EFESO

1

Kumprimentu

                ¹ Housi Paulo, nebe Maromak fihir atu sai Kristu Jesus nia apostolu, ba santu sira nebe laran metin ba Kristu Jesus: ² Grasa no dame ba imi housi Maromak, ita Aman, no housi Na’i Jesus Kristu!

Misteriu Maksoin nian no misteriu Kreda nian

                ³ Rahun diak ba Maromak, Na’i Jesus Kristu nia Aman. Housi lalehan tutun, hodi Kristu, Maromak haraik bensa oi-oin mai ita. ⁴ Molok atu hakiak mundu, Maromak fihir kedas ita atu moris nudar ema santu, nudar ema sala laek no moris iha domin iha Nia futar oin. ⁵ Tuir nia laran luak, Nia fihir ona ita houri uluk kedas atu moris nudar nia oan hakiak hodi Kristu; ⁶ ba gloria nia grasa nian, nebe Nia fakar mai ita iha nia Oan doben. ⁷ Iha Kristu, ho nia ran, ita hetan maksoin no perdua ba ita nia sala. ⁸ Ne’e mak rikusoi grasa nian nebe Nia haraik mai ita iha nia matenek no laran hatene. ⁹ Nia fo hatene mai ita Nia hakarak nia misteriu, nebe subar hela, nebe Nia halo iha Kristu houri uluk kedas, atu Nia sei halo tuir lo-los wainhira tempu to’o ona nia rohan, ¹⁰ katak, atu halibur no tau iha Kristu nia liman atu ukun buat hotu iha lalehan no iha rai, ho Kristu nudar sira hotu nia ulun. ¹¹ Iha Kristu mak Maromak bolu mos ami nudar ema nebe Nia fihir tuir nia laran luak; Nia nebe hala’o buat hotu tuir nia hakarak, ¹² atu ami bele hahi nia gloria, ami nebe tau ona ami nia esperansa iha Kristu. ¹³ Iha Nia mos mak Maromak bolu imi wainhira imi rona liafuan lialos nian, katak Evangeliu ita nia maksoin nian, hodi fiar Nia. ¹⁴ Imi simu ona sinal Espiritu Santu nian nebe Nia hakotu; Nia mak murak nebe hametin ona ita nia liman rohan atu ita bele manan ita nia maksoin, ba Nia gloria. ¹⁵ Tan ne’e, wainhira ha’u rona kona ba imi nia fiar iha Na’i Jesus, no kona ba imi nia domin ba santu sira hotu, ¹⁶ ha’u hanoin imi nafatin iha ha’u nia orasaun hodi fo agradese ba Maromak tamba imi. ¹⁷ Maromak, ita Na’i Jesus Kristu nian, Aman gloria nian, haraik ba imi espiritu matenek no hatene buat hotu nebe Nia fo sai ona nian, atu imi bele hatene Nia lo-los. ¹⁸ Maromak leno imi laran nia matan atu imi bele hare esperansa nebe Maromak bolu imi ba, ¹⁹ no mos rikusoi gloria nian nebe Nia hakotu ona nudar liman rohan ba santu sira, no kbiit wa’in nebe iha ita, fiarna’in sira. ²⁰ Kbiit ida ne’e halo Kristu moris hi’as housi mate, no halo Nia tur iha nia kuana iha lalehan, ²¹ aas liu liurai sira hotu, na’i ulun sira, kbiit na’in sira, ukun na’in sira hotu no naran seluk tan, la’os deit iha otas ne’e, maibe mos iha otas sira nebe atu mai. ²² Maromak tau buat hot-hotu iha nia ain okos, hodi halo Nia sai Kreda nia ulun nudar  buat hot-hotu nia ulun. ²³ Kreda ne’e mak Kristu nia isin lolon. Housi Kreda ne’e mak Kristu hetan nia kmanek tomak; no Kristu halo buat hot-hotu hetan  ida-ida nia kmanek.