13

Domin

                ¹ Ha’u koalia ho ema nia lia no anju nia lia karik, maibe ha’u la iha domin, ha’u mak gon ida nebe tarutu ka sinu nebe lia. ² No ha’u bele halo profesia karik hodi hatene lo-los misteriu sira hotu no matenek tomak, ha’u iha fiar nebe book foho sira karik, maibe la iha domin, ha’u la folin buat ida. ³ Ha’u fahe karik sasan hotu nebe ha’u iha, no saran ha’u nia isin lolon atu ha’u bele gaba an, maibe la iha domin, ha’u la manan buat ida.

                ⁴ Domin pasiensia, domin laran diak. Domin la laran moras, domin la loko an; domin la buka oin; ⁵ domin la book aat ema, domin la buka nia rasik nia diak, domin la hirus lalais, nia la hanoin resin buat aat nebe nia simu; ⁶ nia la haksolok wainhira ema halo aat maibe haksolok iha lialos. ⁷ Domin tahan terus hotu, fiar buat hotu, iha esperansa iha buat hotu, lori todan hotu.

                ⁸ Domin hela nafatin. Kona ba profesia sira, sira hotu ne’e sei lakon; kona ba lia oi-oin, sira hotu sei lakon, kona ba matenek, ne’e mos sei mohu. ⁹ Basa ita hatene maibe la lo-los, no ita halo profesia maibe la tomak, ¹⁰ maibe wainhira buat lo-los sei mosu mai, buat nebe la lo-los sei mohu lakon. ¹¹ Wainhira ha’u labarik, ha’u koalia hanesan labarik, hanoin hanesan labarik, book an hanesan labarik; wainhira ha’u sai ona ema boot, ha’u husik ona buat nebe labarik nian. ¹² Oras ne’e, ita hare la mos, hanesan deit iha espeliu ida, maibe iha tempu neba, ita sei hare oin ba oin. Oras ne’e ha’u hatene balun deit; iha tempu neba, ha’u sei hatene lo-los tomak nudar mos Maromak hatene mo-mos ha’u. ¹³ Ne’e duni, fiar, esperansa no domin sei hela, maibe ida nebe boot liu mak domin.