16

Paulo hameno Febe ba sira

                ¹ Ha’u hameno Febe, ita nia alin feto, ba imi; nia mos diakonesa iha kreda iha Senkreas, ² atu imi simu nia nudar lo-los ba santu sira iha Na’i, hodi tulun nia kona ba buat naran deit nebe nia kuran  housi imi, basa nia tulun ona ema barak no mos ha’u.

Paulo hato’o ha’u nia kumprimentu ba

                ³ Hato’o ha’u nia kumprimentu ba Prisca no Aquila, ha’u nia maluk iha serbisu iha Kristu Jesus. ⁴ Sira hetan perigu boot tan ha’u nia moris; ba sira la’os ha’u deit fo agradese, maibe mos gentiu sira nia kreda hotu; ⁵ hato’o mos ha’u nia kumprimentu ba kreda nebe hela iha sira nia uma. Hato’o ha’u nia kumprimentu ba ha’u nia doben Epeneto; nia mak fuan uluk ba Kristu iha Asia. ⁶ Hato’o ha’u nia kumprimentu ba Maria, nebe serbisu maka’as ba imi. ⁷ Hato’o ha’u nia kumprimentu ba Andronico no Junia, ha’u nia parenti no maluk iha dadur laran; sira ema boot iha apostolu sira leet no sira iha ona Kristu molok ha’u. ⁸ Hato’o ha’u nia kumprimentu ba Ampliato, ha’u nia doben iha Na’i. ⁹ Hato’o ha’u nia kumprimentu ba Urbano, ami nia maluk iha serbisu iha Kristu, no ha’u nia doben Estaquis. ¹⁰ Hato’o ha’u nia kumprimentu ba Apeles, nebe Na’i fo laran iha Kristu. Hato’o ha’u nia kumprimentu ba sira hotu nebe iha familia Aristobulo nian. ¹¹ Hato’o ha’u nia kumprimentu ba ha’u nia parenti Herodiao. Hato’o ha’u nia kumprimentu ba sira hotu iha Na’i nebe iha familia Narciso nian. ¹² Hato’o ha’u nia kumprimentu ba sira hotu nebe serbisu iha Na’i, Trifena no Trifosa. Hato’o ha’u nia kumprimentu ba doben Persice, nebe serbisu maka’as iha Na’i. ¹³ Hato’o ha’u nia kumprimentu ba Rufo nebe Na’i fihir tiha, hamutuk ho nia inan no ha’u nian. ¹⁴ Kumprimenta Asincrico, Flegonte, Hermes, Patrobas, Hermas, no maun alin nebe hela ho sira. ¹⁵ Kumprimenta Filologo, Julia, Nereu ho nia alin feto, no Olimpas hamutuk ho santu sira hotu nebe hela ho sira. ¹⁶ Kumprimenta malu ho rein santu. Kristu nia kreda sira hotu kumprimenta imi.

Ketak malu dala ida tan

                ¹⁷ Ha’u husu imi, maun alin sira, matan moris kona ba sira nebe fahe no haketak imi, hodi hasouru hanorin nebe imi simu ona; hadook an  housi sira. ¹⁸ Basa ema sira ne’e la serbi ita Na’i Jesus Kristu, maibe serbi deit sira rasik nia hakarak; ho lia midar no hahi bosok, sira lohi ema los sira nia fuan. ¹⁹ Basa, maski ema hotu hatene katak imi halo tuir duni, tan ne’e mak ha’u haksolok tan imi, ha’u hakarak katak imi matenek kona ba buat nebe diak, no simples kona ba buat nebe aat; ²⁰ nune’e, Maromak dame nian sei harahun Satanas lalais iha imi ain nia okos. Ita Na’i Jesus nia grasa hela ho imi.

Kumprimentu  housi Korinto

                ²¹ Timoteo, ha’u nia maluk iha serbisu, kumprimenta imi; nune’e mos Lucio no Jasao no Sosipatro, ha’u nia parenti sira; no mos ha’u, ²² Tercio, nebe hakerek surat ne’e, kumprimenta imi iha Na’i. ²³ Gaio, nebe simu ha’u no kreda tomak iha nia uma, kumprimenta imi. Erasto, nebe tau matan ba osan sidade nian, no ami nia maun Quarto kumprimenta imi.

²⁴ (Ita Na’i Jesus nia grasa hela ho imi.)

Lia hahi nian ba Maromak

                ²⁵ Oras ne’e, ba Nia nebe bele fo kbiit ba imi tuir ha’u nia evangeliu no hodi haklaken Jesus Kristu, tan hatudu misteriu nebe subar hela ba otas barak, ²⁶ maibe ohin fo sai tiha ona  housi lia hakerek profeta sira nian no tuir Maromak rohan laek nia haruka, fo sai tiha ona ba nasaun hot-hotu atu lori ema atu halo tuir iha fiar, ²⁷ ba Maromak mesak no matenek,  housi Jesus Kristu, gloria tinan ba tinan. Amen.