4

Paulo halo nia knaar ho laran los

                ¹ Ne’e duni, hodi simu knaar ida ne’e housi Na’i nia laran luak, ami la lakon aten berani. ² Ami lakohi book an hodi hahalok nebe la los ka sub-subar; ami la bosok ema ka muda Maromak futar lia; maibe hodi haklaken lialos iha ema hotu nia oin, ami saran ami an ba ema hotu nia konsiensia iha Maromak futar oin. ³ Maski hena ruma taka ami nia evangeliu, evangeliu taka hela deit ba sira nebe atu lakon ona, ⁴ sira nebe maromak mundu ne’e nian mak taka tiha ema fiar laek sira nia hanoin atu sira la bele hare evangeliu nia naroman nebe Kristu Maromak nia ilas nia gloria. ⁵ Ami la haklaken ami an maibe Jesus Kristu nudar Na’i, no ami nudar imi nia atan tan Jesus. ⁶ Basa Maromak, nebe dehan, “Naroman nabilan iha nakukun ba,” leno tiha ita nia fuan atu hatudu matenek Maromak nia gloria nia naroman nian iha Kristu nia oin.

Rikusoi iha sana rai nia laran

                ⁷ Maibe ita rai hela rikusoi ne’e iha sana rai nia laran, atu kbiit maka’as bele mosu nudar Maromak nian, la’os ita nian.

⁸ Ami terus oi-oin, maibe ami bele book an; ami hanoin la to’o, maibe la lakon aten berani; ⁹ ema fo terus ami, maibe Na’i la husik ami; ema baku ami to’o monu ba rai, ami la rahun aat; ¹⁰ ami lori nafatin iha ami nia isin Jesus nia mate, atu Jesus nia moris bele hatudu an iha ami nia isin. ¹¹ Basa wainhira sei moris, ema saran ami bei-beik ba mate tan Jesus, atu Jesus nia moris bele hatudu an iha ami nia isin nebe bele mate.

                ¹² Nune’e, mate book an nafatin iha ami, maibe moris iha imi. ¹³ Ne’e duni, tan ita iha espiritu fiar nian hanesan deit, tuir buat nebe hakerek tiha, “Ha’u fiar, tan ne’e ha’u koalia,” ami hotu fiar, tan ne’e ami koalia,” ami mos fiar tan ne’e ami koalia, hodi hatene katak Ida nebe halo Jesus moris hi’as, sei halo ita mos moris hi’as no tau ami hamutuk ho imi iha Nia futar oin. ¹⁵ Tebes duni, buat hotu halo tiha ba imi nia diak, atu grasa barak nebe haraik tiha ba ema wa’in ba wa’in bele halo ema fo agradese liu tan ba Maromak nia gloria.

                ¹⁶ Ne’e duni, ami la lakon aten berani; maibe, maski buat nebe iha liur sai dodok dau-daun, ami nia laran hafoun an loron loron. ¹⁷ Basa terus kmaan ne’e nebe liu dau-daun ne’e hadia gloria rohan laek iha ami laran; gloria nebe diak liu buat hotu; ¹⁸ basa ami la hateke ba buat nebe bele hare, maibe ba buat nebe la bele hare, basa buat nebe bele hare liu dau-daun maibe buat nebe la bele hare rohan laek.