15
Pasiensia no laran maka’as
1
Ita nebe maka’as sei iha pasiensia ba ema kbiit
laek nia sala, hodi la buka ita rasik nia ksolok. 2 Ita
ida-ida buka atu fo ksolok ba ita nia maluk, atu hetan diak, atu harii. 3
Basa Kristu la buka fo ksolok ba Nia an, maibe, nudar hakerek nanis, “Lia
hasara housi sira nebe hasara imi sei
monu ba Ha’u.” 4 Basa buat nebe uluk hakerek tiha
ona, hakerek duni atu hanorin ita, atu ho laran maka’as iha terus no ho ksolok
nebe mai housi Eskritura, ita bele
hetan esperansa. 5 Maromak pasiensia no ksolok nian
tulun imi moris hodi buka dame ho maluk sira, tuir Kristu Jesus, 6
atu ho neon ho laran ida deit, imi bele hahi ho lia ida deit, Maromak no
ita Na’i Jesus Kristu nia Aman.
Maromak nia laran metin no laran luak
7
Ne’e duni, simu malu nudar Kristu simu imi, ba
Maromak nia gloria. 8 Basa ha’u dehan katak Kristu
sai atan ba sira nebe simu tiha sirkunsisaun atu hatudu katak Maromak la bosok,
no atu hametin lia nebe Maromak hakotu ba bei-ala sira, 9
maibe atu gentiu sira bele hawelok Maromak tan nia laran luak. Nudar
hakerek tiha, “Ne’e duni, ha’u sei hahi Ita boot iha gentiu sira leet, no
hananu knananuk hahi nian ba Ita nia naran” 10 no
dala ida tan, “Haksolok ba, gentiu sira, ho Nia povu.” 11 Dala ida
tan, “Hahi Na’i ba, imi, gentiu sira no
povu sira hotu, hahi Nia ba.” no 12 dala ida tan
Isaias dehan: “Jesse nia abut sei mai,
nebe foti tiha atu ukun gentiu sira; iha Nia mak gentiu sira hetan esperansa.” 13
Maromak esperansa nian halo imi nakonu ho ksolok hotu no dame tamba imi
fiar, atu imi hetan esperansa wa’in liu tan housi kbiit Espiritu Santu nian.
Apostolu ba gentiu sira
14
Ha’u rasik hatene lo-los kona ba imi, maun-alin sira,
katak imi laran diak tebes duni, ho matenek hotu no hatene fo konseliu diak ba
malu. 15 Maibe ha’u hakerek ba imi ho lia maka’as uitoan kona buat ruma atu fo
hanoin imi, tan grasa nebe Maromak fo tiha ona mai ha’u, 16
atu sai Kristu Jesus nia atan ba gentiu sira hodi hala’o knaar am’lulik
nian kona ba Maromak nia evangeliu atu gentiu sira nia buat karan bele monu los
ba Maromak nia laran, no Espiritu Santu halulik nia. 17 Ne’e
duni, iha Kristu Jesus, ha’u bele hahi an kona ba buat nebe Maromak nian. 18
Basa ha’u la berani atu koalia kona ba buat seluk; ha’u koalia deit kona
ba buat nebe Kristu halo housi ha’u atu lori gentiu sira atu halo tuir ho
liafuan no hahalok, 19 tan kbiit sinal no milagre
sira, tan Maromak nia Espiritu nia kbiit, atu nune’e, housi Jerusalem to’o Iliriko ha’u haklaken tiha Kristu nia
evangeliu. 20 Nune’e ha’u hakarak haklaken
evangeliu la’os iha fatin nebe Kristu nia naran to’o ona, atu ha’u la bele
harii iha aliserse nebe ema seluk harii ona, 21 nudar
hakerek tiha, “Sira nebe ema seidauk koalia kona ba Nia sei hare; no sira nebe
seidauk rona kona ba Nia sei komprende.”
Paulo hakarak hare sira
22
Tan ne’e mak dala barak ha’u la bele la’o ba imi. 23
Maibe ohin ne’e, ha’u la bele halo tan buat ida iha fatin ne’e, no tamba
ba tinan barak ona ha’u hakarak ba hare imi, 24 ha’u
hein hare imi tuir dalan ba Espania; no wainhira ha’u haksolok ona ho imi ba
tempu ruma, imi sei hare ha’u la’o tuir dalan housi neba. 25
Maibe, oras ne’e, ha’u sei ba Jerusalem atu serbi santu sira iha neba. 26
Basa Masedonia no Akaia halibur osan atu fo ba santu sira nebe kiak iha
Jerusalem, 27 sira hakarak halo, no lo-los, sira
iha tusan ba sira, basa ema gentiu sira karik hetan parte iha bensa espiritual,
sira ten ke serbi sira mos kona ba bensa isin nian. 28 Tan
ne’e, wainhira ha’u halo tiha ida ne’e no saran tiha ho isin diak osan ne’e ba
sira, ha’u sei la’o housi imi ba Espania, 29 no
ha’u hatene katak, hodi ba hare imi, ha’u sei hetan Kristu nia bensa tomak
lo-los.
30 Ha’u
husu imi ho laran, maun alin sira, tan ita Na’i Jesus Kristu no tan domin
Espiritu Santu nian, atu imi ida deit ho ha’u iha ha’u nia haka’as an, housi
imi nia harohan ba Maromak ba ha’u nia diak, 31 atu
ha’u la bele monu ba ema ulun tos sira iha Judeia, no atu santu sira iha
Jerusalem simu ha’u nia serbisu, 32 atu ha’u bele
ba hare imi ho ksolok tan Maromak nia hakarak hodi hafoun ha’u an hamutuk ho
imi. 33 Maromak dame nian hela ho imi hotu. Amen.
|