GALASIA
1
Kumprimentu
1
Housi Paulo nebe sai apostolu, la’os tan ema ka
housi ema, maibe tan Jesus Kristu no Aman Maromak, nebe halo Nia moris hi’as. 2
Maun alin sira hotu iha ne’e hamutuk ho ha’u fo kumprimentu ba Kreda sira
iha Galasia. 3 Maromak, ita Aman, no Na’i Jesus
Kristu fo grasa no dame ba imi. 4 Atu hasai ita
housi otas aat ida ne’e, Kristu saran nia An tamba ita nia sala sira, hodi halo
tuir ita nia Maromak no Aman nia hakarak. 5 Gloria
ba Maromak tinan ba tinan. Amen.
Evangeliu
ida deit
6
Ha’u hakfodak kona ba imi! Lalais deit mak imi
husik ida nebe bolu imi housi Kristu nia grasa; imi simu fali evangeliu seluk. 7
Lo-los, la iha evangeliu seluk, maibe ha’u dehan ne’e basa iha ema balun
nebe book imi, hodi buka muda Kristu nia evangeliu. 8 Maibe,
maski ami eh anju ida housi lalehan haklaken ba imi evangeliu ida nebe oin
seluk housi buat nebe ami haklaken ona ba imi, malisan ba nia! 9
Ami dehan nanis ona, no ami sei dehan dala ida tan: ema ruma haklaken
evangeliu ruma karik nebe oin seluk housi ida nebe imi simu tiha ona, malisan
ba nia!
10 Ha’u
buka ema nia laran diak, ka Maromak nian? Ha’u buka fo ksolok ba ema ruma? Ha’u
buka duni karik, ha’u sei la sai Kristu nia atan.
Paulo sai
apostolu oin sa
11 Husik
ha’u fo hatene ba imi, maun alin sira, katak evangeliu nebe ha’u haklaken la
mai housi ema ida. 12 Ha’u la simu nia housi ema
ruma, eh ema ruma hanorin ha’u. Jesus Kristu rasik mak fo hatene nia mai ha’u. 13
Imi rona tiha ona ha’u nia moris uluk nian, wainhira ha’u hadomi Judeu sira nia religiaun: oin sa
ha’u, ho laran tos, fo susar ba Maromak nia Kreda, hodi buka ho laran tomak atu
halo aat sira. 14 Ha’u maka’as liu maluk Judeu sira
barak iha Judeu sira nia religiaun ne’e; ha’u nia devosaun ba ita nia bei-ala
sira nia lisan maka’as liu. 15 Maibe, tan Nia
grasa, Maromak hili ha’u molok ha’u moris, hodi bolu ha’u atu serbi Nia. 16
Wainhira nia hanoin atu fo hatene nia Oan Mane mai ha’u, atu ha’u bele haklaken
liafuan diak kona ba Nia ba gentiu sira, ha’u la hakbesik ema ruma atu simu
konseliu, 17 ha’u la ba Jerusalem atu hare sira
nebe sai apostolu uluk liu ha’u. Ha’u ba kedas Arabia; tuir mai ha’u fila fali
ba Damasko. 18 Liu tiha tinan tolu deit mak ha’u ba
Jerusalem, atu simu liafuan ruma housi Pedro, no ha’u hela ho nia semana rua
deit. 19 Ha’u la hare tan apostolu seluk; maibe
ha’u hare Tiago, Na’i nia alin.
20 Buat
nebe ha’u hakerek ba imi mak los. Maromak hatene katak ha’u la bosok.
21 Tuir
mai, ha’u ba rai oi-oin iha Siria no Silisia. 22 Iha
tempu neba, sarani sira iha Judeia la hare ha’u ho sira nia matan rasik; 23
sira hatene deit buat nebe ema dehan: “Ema nebe uluk fo susar mai ita,
ohin nia haklaken fiar nebe uluk nia haka’as an atu halo aat.” 24
Nune’e, sira hahi Maromak tamba ha’u.
|