15
Kristu nia moris hi’as
1
Oras ne’e ha’u halo imi hanoin fali, maun alin
sira, evangeliu nebe ha’u haklaken tiha ba imi, nebe imi simu tiha ona no iha
nebe imi hamriik metin. 2 Housi nia imi hetan
maksoin, imi laran metin karik ba liafuan nebe ha’u haklaken tiha ba imi, ka
imi fiar leet deit karik. 3 Basa ha’u saran ba imi
nudar buat nebe folin boot liu buat hot-hotu nebe ha’u mos simu tiha: katak
Kristu mate tan ita nia sala sira tuir Eskritura; 4 katak
ema hakoi Nia; katak liu tiha loron tolu, Nia moris hi’as tuir Eskritura; 5
katak Nia mosu ba Cefas, tuir mai ba sira sanulu resin rua. 6
Ne’e hotu tiha, Nia mosu ba maun alin na’in atus lima resin ida tempu ida
deit, no sira ne’e barak sei moris dau-daun, maski balun toba tiha. 7
Tuir mai, Nia mosu ba Tiago, hafoin ba apostolu sira hotu. 8
Ikus mai, hanesan ba ema nebe moris mai iha tempu la los, Nia mosu mai
ha’u. 9 Basa iha apostolu sira leet, ha’u mak kiik
liu, la soi atu hanaran an apostolu, basa ha’u fo terus ba Maromak nia kreda.
10 Maibe, tan Maromak nia grasa, ha’u sai buat nebe ha’u
dau-daun, no Na’i nia grasa iha ha’u la leet deit. Tebes duni, ha’u serbisu
maka’as liu fali sira hotu; lo-los la’os ha’u, maibe Maromak nia grasa nebe iha
ha’u laran. 11 Ne’e duni, biar ha’u ka sira, nune’e
ami haklaken no nune’e imi fiar.
Ema mate sei moris hi’as
12
Maibe ema haklaken Kristu nudar ida nebe moris
hi’as ona housi mate, oin sa imi balun dehan katak ema mate sei la moris hi’as?
13 Ema mate la moris hi’as karik, ne’e duni Kristu
mos la moris hi’as. 14 No Kristu la moris hi’as
karik, ne’e duni lia nebe ami haklaken mos folin laek; imi nia fiar mos folin
laek. 15 Ne’e duni, ami sai sasin bosok ba Maromak,
basa ami sasin kona ba Maromak katak Nia halo Kristu moris hi’as, nebe lo-los
Nia la halo moris hi’as, tebes duni
karik katak mate sira la moris hi’as. 16 Basa mate
sira la moris hi’as karik, ne’e katak Kristu mos la moris hi’as. 17
Kristu la moris hi’as karik, imi nia fiar leet deit; imi sei hela iha imi
nia sala. 18 No sira nebe toba tiha iha Kristu
lakon tiha hotu. 19 Ita fiar iha Kristu ba moris
ida ne’e deit karik, ita mak povu
kasihan liu ema hot-hotu.
Kristu nudar fuan uluk nian
20
Maibe lo-los, Kristu moris hi’as ona housi mate;
Nia mak fuan uluk housi sira hotu nebe toba tiha ona. 21 Basa
nudar mate mosu mai housi ema ida, moris hi’as housi mate mos mosu mai housi
ema ida. 22 Nudar iha Adao ema hotu mate, nune’e
mos iha Kristu ema hotu sei hetan moris, 23 maibe
ida-ida tu-tuir malu lo-los: uluk knanain Kristu nudar fuan uluk nian, tuir
mai, wainhira Nia hiit an mai, sira hotu nebe Kristu nian; 24
hafoin rohan sei mosu mai, wainhira Nia saran reinu ba Aman Maromak,
wainhira Nia harahun tiha ukun na’in sira no kbiit na’in sira no maka’as sira, 25
basa Nia sei ukun to’o tempu nebe Nia tau tiha nia funubalun sira hotu
iha nia ain nia okos. 26 Funubalun ikus nebe Nia
sei harahun mak mate, 27 basa “Maromak tau buat
hotu iha nia ain nia okos.” Maibe wainhira dehan “Nia ukun tiha buat hotu,”
ne’e katak la sura Ida nebe tau buat hotu iha nia ukun. 28
Wainhira buat hotu iha ona nia ukun, hafoin mak Oan Mane rasik sei haraik
an mos ba Ida nebe tau hotu iha nia ukun, atu nune’e Maromak bele sai buat hotu
ba ema hotu.
29 La
nune’e karik, povu bele manan sa hodi simu baptismu ba mate? Mate sira la moris
hi’as karik, tansa sira simu baptismu ba sira? 30 Tansa
ha’u iha perigu nafatin? 31 Ha’u jura ne’e housi
ha’u nia laran gaba an tan imi nebe iha ha’u iha Na’i Jesus Kristu katak ha’u
mate loron loron. 32 Ha’u manan sa, tuir ema nia
hanoin, wainhira ha’u halo funu hasouru balada ida iha Efeso? Mate sira la
moris hi’as karik; “Ita han no hemu ba, basa aban ita sei mate.” 33
Keta husik ema lohi imi: “Hela hamutuk ho ema laran aat sira halakon
lisan diak.” 34 Matan mos ba no keta sala tan. Basa
imi balun la hatene Maromak; ha’u dehan ne’e atu hamoe imi.
Mate sira sei moris hi’as oin sa
35
Maibe ema ida sei dehan, “Oin sa mate sira sei
moris hi’as? Ho isin oin sa los sira sei fila mai?” 36 Imi
beik! Buat nebe imi kari la mate karik, nia sei la moris. 37
No buat nebe imi kari la’os isin nebe sei mai, maibe trigu nia fini deit
karik, ka buat seluk tan; 38 maibe Maromak fo ba
nia isin nudar Nia hakarak, no ba fini ida-ida nia isin rasik. 39
Isin hotu la hanesan, maibe iha isin ida ba ema, isin oin seluk ba balada
sira, isin oin seluk ba manu sira, no oin seluk ba ikan sira. 40
Iha isin lalehan nian no isin rai ne’e nian, maibe gloria isin lalehan
nian oin seluk, gloria isin rai ne’e nian oin seluk tan. 41
Loron nia naroman oin seluk, fulan nia naroman oin seluk, fitun sira nia
naroman oin seluk tan. Basa fitun ida nia naroman oin seluk housi fitun seluk
nia naroman.
42 Nune’e
mos wainhira mate sira moris hi’as. Ita kari buat nebe bele dodok; nia moris
hi’as la bele dodok. 43 Ita kari buat nebe la soi
atu hahi; nia moris hi’as kmanek liu; ita kari buat nebe kbiit laek; nia moris
hi’as kbiit wa’in. 44 Ita kari isin nebe mundu ne’e
nian, nia moris hi’as isin espiritu nian. Iha isin mundu ne’e nian karik, iha
mos isin espiritu nian.
45 Hakerek
nanis ona, “Ema uluk, Adao, sai buat nebe moris;” Adao ikus sai fali espiritu
nebe fo moris. 46 Maibe buat nebe espiritu nian
la’os uluk; maibe uluk mundu ne’e nian, tuir mai espiritu nian. 47
Ema uluk housi mundu, ema rai rahun nian; ema ikus housi lalehan. 48
Nudar ida rai rahun nian, nune’e
mos mak ema sira nebe rai rahun nian; no nudar ida nebe lalehan nian, nune’e
mos mak ema sira nebe lalehan nian. 49 Nudar ita
lori tiha ilas ema rai rahun nian, ita mos sei lori iha ilas ema lalehan nian.
Mate lakon nia
kbiit
50
Ha’u haklaken ne’e ba imi, maun alin sira: isin no
ran la bele simu nudar liman rohan Maromak nia reinu. Buat nebe bele dodok la
bele simu buat nebe la bele dodok. 51 Hare ba, ha’u
fo sai ba imi misteriu ida. La’os ita hotu sei toba dukur, maibe ita hotu sei
nakfila an, 52 hanesan wainhira matan taka no loke
fali, wainhira trombeta ikus sei lia. Basa trombeta sei lia, no mate sira sei
moris hi’as la bele dodok ona, no ita sei nakfila an. 53 Basa
buat nebe bele dodok sei hafutar an ho buat nebe la bele dodok, no buat nebe
bele mate ho buat nebe la bele mate. 54 No wainhira
ida nebe bele dodok hafutar an ona ho buat nebe la bele dodok no ida ne’e nebe
bele mate ho buat nebe la bele mate, iha tempu neba lia nebe hakerek nanis sei
mosu mai: “Mate mohu lakon ona iha vitoria laran.” 55 “Ou
mate, o manan iha nebe? O mate, o nia
ai-tarak iha nebe?” 56 Mate nia ai-tarak mak sala,
no sala nia kbiit mak ukunfuan. 57 Maibe, obrigadu
ba Maromak nebe halo ita manan housi ita Na’i Jesus Kristu. 58
Ne’e duni, maun alin doben sira, laran metin ba, hamriik metin ba,
badinas nafatin ba Na’i nia serbisu, hodi hatene katak iha Na’i imi nia serbisu
sei la sai leet deit.
|