14

Profesia diak liu fali lia oi-oin

                ¹ Imi buka domin, no haka’as an atu manan kmanek sira nebe espiritu nian, maibe liu-liu atu imi bele halo profesia. ² Basa ema nebe koalia lia oi-oin, la koalia ba ema sira maibe ba Maromak, basa ema ida la rona; nia hato’o misteriu sira iha espiritu. ³ Maibe ema nebe halo profesia koalia ba ema sira, atu harii sira, fo aten berani no ksolok ba sira. ⁴ Ema nebe koalia lia oi-oin harii nia an rasik, maibe ema nebe halo profesia harii kreda. ⁵ Oras ne’e, ha’u hakarak katak imi hotu koalia lia oi-oin, maibe ha’u hakarak liu katak imi halo profesia. Ida nebe halo profesia boot liu fali ida nebe koalia lia oi-oin. Maibe nia fo hatene mos karik lia ne’e katak sa, diak liu atu nia bele harii kreda.

                ⁶ Ne’e duni, maun alin sira, ha’u to’o ba imi karik hodi koalia lia oi-oin, ha’u halo diak sa ba imi wainhira ha’u la koalia ba imi atu hatudu buat ruma ka fo hatene buat ruma ka halo profesia ka fo sai lia menon ruma? ⁷ Nune’e mos, buat nebe la moris nebe lia, hanesan flauta ka arpa la lia mo-mos, oin sa ema bele rona musika iha flauta ka arpa? ⁸ No trombeta ida la lia mo-mos karik, se mak hadia an atu ba funu? ⁹ Nune’e mos, imi tan imi koalia lia oi-oin karik, la hato’o lia fuan nebe ema bele rona, oin sa ema bele hatene buat nebe imi hato’o? Basa imi sei koalia deit ba anin. ¹⁰ Iha duni lia barak iha mundu, no lia sira ne’e ida-ida iha folin, ¹¹ maibe ha’u la hatene karik lia ida katak sa, ha’u sei sai ema malae ida ba ida nebe koalia nia, no ida nebe koalia nia sei sai ema malae ida mai ha’u. ¹² Nune’e mos ho imi, tan imi buka mana-manas atu hetan espiritu sira, buka mana-manas atu harii kreda. ¹³ Ne’e duni, ida nebe koalia lia oi-oin sei harohan atu nia bele fo sai lia ne’e katak sa, ¹⁴ basa ha’u harohan ho lia oi-oin karik, ha’u nia espiritu harohan duni, maibe ha’u nia hanoin la fo fuan ruma. ¹⁵ Ne’e duni, ha’u sei halo sa? Ha’u sei harohan ho espiritu, maibe ha’u sei harohan mos ho ha’u nia hanoin. Ha’u sei hananu knananuk hahi nian ho espiritu, maibe ha’u sei hananu knananuk hahi nian mos ho ha’u nia hanoin. ¹⁶ Lae karik, imi hateten lia rahun diak nian karik ho espiritu, oin sa ema ida nebe seidauk simu matenek bele dehan “Amen” ba imi nia lia agradese, wainhira nia la hatene buat nebe imi dehan? ¹⁷ Basa imi bele fo agradese di-diak, maibe ida seluk la harii an. ¹⁸ Ha’u fo agradese ba Maromak katak ha’u koalia lia oi-oin liu fali imi hotu, ¹⁹ maibe iha kreda laran ha’u hakarak liu koalia liafuan lima ho ha’u nia hanoin atu hanorin ema seluk, liu fali koalia liafuan rihun sanulu ho lia oi-oin.

Kmanek sira ne’e nia knaar

                ²⁰ Maun alin sira, keta sai hanesan labarik iha imi nia hanoin. Sai hanesan labarik ba kona ba hahalok aat sira, maibe sai ema boot ba iha imi nia hanoin. ²¹ Hakerek nanis iha ukunfuan: “Housi ema nebe koalia lia oi-oin no housi ema malae nia ibun, ha’u sei koalia ba povu ne’e, no maski nune’e mos sira sei la rona ha’u, Na’i dehan.” ²² Nune’e, lia oi-oin la’os sinal ba sira nebe fiar maibe ba sira nebe la fiar, maibe profesia la’os ba sira nebe la fiar maibe ba sira nebe fiar.

                ²³ Ne’e duni, wainhira kreda tomak halibur an iha fatin ida deit no ema ida-ida koalia lia oi-oin, no ema nebe seidauk hatene ka ema nebe seidauk fiar tama mai karik, sira ne’e sei la dehan katak imi bulak? ²⁴ Maibe ema ida-ida halo profesia, no ema nebe seidauk fiar ka seidauk hatene tama mai karik, nia sei fiar ema hotu no ema ida-ida sei tesi lia ba nia, ²⁵ no buat nebe subar hela iha nia laran sei fo sai, no nia sei monu ain no adora Maromak hodi dehan, “Tebes duni, Maromak iha imi  leet.”

Lia menon ruma

                ²⁶ Nune’e, maun alin sira sei halo sa? Wainhira imi halibur an hamutuk, ema ida iha salmu, ida seluk iha hanorin, ka buat ruma atu fo sai, ka lia ruma, ka fo sai liafuan katak sa. Halo buat hotu ne’e atu harii. ²⁷ Ema ida koalia lia oi-oin karik, to’o lia rua ka barak liu, tolu deit; no lia ida-ida tuir ida seluk,  no ema ida sei fo sai lia hirak ne’e katak sa. ²⁸ La iha atu fo sai lia ne’e katak sa karik, diak liu ema nebe koalia lia oi-oin nonok deit iha kreda laran, no koalia lia ne’e ba nia an deit no ba Maromak.

                ²⁹ Profeta rua ka tolu bele koalia, no sira seluk hanoin buat nebe sira dehan. ³⁰ Maibe Maromak hatudu buat ruma karik ba ema ida nebe tur iha neba, ida uluk sei nonok. ³¹ Basa imi hotu bele halo profesia ida-ida, atu ema hotu bele hanorin an no bele hetan aten berani. ³² Tebes duni, espiritu profeta sira nian hela iha profeta sira nia ukun, ³³ basa Maromak la’os Maromak rungu-ranga nian maibe Maromak dame nian.

                Nudar iha santu sira nia kreda hotu, ³⁴ feto sira sei nonok iha kreda laran, basa bandu ba sira atu koalia, maibe sira sei haraik an, nudar ukunfuan dehan. ³⁵ Maibe sira hakarak hatene buat ruma karik, sira sei husu sira nia laen iha uma. Basa sei sai la los ba feto sira atu koalia iha kreda laran. ³⁶ Sa ida? Maromak futar lia mai housi imi? Ka lia ne’e mosu ba deit imi mesa-mesak?

                ³⁷ Ema ida hanoin karik katak nia profeta ida, ka ema nebe espiritu nian, nia sei simu katak buat nebe ha’u hakerek ba imi mak ukunfuan housi Na’i. ³⁸ Ema ida la simu ne’e karik, ita mos la simu nia. ³⁹ Ne’e duni, maun alin sira, buka mana-manas atu halo profesia, no keta bandu ema atu koalia lia oi-oin, ⁴⁰ maibe buat hotu sei halo lo-los no mo-mos.