2

Paulo no apostolu sira seluk

                ¹ Liu tiha tinan sanulu resin haat, ha’u fila fali ba Jerusalem hamutuk ho Bernabe, hodi bolu mos Tito. ² Ha’u ba neba basa Maromak haruka ha’u. Wainhira ha’u mesak ba hasouru katuas sira, ha’u fo hatene ba sira evangeliu nebe ha’u haklaken ba gentiu sira. Ha’u lakohi katak ha’u nia serbisu ohin ka aban bainrua nian sai leet deit. ³ Ema la halo ha’u nia maluk Tito, maski nia ema gregu, atu simu sirkunsisaun, ⁴ maski ema balun hakarak duni. Hodi fingi katak sira ita nia maluk iha serbisu, sira tama iha ita nia leet nudar espiaun, atu buka hatene kona ba liberdade nebe ita hetan hamutuk ho Kristu Jesus. Sira hakarak halo ita sai atan; ⁵ maibe atu imi bele hetan lialos tomak, ami la husik sira, biar ba tempu uitoan deit, atu halo ida ne’e.

                ⁶ Maibe sira nebe hanesan na’i ulun--ha’u dehan ne’e basa sira ne’e se lo-los la halo buat ida; Maromak la hare ema hanesan ema matan hare--ha’u dehan katak na’i ulun sira ne’e la hato’o liafuan foun mai ha’u. ⁷ Maibe sira hare katak Maromak fo tiha mai ha’u knaar ida ne’e atu haklaken evangeliu ba gentiu sira nudar Nia fo tiha knaar atu haklaken evangeliu ba Judeu sira ba Pedro. ⁸ Basa, Nia nebe serbisu housi Pedro ba Judeu sira, serbisu mos housi ha’u ba gentiu sira. ⁹ Tiago, Pedro no Joao, nebe ema hare nudar na’i ulun, hare katak Maromak fo knaar ida ne’e mai ha’u; tan ne’e sira kaer liman ho Bernabe ho ha’u nudar sinal katak ami maluk, hodi lia tuir malu katak Bernabe ho ha’u sei serbisu iha gentiu sira leet no sira iha Judeu sira leet. ¹⁰ Buat nebe sira husu deit mak ne’e: ami sei tau matan ba ema kiak sira housi sira leet. Buat ne’e ha’u hakarak halo nanis ona duni.

Paulo si’ak Pedro iha Antiokia

                ¹¹ Maibe wainhira Pedro to’o tiha Antiokia, ha’u si’ak nia iha ema nia oin, basa nia sala duni. ¹² Molok ema sira nebe Tiago haruka to’o neba, Pedro han hamutuk ho ita nia maun alin sira nebe uluk moris nudar gentiu. Maibe wainhira ema sira ne’e to’o neba, nia muda no lakohi han hamutuk ho gentiu uluk sira ne’e, basa nia tauk sira nebe hakarak fo sirkunsisaun ba sira. ¹³ Maun alin sira seluk hahu tauk hamutuk ho Pedro. Bernabe mos halo tuir sira nia hahalok nebe ema taukten nian ne’e. ¹⁴ Wainhira ha’u hare katak nia la la’o tuir dalan los tuir lialos evangeliu nian, ha’u dehan ba Pedro iha sira hotu nia oin: “O ema Judeu, maibe o moris hanesan gentiu, la’os hanesan ema Judeu. Ne’e duni, oin sa o bele halo ema gentiu sira moris nudar ema Judeu sira?”

Judeu no gentiu hetan maksoin housi fiar

                ¹⁵ Los duni, ita moris nudar ema Judeu, la’os nudar “gentiu maksalak” hanesan ema hanaran sira. ¹⁶ Maibe ita hatene katak ema ida sai los iha Maromak futar oin housi deit fiar iha Jesus Kristu, la’os housi hahalok nebe ukunfuan haruka. Ita mos fiar Jesus Kristu, atu ita bele sai los iha Maromak futar oin housi fiar iha Jesus Kristu, la’os housi hahalok nebe ukunfuan haruka. ¹⁷ Ne’e duni, ita buka karik atu sai los iha Maromak futar oin hodi moris ho Jesus Kristu, ita maksalak nafatin hanesan gentiu sira, ne’e katak Kristu tulun ita atu halo sala, ka? La iha! ¹⁸ Ha’u hahu hari fali hahalok ukunfuan nian nebe ha’u sobu tiha ona karik, ne’e duni ha’u hatudu katak ha’u ema nebe la halo tuir ukunfuan. ¹⁹ Maibe, kona ba ukunfuan ne’e, ha’u mate ona - ukunfuan rasik mak oho ha’u - atu ha’u bele moris deit ba Maromak. Ha’u mate tiha ona hamutuk ho Kristu iha krus, ²⁰ atu nune’e la’os tan ha’u mak moris, maibe Kristu mak moris iha ha’u. Moris nebe ha’u moris ohin, ha’u moris housi fiar iha Maromak nia Oan Mane nebe hadomi ha’u no saran nia moris tamba ha’u. ²¹ Ha’u lakohi hakribi Maromak nia grasa, maibe ema sai los iha Maromak futar oin housi ukunfuan karik, ne’e katak Kristu mate leet deit.