I  KORINTO

1

                ¹ Paulo, nebe bolu tiha atu sai Kristu Jesus nia apostolu tan Maromak nia hakarak, no ami nia alin Sostenes, ² ba Maromak nia kreda iha Korinto, ba imi hotu nebe sai santu ona iha Kristu Jesus, nebe Maromak bolu atu sai santu, hamutuk ho sira hotu iha fatin hot-hotu nebe bolu ita Na’i Jesus Kristu nia naran; sira nia Na’i no ita nian ³ Kmanek no dame ba imi hotu, housi Maromak, ita Aman no housi Na’i Jesus Kristu.

                ⁴ Ha’u fo agradese nafatin ba Maromak tan imi, tan Maromak nia grasa nebe haraik tiha ba imi iha Kristu Jesus. ⁵ Iha Nia, imi sai riku iha buat hotu ho liafuan no matenek, ⁶ wainhira sasin ba Kristu sai metin iha imi. ⁷ Nune’e imi la kuran grasa espiritual ida wainhira imi hein dau-daun Ita Na’i Jesus Kristu mosu mai. ⁸ Nia sei halo imi laran metin to’o rohan no sala laek iha Na’i Jesus Kristu nia loron. ⁹ Maromak la bosok no Nia bolu imi atu sai nia Oan, Jesus Kristu, ita Na’i nia maluk.

Lia la tuir malu iha Kreda

                ¹⁰ Ha’u husu imi hodi Na’i Jesus Kristu nia naran, atu imi hotu neon ida deit kona ba buat nebe imi dehan; imi keta haketak malu, maibe buka sai neon ida deit ho hanoin ida deit no laran ida deit. ¹¹ Basa Cloe nia emar sira hato’o mai ha’u kona ba imi, maun alin sira, katak imi laran moras ba malu. ¹² Ha’u koalia hanesan ne’e tan imi ida-ida dehan:  “Ha’u Paulo nian,” ka “Ha’u Apolo nian,” ka “Ha’u Cefas nian,” ka “Ha’u Kristu nian.” ¹³ Kristu fahe an ka? Ema hedi Paulo ba krus tan imi? Eh hodi Paulo nia naran mak imi simu baptismu? ¹⁴ Ha’u agradese Maromak katak ha’u la sarani imi ida: ha’u sarani deit Crispo no Gaio, ¹⁵ atu ema la bele dehan katak imi simu baptismu hodi ha’u nia naran. ¹⁶ Ha’u sarani mos Estefanas nia uma-kain; maibe liu fali ida ne’e ha’u la hatene ha’u sarani ema seluk ka lae. ¹⁷ Basa Kristu la haruka ha’u atu sarani maibe atu haklaken evangeliu, no la’os ho matenek ema nia liafuan nian, nune’e Kristu nia krus la bele sai folin laek.

Krus halo ema hakfodak

                        ¹⁸ Lia menon housi krus mak buat nebe beik ba sira nebe atu lakon ona, maibe mai ita nebe hetan maksoin dau-daun, krus ne’e mak Maromak nia kbiit. ¹⁹ Basa hakerek nanis, “Ha’u sei halakon ema matenek nia matenek no ha’u sei tau ba sorin liafuan housi sira nebe hatene buat barak.” ²⁰ Ema matenek iha nebe? Eskriba iha nebe? Mundu ne’e nia lia na’in iha nebe? Maromak la halo mundu ne’e nia matenek sai tiha buat beik? ²¹ Basa iha Maromak nia matenek, mundu ne’e la hatene Maromak housi matenek, Maromak hakarak katak housi liafuan nebe ami haklaken hanesan buat beik, sira nebe fiar sei hetan maksoin. ²² Ema Judeu sira husu milagre, ema gregu sira buka matenek. ²³ Maibe ami haklaken Kristu nebe mate iha krus, nebe sai fatuk sidi ba ema Judeu sira no buat bulak ba ema gregu sira; ²⁴ maibe ba sira nebe Maromak bolu, ema Judeu ka gregu, Kristu mak Maromak nia kbiit no Maromak nia matenek. ²⁵ Basa, Maromak nia bulak matenek liu ema sira nian; Maromak nia kbiit laek maka’as liu ema sira nia kbiit.

Ema Korinto no Paulo

                ²⁶ Hanoin di-diak katak Maromak bolu imi ona, maun alin sira. Iha imi leet, ema matenek tuir ema nia hanoin la barak; ema kbiit na’in la barak, ema ran liurai la barak, ²⁷ maibe Maromak hili buat nebe ema hanoin katak bulak, atu halo bilan ema matenek sira; no Maromak hili buat nebe ema hanoin katak kbiit laek atu halo moe ida nebe maka’as; ²⁸ Maromak hili buat nebe kiak no ema hakribi iha mundu: sira nebe folin laek, atu halo lakon tiha sira nebe iha folin. ²⁹ Nune’e ema ida la bele foti an iha Maromak futar oin. ³⁰ Tan Nia mak imi hela iha Kristu Jesus, nebe sai Maromak nia matenek, no mos justisa, moris santu no maksoin mai ita. ³¹ Nune’e, nudar hakerek nanis, “Ema nebe hahi an, sei hahi an iha Na’i”.