8

Fo ho laran luak

                ¹ Ami hakarak katak imi hatene, maun alin sira, kona ba Maromak nia grasa nebe haraik tiha ona ba kreda sira iha Masedonia, ² basa wainhira Maromak koko sira ho terus boot, sira nia ksolok naresin no sira hatudu katak maski sira kiak, sira nia laran luak teb-tebes. ³ Tuir sira nia kbiit, ha’u bele fo sasin, no liu fali sira nia kbiit, ho laran, ⁴ sira husu ami maka’as atu sira bele halo parte iha serbisu ba santu sira, ⁵ no ida ne’e, la’os nudar ami hanoin, maibe sira saran sira nia an ba Na’i no ba ami housi Maromak nia hakarak, ⁶ tan ne’e, ami husu Tito atu, nudar nia hahu ona, nia remata mos ba imi ho hahalok kmanek ida ne’e. ⁷ Ne’e duni, nudar imi diak liu iha buat hotu: iha fiar, iha liafuan, iha matenek, iha laran manas, no iha domin nebe imi hadomi ami, ha’u hein mos katak imi sei sai diak liu kona ba serbisu ida ne’e.

                ⁸ Ha’u dehan ne’e la’os hodi haruka, maibe atu koko imi nia domin los ka lae, wainhira imi hanoin ema seluk sira. ⁹ Basa imi hatene ita Na’i Jesus Kristu nia grasa, katak, tan imi, Nia halo an kiak maski Nia riku, atu housi nia kiak, imi bele sai riku. ¹⁰ No ha’u fo konseliu ba imi kona ba ne’e, basa ne’e diak ba imi nebe hahu ona la’os deit atu halo maibe atu halo ho laran kmaan tinan liu ba; halo nia lo-los ohin ne’e, atu imi nia laran kmaan ne’e bele hetan mos imi nia hahalok nebe la’o lo-los housi buat nebe imi iha. ¹² Basa iha karik laran kmaan, imi nia presente bele simu tuir buat nebe imi iha, la’os tuir buat nebe imi la iha; ¹³ la’os atu ema seluk bele hetan kmaan wainhira imi hetan todan, maibe nudar ema nebe hanesan, ¹⁴ buat nebe resin ba imi ohin ne’e ten ke tulun sira nia kuran, atu imi bele sai hanesan deit. ¹⁵ Hakerek tiha, “Ida nebe iha barak la iha resin, no ida nebe iha uitoan la kuran buat ida.”

Tito no nia maluk sira

                ¹⁶ Maibe obrigadu ba Maromak nebe tau iha Tito nia fuan atu hanoin imi, ¹⁷ basa nia la simu deit ami nia liafuan, maibe nia hanoin ho laran; nia la’o ba imi ho nia hakarak rasik. ¹⁸ Hamutuk ho nia, ami haruka mos alin nebe kreda tomak hatene tan nia haklaken evangeliu. ¹⁹ Laos ida ne’e deit,  maibe mos kreda sira halo nia sai ami nia maluk iha dalan iha knaar kmanek ida ne’e nebe ami hala’o tan Maromak nia gloria no atu hatudu ami nia laran manas. ²⁰ Ami hakarak hadook an housi buat ida ne’e: katak ema ruma hare ami sala kona ba presente boot nebe ami tau matan, ²¹ basa ami hakarak buat nebe soi atu hahi la’os deit iha Na’i futar oin maibe mos iha ema seluk nia oin. ²² No hamutuk ho sira, ami haruka ami nia alin nebe ami koko tiha ona iha buat barak no hetan nia ho laran badinas, maibe ohin laran badinas liu tan tamba laran metin boot nebe nia hetan iha imi. ²³ Kona ba Tito; nia ha’u nia maluk no serbisu hamutuk ho ha’u tan imi; kona ba maun alin sira, sira mak kreda sira nia manu ain,  Kristu nia gloria nian. ²⁴ Ne’e duni, imi fo sasin ba kreda sira kona ba imi nia domin no mos katak ami la bosok wainhira ami gaba an ba sira kona ba imi.