7
Loke imi nia fuan
1 Tan ita
iha promessa sira ne’e, ha’u nia doben sira, ita hamos ita
an housi buat foer sira hotu isin no klamar nian, no sai santu lo-los hodi tauk
Maromak. 2 Loke imi nia fuan mai ami; ami la halo
aat ema ida ka hakanek ema ida, ka lohi ema ida. 3 Ha’u
la dehan ne’e atu kastigu imi, basa ha’u dehan ona katak imi hela iha ami nia
fuan, atu ita bele mate hamutuk no moris hamutuk. 4 Ha’u
fiar imi teb-tebes, ha’u foti an iha imi; ha’u nakonu ho aten berani tebes,
ha’u haksolok tebes liu tan tamba ami nia terus.
Paulo nia ksolok iha Masedonia
5 Basa
wainhira ami la’o ba Masedonia, ami nia isin la hakmatek, maibe ami terus iha
buat hotu; susar housi liur no tauk iha laran. 6 Maibe
Maromak, nebe fo aten berani ba ema neon kraik sira, fo aten berani mai ami
wainhira Tito to’o mai, 7 no la’os deit tan nia
mosu mai ona, maibe mos tan aten berani nebe nia simu tan imi, wainhira nia
haktuir imi nia hakarak, imi nia laran susar no imi nia laran badinas atu
hanoin ha’u, nune’e ha’u haksolok liu tan. 8 Basa
maski ha’u halo imi laran susar tan ha’u nia surat, ha’u la hakribi nia; ha’u
hakribi karik tan surat ne’e halo imi laran susar maski ba tempu uitoan deit, 9
ohin ne’e ha’u haksolok, la’os tan imi laran susar, maibe tamba imi nia
laran susar ne’e lori imi atu hakribi imi nia sala; imi laran susar tuir
Maromak, nune’e imi la lakon buat ida tamba ami. 10 Basa,
laran susar tuir Maromak lori ema atu hakribi sala, maibe laran susar tuir mundu
lori mate. 11 Basa hare oin sa laran susar tuir
Maromak ne’e halo imi laran manas, no mos halo imi hadia an atu tahan; nia halo
imi laran nakali, tauk, hakarak hodi kbiit, laran badinas, no kastigu. Iha buat
hotu ne’e, imi hatudu imi an sala laek. 12 Ne’e
duni, maski ha’u hakerek ba imi, la’os tan ida nebe halo hahalok aat ka tan ida
nebe terus tamba hahalok aat ne’e, maibe atu imi nia laran kona ba ha’u bele
mosu mo-mos ba imi iha Maromak futar oin. 13 Tan
ne’e mak ami hetan konsolasaun.
No hamutuk ho konsolasaun, ami
haksolok liu tan tamba Tito nia ksolok, basa imi hotu hafoun nia laran. 14
Basa ha’u gaba an karik ba nia kona ba imi, ema la hamoe ha’u. Lae, basa
nudar buat hotu nebe ami dehan ba imi los, nune’e mos buat nebe ami gaba an ba
Tito mosu los hotu. 15 No nia fuan monu liu tan ba
imi, wainhira nia hanoin katak imi hotu halo tuir nia wainhira imi simu nia ho
tauk no laran nakdedar. 16 Ha’u haksolok, basa ha’u
fiar imi iha buat hotu.
|