10

Se mak foti an, foti an ba iha Na’i

                ¹ Oras ne’e, ha’u rasik, Paulo, husu maka’as imi tan Kristu nia laran kmaus no laran luak, ha’u nebe haraik an wainhira iha imi nia leet, maibe si’ak liu wainhira dook; ² ha’u husu atu, wainhira ha’u iha imi nia leet, ha’u la presisa si’ak ho aten berani hanesan ha’u hanoin atu halo hasouru sira nebe  hanoin katak ha’u book an deit tuir isin. ³ Basa, maski ami iha isin, ami la halo funu tuir isin, ⁴ basa kilat nebe ami usa iha funu ne’e la’os isin nian, maibe maka’as liu tan nebe bele sobu rahun uma fatuk nian. Ami halakon liafuan ⁵ no hanorin hot-hotu nebe foti an hasouru Maromak nia matenek, no halo hanoin hot-hotu halo tuir Kristu, ⁶ no ami hadia an atu fo kastigu ba ida nebe lakohi halo tuir, wainhira imi halo tuir lo-los ona.

                ⁷ Hare ba buat nebe iha imi nia oin. Ema nebe hanoin katak nia Kristu ninian ten ke hanoin katak nudar nia Kristu ninian, nune’e mos ami. ⁸ No maski ha’u foti an resin uitoan kona ba ami nia kbiit, nebe Na’i haraik atu harii imi no la’os atu hatun imi, ha’u sei la moe. ⁹ Ha’u lakohi  mosu hanesan ida nebe halo imi tauk housi surat. ¹⁰ Basa ema ruma dehan, “Nia surat maka’as no si’ak, maibe wainhira nia iha ne’e, nia kbiit laek no nia liafuan halo ita hamnasa deit.” ¹¹ Ema ne’e ten ke hatene katak nudar ami mosu iha liafuan iha ami nia surat wainhira ami dook housi imi, ami nune’e mos iha hahalok wainhira ami iha imi nia leet.

                ¹² La’os katak ami berani atu hare ami an hanesan sira balun nebe foti sira an. Maibe wainhira sira sukat malu no hare sira an hamutuk, sira la hatene liu. ¹³ Ami sei la foti an resin, maibe ami sei hela iha sukat nebe Maromak fo mai ami, katak atu to’o mos ba imi. ¹⁴ Ami la la’o resin, hanesan ami la to’o ba imi; lo-los ami mak uluk atu to’o ba imi ho Kristu nia evangeliu. ¹⁵ Ami foti an resin, iha ema seluk nia serbisu; maibe ami hein katak wainhira imi nia fiar sai boot ba dau-daun, ami nia knaar iha imi leet bele sai boot liu tan, tuir sukat lo-los nebe fo mai ami, ¹⁶ atu ami bele haklaken evangeliu ba fatin seluk tan housi imi, hodi la foti an iha serbisu nebe halo tiha iha ema seluk nia fatin. ¹⁷ ”Ema nebe foti an, foti an ba iha Na’i.” ¹⁸ Basa la’os ida nebe foti nia an mak los, maibe ida nebe Na’i mak foti.