16

Kona ba kolekta

                ¹ Kona kolekta ba santu sira, imi sei halo mos hanesan ha’u haruka ba kreda sira iha Galasia. ² Iha loron uluk semana nian, imi ida-ida sei rai hela no tau ketak buat nebe imi bele, atu wainhira ha’u to’o neba imi la halo tan kolekta. ³ Wainhira ha’u to’o, ha’u sei haruka sira nebe imi tau laran  ho surat atu lori imi nia presente diak los ba Jerusalem. ⁴ Imi hanoin katak ha’u mos ten ke ba, sira sei ba hamutuk ho ha’u.

Paulo nia hakarak

                ⁵  Liu tiha Masedonia, ha’u sei to’o ba imi, basa ha’u sei la’o housi Masedonia, ⁶ no ha’u sei hela ho imi, eh hela karik ho imi iha tempu rai malirin nian tomak, atu imi bele haruka ha’u ba ha’u nia dalan ba fatin naran deit nebe ha’u sei ba. ⁷ Basa ha’u lakohi hare imi hodi liu deit, maibe ha’u hein atu hela tempu ruma ho imi, Na’i husik karik. ⁸ Ha’u sei hela iha Efeso to’o Pentekostes, ⁹ basa loke tiha mai ha’u odamatan luan no buras ida atu ha’u bele serbisu, maibe iha mos funubalun barak.

                ¹⁰ Wainhira Timoteo to’o, hare ba katak nia la bele tauk iha imi leet, basa nia halo Na’i nia serbisu nudar ha’u halo. ¹¹ Ne’e duni, ema ida la bele hare aat nia. Maibe, haruka nia iha nia dalan iha dame laran atu nia bele to’o mai ha’u, basa ha’u hein nia hamutuk ho maun alin sira. ¹² Oras ne’e, kona ba ita nia maluk Apolo, ha’u husu nia hodi kbiit atu la’o ba imi hamutuk ho maun alin sira, maibe nia lakohi liu atu ba ohin kedas. Nia sei ba wainhira nia hetan tempu.

Kumprimentu

                ¹³ Matan moris ba, laran metin iha fiar, aten berani ba, kbiit na’in ba. ¹⁴ Halo imi nia hahalok ida-ida ho domin.

                ¹⁵ Ha’u husu imi, maun alin sira; imi hatene katak Estefanas nia uma-kain mak fuan uluk Acaia nian no katak sira saran tiha sira an ba serbisu ba santu sira; ¹⁶ haraik an ba ema sira hanesan ne’e ba, no ba ema hotu nebe serbisu hamutuk ho sira. ¹⁷ Ha’u haksolok wainhira Estefanas, Fortunato no Acaico to’o ona mai, basa wainhira imi la iha, sira taka imi nia fatin, ¹⁸ basa sira hafoun ha’u nia laran no mos imi nian. Ne’e duni, hahi ema sira hanesan ne’e ba.

                ¹⁹ Kreda sira iha Asia haruka sira nia kumprimentu. Aquila no Prisca hamutuk ho kreda iha sira nia uma haruka ba imi kumprimentu barak iha Na’i. ²⁰ Maun alin sira hotu kumprimenta imi. Kumprimenta malu hodi rei malu iha Na’i.

                ²¹ Ha’u, Paulo, hakerek kumprimentu ne’e ba imi ho ha’u nia liman rasik. ²² Ema ida la hadomi Na’i karik, malisan ba nia. Maranatha. ²³ Na’i Jesus Kristu nia grasa hela ho imi. ²⁴ Ha’u nia domin ba imi hotu iha Kristu Jesus. Amen.