2

Ho laran luak Maromak haraik maksoin

                ¹ Imi mate tiha ona tamba hahalok aat no sala, ² nebe imi halo wainhira imi moris hela tuir  mundu ne’e, hodi halo tuir ida nebe ukun nia, espiritu nebe book an iha ema ulun tos sira nia laran. ³ Uluk, ita hotu tama mos iha sira leet, hodi moris nudar ema laran foer, nebe ita nia hakarak aat no ita rasik nia hanoin aat mak ukun.; nune’e, tan ita an rasik mak ita mos, hanesan  mundu tomak, soi Maromak nia laran nakali. ⁴ Maibe Maromak hadomi ita teb-tebes. Nia hawain nia laran luak mai ita. ⁵ Maski ita mate tamba ita nia sala, Nia halo ita moris hi’as ho Kristu; housi grasa mak imi hetan maksoin; ⁶ hodi foti ita hamutuk ho Nia no fo fatin mai ita hamutuk ho Nia iha lalehan, iha Kristu Jesus.

                ⁷ Ne’e atu hatudu ba ema hotu iha otas nebe atu mai, housi nia laran diak mai ita iha Kristu Jesus, katak nia grasa wa’in teb-tebes. ⁸ Basa housi grasa mak ita hetan maksoin, housi fiar, la’os housi buat ruma nebe mai housi imi, maibe housi presente ida housi Maromak; ⁹ la’os housi imi nia hahalok ruma, atu nune’e ema ida la bele gaba an. ¹⁰ Ita mak Maromak nia hahalok kmanek, nebe Nia hakiak iha Kristu Jesus, atu ita bele moris nudar ema diak nudar Nia hakarak nanis houri uluk kedas.

Judeu no gentiu hadame ho Maromak no ho ida-ida

                ¹¹ Ne’e duni, keta haluha katak iha tempu neba imi sei gentiu hela tuir isin, no ema hanaran imi ema nebe la simu sirkunsisaun nebe halo iha isin; ¹² ne’e duni, imi la iha Kristu no la tama iha  uma-kain Israel nian, nudar malae nebe la halo parte iha moruk Maromak nia promessa nian, la iha esperansa no la iha Maromak iha mundu ne’e; ¹³ maibe ohin iha Kristu, imi nebe uluk dook teb-tebes, Kristu nia ran lori imi besik mai. ¹⁴ Nia mak ita nia dame; Nia halo povu rua ne’e sai ida deit; Nia  hatun tiha muru nebe haketak ita, hodi sobu iha Nia an rasik laran hirus malu nian; ¹⁵ Nia halo folin laek iha nia isin rasik ukunfuan nia haruka sira, atu halo iha nia an ema foun ida deit housi  uma-kain rua  ne’e, hodi nune’e harii dame iha sira leet. ¹⁶ Ho nia krus, Nia halo uma-kain rua ne’e hadame malu iha isin ida deit iha Maromak. Iha Nia an rasik, Nia oho tiha laran hirus malu nian. ¹⁷ Nia mai atu lori liafuan diak dame nian; dame ba imi nebe hela dook no dame ba sira nebe hela besik. ¹⁸ Housi Nia, ita rua hetan espiritu ida deit atu berani hakbesik ba Aman.

¹⁹ Ne’e duni, imi la’os tan malae eh ema la’o rai; imi rai na’in hanesan santu sira hotu, no imi emar iha Maromak nia uma laran. ²⁰ Imi halo parte uma boot ida: apostolu no profeta sira mak uma ne’e nia hun, no Kristu Jesus mak nia fatuk inan. ²¹ Fatuk ai ida-ida tuir Nia, buat hot-hotu sa’e ba uma lulik boot ida ba ita Na’i. ²² Imi mos iha Nia sa’e ba dau-daun ba uma ida nebe Maromak horik ba, iha nia Espiritu.