5

Ita aban bainrua

                ¹ Ita hatene katak ita nia tenda rai ne’e nian nebe ita horik ba, sei sobu rahun karik, ita iha uma housi Maromak, uma nebe la halo ho ema nia liman, maibe rohan laek iha lalehan. ² Basa iha ne’e, ita tanis hodi kaan atu bele hafutar an ho ita nia uma lalehan nian, ³ wainhira ita tau ona nia, ema la bele hetan ita isin molik. ⁴ Basa wainhira ita sei hela iha tenda ne’e, ita tanis ho laran todan, la’os tamba ita lakohi ema hasai ita nia hatais, maibe ita lakohi katak ema tau tan hatais ba ita, atu nune’e buat nebe bele mate bele mohu iha buat nebe moris. ⁵ Oras ne’e, Ida nebe hadia ita ba buat ne’e mak Maromak, nebe haraik tiha Espiritu mai ita nudar prenda.

                ⁶ Ne’e duni, ita aten berani nafatin; ita hatene katak wainhira ita horik iha isin ida ne’e, ita moris dook housi Na’i, ⁷ basa ita la’o hodi fiar, la’os hodi hare ho matan. ⁸ Maibe ita aten berani, no ita hakarak liu husik isin ne’e atu bele horik ho Na’i. ⁹ Tan ne’e, ita iha isin ka dook housi isin, ita buka nafatin atu fo ksolok nafatin ba Na’i. ¹⁰ Basa ita hotu sei mosu iha Kristu nia tribunal, atu ita ida-ida bele simu nia kolen diak eh aat, tuir hahalok nebe ita halo iha isin.

Knaar hadame malu nian.

                ¹¹ Ne’e duni, tan ami hatene tauk Na’i, ami buka lori ema seluk ba fiar, maibe ami la subar buat ruma iha Na’i futar oin no ha’u hein mos katak ami la subar buat ida iha imi nia oin. ¹² Ami la foti an iha imi nia oin dala ida tan, maibe ami fo fatin ba imi atu foti an tan ami, atu imi bele hatan ba sira nebe foti an kona ba buat nebe iha liur liu fali buat nebe iha laran lo-los. ¹³ Basa ami bulak karik, ne’e tan Maromak; ami oin mos karik, ne’e tan imi. ¹⁴ Basa Kristu nia domin book ami maka’as basa ami hatene lo-los katak ida mate tiha tan ema hotu nia diak, no tan ne’e ema hotu mate,. ¹⁵ Kristu mate duni tan ema hot-hotu, atu sira nebe moris, la moris tan ba sira an rasik, maibe moris ba Ida nebe mate no moris hi’as tamba sira. ¹⁶ Ne’e duni, houri ohin ba oin, ita hare ema, la’os tuir isin ona; maski uluk ita hare Kristu tuir isin, ohin ne’e, ita la hare tan nia hanesan ne’e. ¹⁷ Ne’e duni, ema hela iha Kristu karik, nia sai ona buat foun ida; buat tuan nian  liu tiha ona; hare ba, buat hotu foun fali ona. ¹⁸ No buat sira ne’e hotu mai housi Maromak, nebe hadame ita ho Nia An housi Kristu no haraik tiha mai ami knaar hadame malu nian, ¹⁹ katak, Maromak hadame mundu ba Nia An housi Kristu, hodi la sura ema sira nia sala hasouru sira, maibe saran tiha mai ami lia menon hadame malu nian. ²⁰ Ami Kristu nia manu ain; Maromak hato’o nia liafuan housi ami. Ami husu imi hodi kbiit iha Kristu nia naran: hadame malu ho Maromak ba. ²¹ Tan ita, Maromak halo Nia nebe la hatene sala atu sai sala, atu ita bele sai Maromak nia laran los iha Nia.