4

                ¹ Ha’u dehan, wainhira liman rohan na’in sei kiik, nia hanesan atan deit, maski nia mak sasan hotu nia na’in. ² Wainhira nia sei kiik, ema seluk tau matan ba nia no nia sasan sira to’o tempu nebe nia aman fo sai. ³ Nune’e mos ho ita. Wainhira ita sei kiik, sasan mundu nian mak ukun ita, ⁴ maibe wainhira tempu to’o ona, Maromak haruka nia Oan Mane, nebe moris housi feto, no moris iha ukunfuan nia ukun,  ⁵ atu hasai sira nebe iha ukunfuan nia ukun, atu sira bele sai Maromak nia oan.

                ⁶ Atu hatudu katak imi Maromak nia oan, Maromak haruka nia Espiritu ba ita nia fuan, nebe hateten “Abba, Aman.” ⁷ Ne’e duni, imi la’os tan atan, maibe oan. No tamba imi Maromak nia oan, imi liman rohan na’in.

Paulo hanoin ema Galasia sira

                ⁸ Uluk, imi la hatene Maromak; tan ne’e mak imi sai atan ba buat sira nebe la’os Maromak. ⁹ Maibe ohin, imi hatene ona Maromak--eh, ha’u sei dehan, ohin Maromak hatene ona imi--nusa mak imi hakarak fila fali ba espiritu sira nebe aat no kbiit laek atu ukun imi? Tan sa imi hakarak sai sira ne’e nia atan dala ida tan? ¹⁰ Imi fo laran ba loron, fulan, tempu no tinan. ¹¹ Ha’u hanoin imi teb-tebes! Ha’u nia serbisu iha imi leet folin la iha?

¹² Maun alin sira, ha’u husu imi atu sai hanesan ha’u, nudar ha’u hanesan imi. Imi la sala hasouru ha’u. ¹³ Imi hanoin hetan tan sa, uluk, ha’u haklaken evangeliu ba imi tamba ha’u moras. ¹⁴ Maibe maski ha’u nia moras  fo todan  tebes ba imi,  imi la hewai eh hakribi ha’u. Imi simu ha’u hanesan anju ida housi lalehan; imi simu ha’u hanesan imi simu Kristu Jesus rasik. ¹⁵ Imi haksolok tebes! Tuir mai, sa ida mak mosu? Ha’u rasik bele dehan katak, bele karik, imi sei fokit imi nia matan atu fo nia mai ha’u. ¹⁶ Ohin, ha’u sai ona imi nia funu balun basa ha’u dehan lialos ba imi?

                ¹⁷ Sira seluk fo laran duni ba imi, maibe sira nia hanoin la los. Sira hakarak deit atu haketak imi housi ha’u, atu imi mos sei fo laran ba sira nudar sira fo laran ba imi. ¹⁸ Fo laran ba ema diak,  diak los duni, wainhira ida nebe fo laran hanoin lo-los, ne’e los nafatin, la’os deit wainhira ha’u hela ho imi. ¹⁹ Ha’u nia oan doben sira, dala ida tan, nudar inan ida wainhira nia atu tur ahi, ha’u moras mos ba imi to’o tempu  nebe Kristu moris ona iha imi. ²⁰ Ha’u hakarak tebes atu hela ho imi ohin, atu ha’u bele muda ha’u nia laran ba imi. Ha’u hanoin imi teb-tebes!

Agar no Sara

                ²¹ Ha’u husu imi sira nebe hakarak moris iha ukunfuan nia ukun: imi rona ona buat nebe ukunfuan hateten? ²² Nia dehan katak Abraao iha oan na’in rua: ida housi atan feto ida no ida housi feto nebe la’os atan. ²³ Nia oan housi atan feto moris mai hanesan ema bai-bain, maibe ida nebe moris housi feto nebe la’os atan  moris mai tamba Maromak nia lia hakotu. ²⁴ Sira ne’e, ita bele hare nudar ilas: feto na’in rua mak moruk rua nia ilas. Moruk nebe fo oan nudar atan mak Agar; Agar mak ilas moruk nebe halo iha foho Sinai nian. ²⁵ Agar, foho Sinai  iha Arabia, nia ilas mak Jerusalem ohin nian nia ilas, nebe moris nudar atan hamutuk ho nia ema sira hotu. ²⁶ Maibe Jerusalem lalehan la’os atan; nia ita nia inan, ²⁷ basa Eskritura dehan: “Haksolok ba, feto nebe la hetan oan;  hakilar ho ksolok ba, o nebe la koko moras tur ahi nian, basa feto nebe ema husik hela sei hetan oan sira, liu fali feto nebe nia laen la husik nia.”

                ²⁸ Ne’e duni, maun alin sira, imi Maromak nia oan, hanesan Isaac, tamba lia hakotu. ²⁹ Iha tempu neba, oan nebe moris mai hanesan bai-bain fo todan ba ida nebe moris mai tamba Na’i nia espiritu. Nune’e mos ohin. ³⁰ Maibe Eskritura dehan sa? Eskritura dehan: “Duni sai atan feto ho nia oan ba, basa atan feto nia oan sei la simu liman rohan hamutuk ho oan nebe moris mai housi feto nebe la’os atan. ³¹ Ne’e duni, maun alin sira, ita la’os atan feto ida nia oan, maibe ita moris mai housi feto nebe la’os atan.

.