14

Moris no mate tan Kristu

                ¹ Simu ema nebe la maka’as iha fiar, la’os atu haksesuk malu kona ba ema ida-ida nia hanoin. ² Ema ida hanoin katak bele han buat hot-hotu; ema nebe fiar la maka’as fali han deit modo tahan. ³ Ida nebe han la bele hanoin aat ida nebe la han, no ida nebe la han la bele tesi lia todan ba ida nebe han, basa Maromak simu tiha nia. ⁴ Basa imi se atu tesi lia ba ema seluk nia atan? Iha nia na’i nia oin mak nia hamriik ka monu. No ema sei foti nia, basa Na’i bele halo nia hamriik. ⁵ Basa ema ida hanoin loron ida folin liu fali loron seluk, maibe ida seluk hanoin katak loron sira hotu hanesan deit. Ema ida-ida laran metin ba nia hanoin ba. ⁶ Se mak hafolin loron ne’e, hafolin nia iha Na’i. Nune’e mos, ema nebe han, han tamba Na’i, basa nia fo agradese ba Maromak; ida nebe la han, keta han tamba Na’i, hodi agradese mos Maromak. ⁷ Ita ida la moris ba nia an rasik, no ita ida la mate ba nia an rasik. ⁸ Basa, ita moris karik, ita moris ba Na’i, no mate karik, ita mate ba Na’i; ne’e duni, ita moris ka mate, ita Na’i ninian. ⁹ Tan ne’e mak Kristu mate no moris hi’as fali, atu Nia bele sai ema mate no ema moris nia Na’i. ¹⁰ Ne’e duni, tan sa imi tesi lia ba imi nia maun alin sira? Imi, tan sa imi hanoin aat imi nia maun alin sira? Basa ita hotu sei hamriik iha Maromak futar oin no Nia sei tesi lia, ¹¹ basa hakerek nanis ona, “Nudar ha’u moris, Na’i dehan, ain-tur hot-hotu sei tuku tur mai ha’u, no nanal hot-hotu sei hahi Maromak.” ¹² Ne’e duni, ita ida-ida sei hatan kona ba nia an ba Maromak.

Hanoin ema kbiit laek

                ¹³ Ne’e duni, ita keta tesi lia ba malu, maibe hanoin hodi laran atu la bele tau fatuk sidi ka taka dalan ba ita nia maun alin. ¹⁴ Ha’u hatene no fiar lo-los iha Na’i Jesus katak la iha buat ruma nebe foer iha nia an rasik, maibe buat ne’e foer ba ema nebe hanoin katak nia foer. ¹⁵ Imi nia maun alin hetan susar tan buat nebe imi han karik, imi nia hahalok la tuir domin ona. Keta halo aat ba ema nebe tan nia Kristu mate tan deit buat nebe imi han. ¹⁶ Keta halo ema hateten aat imi nia diak, ¹⁷ basa Maromak nia reinu la’os deit kona ba aihan no buat atu hemu nian maibe kona ba laran los, dame no ksolok iha Espiritu Santu; ¹⁸ ema nebe serbi Kristu nune’e monu los ba Maromak nia laran no ema seluk fo laran ba nia. ¹⁹ Ne’e duni, ita buka buat nebe lori ba dame no foti ita nia maluk ida-ida. ²⁰ Tan deit aihan, keta halo aat Maromak nia hahalok. Los duni, buat hot-hotu mos, maibe la diak wainhira, hodi han, ema ida sai fatuk sidi ba ema seluk. ²¹ Diak wainhira imi la han naan ka la hemu tua ka la halo buat naran deit nebe halo maun-alin ida sidi. ²² Kaer metin fiar nebe iha imi nia laran iha Maromak futar oin; rahun diak ba ema nebe la lori todan ba nia an tan buat sira nebe nia hanoin mak diak. ²³ Maibe ema nebe la hatene lo-los sei hetan todan wainhira nia han, basa buat nebe nia halo la tuir fiar, basa buat naran deit nebe la tuir fiar sala.