2
Kristu nebe ema hedi ba krus
1
Maun alin sira, wainhira ha’u to’o ba imi hodi
haklaken Maromak nia misteriu, ha’u la mai ho lia sasin kmanek sira ka ho
matenek. 2 Basa ha’u deside atu la bele hatene buat
seluk iha imi leet; ha’u hatene deit Kristu Jesus no Nia nebe ema hedi iha
krus. 3 Wainhira ha’u iha imi leet,ha’u
kbiit laek, hodi tauk no nakdedar tebes, 4 no ha’u
koalia no haklaken, la’os hodi lia maka’as matenek nian, maibe hodi hatudu
espiritu no kbiit, 5 nune’e imi nia fiar bele
hamriik metin, la’os iha ema nia matenek maibe iha Maromak nia kbiit.
Matenek lo-los
6
Maibe ami hanorin matenek ida ba sira nebe sai ona
ema boot, nebe la’os matenek mundu ne’e nian, eh na’i ulun mundu ne’e nian nebe
ikus mai sei lakon. 7 Ami koalia kona ba Maromak
nia segredu no matenek nebe subar hela iha misteriu, nebe Maromak hanoin ona
houri uluk kedas ba ita nia gloria. 8 Mundu nia
ukun na’in sira la hatene matenek ne’e; sira hatene karik, sira la hedi Na’i
gloria nian ba krus. 9 Maibe, nudar hakerek nanis
ona, “Matan la hare; tilun la rona no ema nia hanoin la to’o buat nebe Maromak
hadia tiha ba sira nebe hadomi Nia. 10 Maromak
hatudu buat hirak ne’e hotu mai ita housi Espiritu.
Basa Espiritu koko buat
hot-hotu, to’o hatene mo-mos Maromak. 11 Iha ema
sira leet, se mak hatene buat nebe iha ema nia laran; ema ne’e nia espiritu
deit mak hatene buat nebe iha nia laran. Nune’e mos, ema ida la hatene Maromak
nia laran; Maromak nia Espiritu deit mak hatene. 12 Ita
la simu mundu nia espiritu maibe Espiritu nebe mai housi Maromak, atu ita bele
hatene lo-los presente nebe ita simu housi Maromak hodi la selu buat ida. 13
No ami hato’o buat sira ne’e, la’os ho liafuan nebe ema nia matenek
hanorin, maibe ho liafuan nebe Espiritu hanorin, hodi hato’o lialos espiritual
ho liafuan espiritu nian.
14 Ema
nebe la’os espiritual la simu Maromak nia Espiritu nia presente, basa ba nia,
buat ne’e mesa bulak, no nia la bele komprende nia basa nia bele hare deit ho
espiritu. 15 Maibe ema espiritual bele hare buat
hot-hotu no ema ida la bele tesi lia ba nia. 16 Basa,
“Se hatene tiha Na’i nia hanoin atu bele hanorin Nia?” Maibe ita iha Kristu nia
hanoin.
|