4

Kristu nia apostolu

¹ Imi ten ke hare ami nudar Kristu nia atan no ema nebe tau matan ba Maromak nia misteriu. ² Tebes duni; se mak tau matan ten ke sai ema nebe bele fiar. ³ Maibe mai ha’u, imi ka ema nia tribunal naran deit tesi lia mai ha’u, ne’e la halo buat ida; ha’u la tesi lia ba ha’u nia an rasik; ⁴ ha’u  laran la  hetan sala ida hasouru ha’u, maibe ne’e la dehan katak ha’u los ona; ida nebe tesi lia mai ha’u mak Na’i rasik. ⁵ Ne’e duni, keta tesi lia molok nia tempu lo-los; molok Na’i hiit an mai, basa Nia mak sei leno buat nebe subar iha nakukun laran no sei hatudu hanoin sira iha ema nia laran, no iha loron neba ema ida-ida sei simu lia hahi nian housi Maromak.

Paulo nia moris

                ⁶ Ha’u dehan mos sira ne’e ba ha’u nia an no ba Apolo ba imi nia diak, maun alin sira, atu imi bele hanorin an housi ami atu la bele ba liu fali buat nebe hakerek nanis, atu la iha ema ida housi imi leet nebe sei nakonu ho laran loko an kona ba ema ida liu fali ema seluk. ⁷ Se mak fo kmanek liu ba imi? Imi iha buat sa ida nebe imi la simu uluk? Maibe imi simu tiha karik, tansa imi loko an hanesan imi la simu nia? ⁸ Imi haksolok ona; imi sai riku ona; imi sai tiha liurai maski ami la iha! Tebes, ha’u hakarak katak imi sai liurai, atu ami mos bele ukun hamutuk ho imi.

                ⁹ Basa nudar ha’u hare, Maromak hatudu ami apostolu sira nudar ikus liu ema hot-hotu, hanesan ema nebe atu saran ona ba mate, basa ami sai tiha hanesan buat aat ida nebe mundu, anju no ema sira hotu bele hare. ¹⁰ Ami bulak tamba Kristu, maibe imi matenek iha Kristu; ami kbiit laek, maibe imi maka’as; ema hare diak imi, maibe ema hare aat ami. ¹¹ To’o oras ne’e kedas ami hamlaha no hamrook, hatais uitoan deit no ema trata aat ami, ami la’o ba la’o mai hanesan ema nebe uma la iha. ¹² No ami serbisu ho ami nia liman rasik. Wainhira ema hasara ami, ami hateten diak ba sira; wainhira ema fo terus, ami tahan deit; ¹³ wainhira ema konta ami nia vida, ami hatan ho laran kmaus. Ami sai tiha hanesan buat foer mundu ne’e nian, ema hotu nia foer to’o oras ne’e.

                ¹⁴ Ha’u hakerek ida ne’e ba imi la’os atu hamoe imi, maibe atu hanorin imi nudar ha’u nia oan doben sira. ¹⁵ Basa maski imi iha matadalan barak ba Kristu, imi nia aman la barak, basa ha’u sai tiha imi nia aman iha Kristu Jesus housi evangeliu. ¹⁶ Ne’e duni, ha’u husu imi, halo tuir ha’u nia moris ba. ¹⁷ Tan ne’e ha’u haruka Timoteo ba imi; nia ha’u nia oan doben nebe laran metin iha Na’i; nia sei halo imi hanoin hetan ha’u nia dalan iha Kristu nudar ha’u hanorin sira iha fatin hotu iha Kreda ida-ida.

                                      ¹⁸ Ema balun hahu foti an maka’as ona, hanesan ha’u la ba hasouru imi. ¹⁹ Maibe Na’i hakarak karik, la kleur ha’u sei to’o ba imi, no ha’u sei hare lo-los la’os ema loko an sira ne’e nia liafuan maibe sira nia kbiit. ²⁰ Basa Maromak nia reinu la’os ho liafuan maibe ho kbiit. ²¹ Imi hakarak sa? Ha’u sei to’o ba imi ho fafulu, ka ho domin no laran kmaus?