mak Maromak nia atan, hodi serbisu  kona ba ne’e. ⁷ Ne’e duni, selu imi nia tusan hotu; impostu ba sira nebe simu impostu; serbisu ba sira nebe imi sei serbi; hamtauk ba sira nebe imi sei hamtauk, hawelok ba sira nebe imi sei hawelok.

Domin halo tuir  ukunfuan

                ⁸ Keta halo tusan ho ema ida; iha domin deit mak imi iha tusan ba malu, basa ema nebe hadomi halo tuir ukunfuan. ⁹ Ukunfuan sira: “Keta halo sala foer, keta oho, keta na’ok, keta hakarak buat nebe ema seluk nian” no  ukunfuan seluk tan nebe bele habadak ho liafuan ida ne’e. “Hadomi o nia maluk hanesan o nia an rasik.” ¹⁰ Domin la halo aat ba ema seluk; ne’e duni, domin halo tuir lo-los  ukunfuan.

Tempu nia rohan

                ¹¹ Halo buat hirak ne’e tamba imi hatene ona tempu; oras ne’e tempu ona ba imi atu hader, basa ita nia maksoin besik ona liu fali wainhira ita foin fiar; ¹² kalan to’o ona nia rohan, loron besik dau-daun ona. Ne’e duni, ita soe tiha hahalok nakukun nian no tau hatais funu naroman nian, ¹³ ita book lo-los hanesan iha loron, la’os hodi han resin no lanu, la’os ho sala foer no hahalok nar-naran deit, la’os ho halakon malu no laran moras, ¹⁴ maibe tau ita Na’i Jesus Kristu nudar imi nia hatais no keta fo fatin ba isin nia hakarak aat sira.