6

Istori malu iha gentiu sira oin

                ¹ Wainhira imi ida iha buat ruma hasouru maun alin ruma, oin sa imi berani lori nia ba tribunal nebe ema la los nian, la’os iha tribunal santu sira nian? ² Imi la hatene katak santu sira mak sei tesi lia ba mundu tomak? Imi sei tesi lia ba mundu karik, imi la to’o atu tesi lia iha tribunal nebe kiik liu? ³ Imi la hatene katak ita sei tesi lia ba anju sira? Ne’e duni, tansa ita la bele tesi lia kona ba buat nebe moris ne’e nian? ⁴ Ne’e duni, imi iha buat ruma karik, tansa imi lori sira ne’e ba juis nebe ema hare aat liu iha kreda? ⁵ Ha’u dehan ne’e atu hamoe imi. Imi la iha ema iha imi leet nebe matenek atu bele tesi lia kona ba buat ruma iha maun alin sira leet? ⁶ Maibe maun ba hasouru alin iha tribunal, no tribunal ne’e gentiu sira nian?

                ⁷ Katak imi hasouru malu iha tribunal la diak ba imi. Tansa la tahan buat aat? Tansa la husik ema lohi imi? ⁸ Maibe, imi rasik mak halo aat no lohi ema, no imi halo ida ne’e ba imi nia maun alin rasik. ⁹ Imi la hatene katak ema aat sei la simu Maromak nia reinu nudar liman rohan? Keta husik ema bosok imi: sira nebe halo sala foer ho fetoran, ka adora lulik, ka halo sala foer ho kaben na’in, ka halo sala foer ho maluk mane ka maluk feto, ka ¹⁰ na’okten, ka karakten, ka lanuten, ka sira nebe konta ema nia vida, ka tama uma atu na’ok sei la simu Maromak nia reinu nudar liman rohan. ¹¹ Uluk, imi balun hanesan ne’e; maibe ohin imi fase mos ona, imi sai santu ona, imi sai ona ema los iha Na’i Jesus Kristu nia naran no iha Maromak nia Espiritu.

Sala foer

                ¹² “Ba ha’u, buat hotu tuir ukunfuan,” maibe la’os buat hotu mak diak. “Ba ha’u, buat hotu tuir ukunfuan,” maibe ha’u sei la husik buat ruma halo ha’u sai atan. ¹³ “Aihan ba kabun no kabun ba aihan,” maibe Maromak sei halakon buat rua ne’e. Ita nia isin la’os ba sala maibe ba Na’i, no Na’i ba isin. ¹⁴ Maromak halo Na’i moris hi’as no sei halo mos ita moris hi’as ho nia kbiit.                        

                ¹⁵ Imi la hatene katak imi nia isin mak Kristu nia liman ain? Ne’e duni, ha’u sei hola Kristu nia liman ain no halo nia sai sala foer na’in nia liman ain? La iha liu! ¹⁶ Imi la hatene katak ema nebe hamutuk ho sala foer na’in sai isin ida deit ho nia? Basa hakerek nanis ona, “sira na’in rua sei sai isin ida deit.” ¹⁷ Maibe ema nebe hamutuk ona ho Na’i sai espiritu ida deit ho Nia. ¹⁸ Hadook an housi sala foer! Sala seluk nebe ema halo la’os iha isin nia laran, maibe ema nebe halo sala foer halo sala hasouru nia isin rasik. ¹⁹ Imi la hatene katak imi nia isin Espiritu Santu nia templu, katak Espiritu nebe hela iha imi laran, Espiritu nebe imi simu housi Maromak? Imi la’os imi an nian, ²⁰ basa Na’i sosa ona imi ho folin boot. Ne’e duni, imi hahi Maromak iha imi nia isin ba!