12

Ha’u maka’as wainhira ha’u kbiit laek

                ¹ Ha’u ten ke foti an; maski ne’e la lori buat diak ruma, maibe ha’u sei ba oin ho visaun no buat sira nebe Na’i hatudu. ² Ha’u hatene ema ida iha Kristu, nebe tinan sanulu resin hat liu tiha, iha isin laran ka iha isin nia liur, ha’u la hatene, Maromak mak hatene, foti tiha ba lalehan ba dala tolu. ³ No ha’u hatene katak ema ne’e, iha isin laran ka iha isin nia liur, ha’u la hatene, Maromak mak hatene; ⁴ foti tiha ba lalehan no rona buat sira nebe ema la bele temi, ema ida la bele dehan sai. ⁵ Kona ba ema ne’e mak ha’u sei foti an, maibe kona ba ha’u an rasik, ha’u sei la foti an; kona ba ha’u nia an nebe kbiit laek deit mak ha’u sei foti an. ⁶ Maibe, maski ha’u hakarak foti an karik, ha’u sei la sai bulak, basa ha’u sei hateten lialos. Maibe ha’u la foti an, atu ema ida la bele hanoin kona ba ha’u liu fali buat nebe nia hare iha ha’u ka rona housi ha’u, ⁷ No atu ha’u la bele loko an resin tan buat nebe Maromak hatudu barak tebes, Maromak haraik mai ha’u ai-tarak ba ha’u nia isin; Satanas nia anju ida, atu baku ha’u; atu ha’u la bele loko an resin. ⁸ Dala tolu ha’u husu Na’i kona ba ne’e, atu nia  husik tiha ha’u, ⁹ maibe Nia dehan mai ha’u, “Ha’u nia grasa to’o ona ba o, basa Ha’u nia kbiit sai lo-los wainhira ema kbiit laek.” Ho ksolok, ha’u sei foti an liu tan iha ha’u nia kbiit laek, atu Kristu nia kbiit horik iha ha’u. ¹⁰ Ne’e duni, tan Kristu, ha’u haksolok tamba ha’u kbiit laek, wainhira ema hasara ha’u, iha terus laran, wainhira ema fo hanehan ha’u, iha susar laran; basa wainhira ha’u kbiit laek, ha’u maka’as.

Paulo hanoin Kreda sira

                ¹¹ Ha’u hanesan ema bulak ida ona! Imi obriga ha’u atu halo nune’e, basa lo-los imi mak foti ha’u. Basa ha’u la’os kiik liu “apostolu boot” sira ne’e, maski ha’u la folin buat ida. ¹² Imi hare sinal sira nebe halo tiha iha imi nia leet, nebe hatudu se los mak apostolu, iha pasiensia, ho sinal no milagre sira no hahalok kmanek sira. ¹³ Iha buat sa mak imi kuran kmanek liu kreda sira seluk? Housi ha’u nia sorin, ha’u la hatodan imi, mak ne’e deit. Perdua ha’u tan buat aat ida ne’e!

                ¹⁴ Oras ne’e, ba dala tolu ona, ha’u hadia an atu ba hasouru imi. Ha’u sei la fo todan ba imi, basa ha’u buka buat nebe imi nian; ha’u hakarak deit imi rasik. Basa oan sira la bele halibur rikusoi ba sira nia aman inan, maibe aman inan sira sei halibur rikusoi ba sira nia oan. ¹⁵ Ho laran ksolok, ha’u sei halakon ha’u an no husik ema halakon ha’u tan imi klamar. Ha’u hadomi imi liu tan karik, imi sei hadomi ha’u uitoan deit? ¹⁶ Maski ha’u la fo todan ba imi karik, maibe ha’u matenek liu hodi lohi imi no manan. ¹⁷ Ha’u buka manan buat ruma housi imi housi sira nebe ha’u haruka ba imi? ¹⁸ Ha’u husu Tito atu ba no haruka mos alin ida atu ba hamutuk ho nia. Tito buka manan buat ruma housi imi? Ami laran la hanesan Tito nian? Ami nia hahalok la hanesan?

Lia menon ida tan

                ¹⁹ Imi hanoin to’o ohin ne’e katak ami defende ami an iha imi nia oin? Iha Maromak futar oin mak ami koalia iha Kristu, no buat hirak ne’e hotu atu harii imi, ha’u nia doben sira. ²⁰ Basa ha’u tauk katak wainhira ami to’o ba imi, ha’u sei hetan imi la’os hanesan ha’u hakarak no imi la hetan ha’u hanesan imi hakarak; keta imi istori malu karik, laran moras ba malu, hirus malu, karakten, konta ema seluk nia vida, hateten aat ema, foti an no rungu-ranga. ²¹ Ha’u tauk katak wainhira ami to’o ba imi dala ida tan, ha’u nia Maromak sei hatun ha’u iha imi nia oin, no ha’u sei tanis kona ba sira nebe uluk halo sala no seidauk hakribi sala to’o ohin ne’e: sira halo sala foer, laran aat no moris nar-naran deit hanesan sira halo uluk.