3

Sei labarik kiik

                ¹ Maibe, maun alin sira, ha’u la bele koalia ho imi nudar ema nebe espiritual ona, maibe nudar ema isin nian, nudar labarik kiik iha Kristu. ² Ha’u fo tiha susuben ba imi, la’os aihan tos, basa imi seidauk hadia an ba nia. Tebes duni, oras ne’e mos imi seidauk bele han nia, ³ basa imi sei ema isin nian. Basa wainhira sei iha laran moras no buka oin iha imi leet, imi la’os ema isin nian, hodi moris hanesan ema bai-bain? ⁴ Wainhira ema ida dehan, “Ha’u Paulo nian,” no ema seluk “Ha’u Apolo nian,” imi la’os ema bai-bain deit?

Maromak  nia emar

                ⁵ Apolo ne’e se? no Paulo ne’e se? Atan sira nebe tan sira imi hahu fiar, nudar Na’i foti ida-ida. ⁶ Ha’u kuda, Apolo rega, maibe Maromak mak halo moris. ⁷ Ne’e duni, ida nebe kuda eh ida nebe rega la folin ida; Maromak deit mak halo moris. ⁸ Ida nebe kuda no ida nebe rega hanesan deit, no ida-ida sei simu nia kolen tuir nia serbisu. ⁹ Basa ami maluk nudar Maromak nia serbisu na’in, imi Maromak nia to’os, Maromak nia uma andar.

                ¹⁰ Tuir grasa nebe Maromak fo mai ha’u, nudar badaen diak los ida, ha’u ke’e rai no tau nia aliserse, no ema seluk harii dau-daun iha nia leten. Maibe ida-ida ten ke hare di-diak oin sa nia harii iha nia leten, ¹¹ basa ema ida la bele tau aliserse seluk maibe ida nebe tau tiha ona; iha aliserse ida deit, katak Jesus Kristu. ¹² Ema ida harii karik iha aliserse ne’e nia leten ho osan mean, osan mutin, fatuk murak, ai, du’ut maran ka hare kain, ¹³ ema ida-ida nia serbisu sei mosu mo-mos, basa loron sei hatudu nia. Nia serbisu sei mosu ho ahi, no ahi rasik sei koko ida-ida nia serbisu nia folin. ¹⁴ Serbisu nebe harii iha aliserse ne’e nia leten metin karik, ema ne’e sei simu nia kolen. ¹⁵ Maibe ahi han nia serbisu karik, ema ne’e sei lakon buat ruma; maibe ema ne’e sei hetan maksoin, maibe hanesan liu housi ahi deit.

¹⁶ Imi la hatene katak imi Maromak uma orasaun nian no katak Maromak nia Espiritu horik iha imi? ¹⁷ Ema ida halo aat Maromak nia uma orasaun karik, Maromak sei halo aat ema ne’e, basa, Maromak nia uma orasaun, katak imi, santu. ¹⁸ Keta bosok imi an. Imi ruma hanoin karik katak nia matenek tuir mundu nia hanoin, ema ne’e buka atu sai bulak atu sai matenek. ¹⁹ Basa matenek mundu ne’e nian hanesan buat bulak iha Maromak futar oin; basa hakerek nanis ona: “Nia toman ema matenek sira iha sira nia lia bobar,”  ²⁰ no tan: “Na’i hatene katak ema matenek sira nia hanoin la folin buat ida.” ²¹ Ne’e duni, imi keta gaba an kona ba ema, basa buat hotu imi nian: ²² Paulo ka Apolo ka Cefas, ka mundu ka moris ka mate, ohin loron ka aban bainrua: buat hotu imi nian, no ²³ imi Kristu nian, no Kristu Maromak nian.