2

                ¹ Ha’u hakarak ba hare imi la’os atu halo imi laran susar. ² Basa ha’u halo imi laran susar karik, se mak sei konsola ha’u? Imi deit nebe ha’u halo neon kraik. ³ Ha’u hakerek nudar ha’u hakerek tiha atu wainhira ha’u to’o neba ha’u la bele hetan laran susar housi sira nebe lo-los sei konsola ha’u, basa ha’u hatene kona ba imi hotu katak ha’u nia ksolok mak imi hotu nian. ⁴ Basa housi laran susar no terus barak mak ha’u hakerek ba imi ho mataben wa’in,  la’os atu imi fuan kanek, maibe atu imi bele hatene domin boot nebe ha’u iha ba imi.

Ida nebe sala

                ⁵ Ema ida halo fuan kanek karik, nia la halo laran kanek mai ha’u, maibe (la’os atu koalia maka’as liu) ba imi hotu. ⁶ Kastigu housi imi hotu to’o ona ba ema ne’e, ⁷ nune’e diak liu imi fo perdua ba nia no konsola nia; lae karik, susar boot liu ne’e bele halakon nia. ⁸ Ne’e duni, ha’u husu imi atu hafoun imi nia domin ba nia. ⁹ Tan ne’e mak ha’u hakerek, atu bele koko imi nia laran hodi hatene imi halo tuir duni kona buat hotu ka lae. ¹⁰ Ema nebe imi perdua kona ba buat naran deit, ha’u mos fo perdua. Basa, tebes duni, buat nebe ha’u perdua tiha ona, ha’u perdua duni buat ruma karik, ne’e tan imi iha Kristu futar oin, ¹¹ atu Satanas la bele manan ita, basa ita hatene lo-los buat nebe nia hakarak.

Paulo la hakmatek

                ¹² Wainhira ha’u la’o ba Troas tan Kristu nia evangeliu, maski odamatan ida loke tiha mai ha’u iha Na’i, ¹³ ha’u laran la hakmatek basa ha’u la hetan iha neba ha’u nia alin Tito. Ne’e duni, ha’u fo adeus ba sira no la’o ba Masedonia.

Aliansa foun nia emar sira

                ¹⁴ Maibe obrigadu ba Maromak, nebe lori ami nafatin atu manan iha Kristu no halo ema horon Nia matenek nia morin housi ami iha fatin hotu. ¹⁵ Basa ami mak Kristu nia iis ba Maromak iha sira nebe hetan ona maksoin nia leet, no sira nebe lakon dau-daun sira leet; ¹⁶ ba sira ikus ne’e, mate nia iis nebe lori ba mate, ba sira uluk, moris nia morin nebe lori ba moris. Se mak bele to’o ba buat ne’e? ¹⁷ Basa ami la hanesan sira barak nebe buka osan housi Maromak futar lia; maibe nudar ema lialos nian no Maromak nia serbisu na’in, ami koalia iha Kristu Maromak futar oin.