12
Laran ida deit no kmanek oi-oin
1
Oras ne’e, kona ba kmanek espiritu nian, ha’u
lakohi imi beik. 2 Imi hatene oin sa, wainhira imi
sei gentiu, ema lori imi bei-beik ba lulik sira nebe la bele koalia. 3
Ne’e duni, ha’u dehan ba imi katak la iha ema nebe koalia housi Maromak
nia espiritu dehan, “Malisan ba Jesus.” no ema ida la bele dehan, “Jesus mak
Na’i;” housi Espiritu Santu deit mak ema bele dehan nune’e.
4 Iha
kmanek espiritu nian oi-oin maibe Espiritu ida deit; 5 iha
knaar oi-oin, maibe Na’i ida deit, 6 iha hahalok
oi-oin, maibe Maromak ida deit nebe halo buat hotu iha ema hot-hotu. 7
Ema ida-ida simu Espiritu nia kmanek atu bele halo diak ruma. 8
Housi Espiritu, ema ida simu matenek, ema seluk simu hatene tuir Espiritu
ne’e; 9 ema seluk simu fiar tuir mos Espiritu ne’e,
ema seluk simu kmanek atu fo isin diak housi Espiritu ida deit; 10
ema seluk tan simu hahalok boot; ida seluk hato’o Maromak nia liafuan,
ema seluk hatene lo-los espiritu sira, ida seluk lia oi-oin; ida seluk fo
hatene lia oi-oin ne’e katak sa. 11 Maibe Espiritu
ida deit mak halo hot-hotu ne’e, hodi haraik sira ida-ida ba ema ida-ida tuir
nia hakarak.
Isin ida deit, liman ain barak
12
Nudar isin lolon ida deit, maibe liman ain barak,
no liman ain ida-ida, maski barak halo isin lolon ida deit, nune’e mos Kristu. 13
Basa iha Espiritu ida deit ita hotu simu baptismu ba isin lolon ida deit,
biar ema Judeu ka ema gregu, atan ka la atan, no ita hotu bele hemu housi
Espiritu ida deit. 14 Basa, isin lolon la’os liman
ain ida deit, maibe barak. 15 Ain dehan karik, “Tan
ha’u la’os liman, ha’u la’os isin lolon nian,” la’os tan ne’e mak nia la’os
isin lolon nian. 16 Ka tilun dehan karik, “Tan ha’u
la’os matan ida, ha’u la’os isin lolon nian,” la’os tan ne’e mak nia la’os isin
lolon nian. 17 Isin lolon tomak matan karik, bele
rona housi nebe? Isin lolon tomak tilun karik, bele horon housi nebe? 18
Maibe nune’e ho nune’e, Maromak tau liman ain sira ida-ida iha isin lolon
nudar Nia hakarak. 19 Sira hotu liman ain ida deit
karik, isin lolon tomak iha nebe? 20 Maibe, nune’e
ho nune’e, iha liman ain barak, maibe isin lolon ida deit. 21
Matan la bele dehan ba liman, “Ha’u la kuran o,” no mos ulun la bele
dehan ba ain, “Ha’u la kuran imi.” 22 Tebes duni,
isin lolon nia liman ain nebe kbiit la dun iha mak sira nebe folin liu, 23
no sira nebe ita hanoin katak kmanek la dun iha, iha hale’u ho kmanek
boot liu, no sira nebe la dun furak, ita hafurak liu tan, 24
no sira nebe furak ona la kuran ne’e. Maibe Maromak halo isin lolon
nune’e atu fo kmanek liu ba ida nebe kmanek la iha, 25 atu
la bele fahe malu iha isin lolon, maibe atu liman ain sira bele hanoin malu. 26
Liman ain ida terus karik, liman ain hotu terus hamutuk ho nia; liman ain
ida simu kmanek karik, liman ain hotu haksolok ho nia.
Iha Kristu
27
Imi Kristu nia isin lolon, no imi ida-ida Kristu
nia liman ain.28 Maromak tau ema iha kreda atu sai,
uluk knanain apostolu sira, hafoin profeta sira, tuir mai mestre sira; ikus
mai, sira nebe iha kbiit atu halo hahalok kmanek sira; tuir fali mak sira nebe
iha kbiit atu fo isin diak ba moras, sira nebe atu fo tulun, sira nebe atu
ukun, sira nebe atu koalia lia oi-oin. 29 Sira ne’e
hotu apostolu? Sira ne’e hotu profeta? Sira hotu mestre? Sira hotu halo
milagre? 30 Sira hotu iha kbiit atu fo isin diak ba
ema moras sira? Sira hotu koalia lia oi-oin? Sira hotu bele hatene lia oi-oin
ne’e katak sa? 31 Buka mana-manas kmanek espiritu
nian nebe boot liu. Maibe ha’u sei hatudu ba imi dalan diak liu tan.
|