II   KORINTO

1

Kumprimentu      

                ¹ Paulo, Kristu Jesus nia apostolu ida tan Maromak nia hakarak, no Timoteo, ami nia alin, ba Maromak nia kreda iha Korinto, hamutuk ho santu sira hotu iha Akaia tomak, ² grasa ba imi no dame housi Maromak ita Aman no housi ita Na’i Jesus Kristu.

Fo agradese

                ³ Rahun diak ba Maromak no ita Na’i Jesus Kristu nia Aman, Aman laran diak nian no Maromak ksolok hotu nian, ⁴ nebe fo ksolok mai ita hotu iha ita nia susar tomak atu ita bele konsola sira nebe iha susar laran ho ksolok nebe ita rasik simu housi Maromak. ⁵ Basa nudar ita halo parte maka’as iha Kristu nia terus, nune’e mos, housi Kristu mak ksolok wa’in suli mai. ⁶ Ami hetan terus karik, ne’e atu imi hetan ksolok no maksoin; no ami simu ksolok karik, ne’e atu imi hetan ksolok, nebe imi koko wainhira imi tahan ho pasiensia susar sira hanesan ami hetan. ⁷ Ami nia esperansa ba imi la namlele, basa ami hatene katak nudar imi halo parte iha ami nia terus, imi mos sei halo parte iha ami nia ksolok.

                ⁸ Ami lakohi katak imi beik, maun alin sira, kona ba terus nebe mosu mai ami iha Asia; ami hetan susar nebe boot liu fali ami nia kbiit, nune’e ami atu lakon ona esperansa kona ba ami nia moris rasik. ⁹ Tebes duni, ami sinti katak ami simu ona  kastigu mate nian, maibe ne’e halo ami la konfia ami nia an, maibe fiar deit Maromak nebe halo ema mate moris hi’as fali. ¹⁰ Nia soi ami housi perigu boot mate nian, no Nia sei soi ami nafatin; iha Nia mak ami tau ami nia esperansa katak Nia sei soi ami dala ida tan. ¹¹ Imi mos ten ke tulun ami ho orasaun, atu ema barak bele fo agradese tan ami ba kmanek barak nebe haraik tiha mai ami tan orasaun barak.

Paulo foti an

                ¹² Basa ami foti an tan ne’e: ami nia konsiensia nia sasin katak ami book an iha mundu ne’e, liu-liu iha imi leet, ho Maromak nia laran los no laran la bosok, la’os ho mundu ne’e nia matenek, maibe ho Maromak nia grasa. ¹³ Basa ami hakerek ba imi buat nebe imi bele lee no hatene deit, no ha’u hein katak imi bele komprende lo-los, nudar imi komprende ona sorin balun deit katak imi bele foti an kona ba ami, hanesan ami mos bele foti an kona ba imi, iha ita Na’i Jesus nia loron.

                ¹⁵ Ha’u hatene lo-los katak ha’u hakarak hare imi uluk atu imi bele simu favor rua, ¹⁶ katak ha’u hakarak hare imi iha ha’u nia dalan ba Masedonia, fila fali ba imi wainhira ha’u fila housi Masedonia, no imi la’o ho ha’u wainhira ha’u hahu la’o ba Judeia. ¹⁷ Ne’e duni, wainhira ha’u hanoin atu halo ida ne’e, ha’u laran namlele, ka? Eh, ha’u halo planu tuir ema mundu ne’e nia hanoin, nune’e hodi dehan “los “ no “lae “ dala ida deit? ¹⁸ Nudar Maromak la bosok, ami nia liafuan ba imi la’os “los” no “lae” dala ida deit. ¹⁹ Basa Maromak nia Oan Mane, nebe Silvano no Timoteo no ha’u haklaken ba imi, la’os “los” no “lae”, maibe iha Nia “los” nafatin. ²⁰ Basa Maromak nia promessa hotu, hetan sira nia “los” iha Nia: tan ne’e ita dehan “Amen” housi Nia, ba Maromak ba gloria. ²¹ Maibe Maromak mak Ida nebe hametin ami ho imi iha Kristu, no Nia mak haruka ami, ²² hodi tau Nia sinal mai ami no fakar nia Espiritu iha ami nia fuan nudar prenda.

Paulo muda nia planu

                ²³ Maibe ha’u husu Maromak atu sai ha’u nia sasin hasouru ha’u, katak ha’u lakohi fo todan ba imi mak ha’u seidauk ba Korinto. ²⁴ La’os atu hatodan imi nia fiar, maibe ami serbisu ba imi nia ksolok; basa imi nia fiar metin ona.