9

Paulo nudar apostolu ida

                ¹ Ha’u la’os livre? Ha’u la’os apostolu ida? Ha’u la hare tiha Jesus, ita Na’i? Imi la’os ha’u nia serbisu nia fuan iha Na’i? ² Maski ha’u la’os apostolu ba ema seluk, tebes duni, ha’u apostolu ba imi, basa imi mak ha’u nia apostoladu nia marka iha Na’i.

                ³ Ne’e mak ha’u nia liafuan hasouru sira nebe tesi lia mai ha’u: ⁴ Ita la iha direitu atu han no hemu? ⁵ Ita la iha direitu atu hola feto, nudar apostolu sira seluk no Na’i nia maun alin sira no Cefas halo? ⁶ Ka ha’u ho Barnabe deit mak la bele serbisu hodi buka moris? ⁷ Se mak serbi nudar soldadu ida hodi selu nia an? Se mak kuda to’os uvas nian la hodi han nia fuan? Ke se mak hein bibi hodi la hemu susuben housi bibi sira? ⁸ Ha’u dehan buat hirak ne’e tan deit ema nia kbiit? Ukunfuan la koalia hanesan ne’e? ⁹ Hakerek tiha iha Moises nia ukunfuan, “Imi la bele taka karau vaka nia ibun wainhira nia sama hare.” Maromak hanoin deit karau vaka ka? ¹⁰ Nia la koalia lo-los ba ita nia diak? Hakerek tiha duni ba ita nia diak, basa ema nebe fila rai, fila rai iha esperansa; no ema nebe sama hare, sama hare iha esperansa  atu simu nia kolen. ¹¹ Ami kari fini espiritu nian karik iha imi leet, sei sai resin liu wainhira ami ko’a buat material housi imi? ¹² Ema seluk karik hein duni buat ne’e housi imi, ami la bele hein liu tan?

Tansa Paulo la hein nia kolen

                Maibe ami la usa ami nia direitu. Lo-los, ami tahan buat hotu atu ami la bele taka dalan ba Kristu nia evangeliu. ¹³ Imi la hatene katak sira nebe serbisu iha templu han buat nebe templu nian, no sira nebe serbisu iha altar hetan sira nia kolen housi buat karan sakrifisiu nian? ¹⁴ Nune’e mos, Na’i haruka atu sira nebe haklaken evangeliu moris mos housi evangeliu.

                ¹⁵ Maibe ha’u la usa ha’u nia direitu, no ha’u la hakerek ne’e atu bele hetan sasan ruma. Ha’u hakarak mate liu fali hare ema ida halakon ha’u nia direitu atu  gaba an. ¹⁶ Basa ha’u haklaken evangeliu karik, ne’e la  atu ha’u bele gaba an, basa ha’u simu knaar ida, no ha’u la haklaken karik evangeliu fo direitu  mai ha’u atu gaba an, basa knaar ida ne’e saran tiha mai ha’u hodi obriga; no ha’u la haklaken evangeliu karik, susar boot mai ha’u! ¹⁷ Ha’u haklaken karik ho laran ksolok, ha’u iha kolen; ho laran todan karik, ha’u simu tiha knaar atu halo. ¹⁸ Ne’e duni, ha’u nia kolen ida nebe? Katak wainhira ha’u haklaken, ha’u saran evangeliu hodi la hein ema atu selu, atu ha’u la bele usa ha’u nia direitu iha evangeliu.

Buat hotu ba ema hotu

                ¹⁹ Maski ha’u ukun rasik an kona ba buat hotu, ha’u halo tiha ha’u nia an atu sai atan ba ema hotu atu bele manan ema barak liu. ²⁰ Ba ema Judeu sira ha’u halo an hanesan ema Judeu ida atu bele manan ema Judeu sira. Ba sira nebe iha ukunfuan nia ukun, ha’u halo tiha ha’u an nudar ema nebe iha ukunfuan nia ukun, maski  ha’u rasik la iha ukunfuan nia ukun, atu manan sira nebe iha ukunfuan nia ukun. ²¹ Ba sira nebe la hela iha ukunfuan nia ukun,  ha’u sai hanesan ema nebe la hela iha ukunfuan nia ukun, maski ha’u hela la iha Maromak nia ukunfuan nia liur, maibe iha Kristu nia ukunfuan nia ukun atu manan sira nebe la hela iha ukunfuan nia ukun. ²² Ba sira nebe kbiit laek, ha’u halo ha’u an kbiit laek, atu manan sira nebe kbiit laek. Ha’u sai tiha buat hotu ba ema hotu, atu bele manan balun. ²³ Buat hirak ne’e hotu ha’u halo tan evangeliu, atu ha’u mos bele hetan liman rohan iha nia.

                ²⁴ Imi la hatene katak sira nebe halai iha estadiu halai atu manan, maibe ida deit mak manan  nia kolen? Imi halai ba atu manan. ²⁵ Halimar na’in ida-ida buka ukun an iha buat hotu. Sira halo hotu ne’e atu manan koroa ida nebe aban sei mohu, maibe ita sei manan buat nebe sei la mohu. ²⁶ Nune’e ha’u la halai hodi la hatene atu ba nebe; ha’u la halo funu hanesan tuku deit lalatak. ²⁷ Lae! Ha’u ukun ha’u nia isin no hadia nia, tan ha’u tauk katak, wainhira ha’u haklaken tiha ba ema seluk, ha’u rasik lakon.