3

Paulo, misteriu ne’e nia atan

                ¹ Tan ne’e, ha’u, Paulo. ema dadur tiha tamba imi gentiu sira. ² Imi rona tiha ona karik kona ba knaar grasa nian nebe Maromak saran mai ha’u ba imi nia diak; ³ Nia rasik fo hatene mai ha’u misteriu nebe ha’u foin haktuir ne’e. ⁴ Imi lee tiha ona karik ha’u nia liafuan, imi sei hatene katak ha’u hare naruk liu iha Kristu nia misteriu. ⁵ Misteriu ne’e nebe ohin Espiritu fo sai ba apostolu no profeta sira, misteriu ne’e ema iha otas uluk nian la hatene liu. ⁶ Ne’e katak ohin, gentiu sira halo parte ona iha liman rohan ida deit; gentiu sira isin lolon ida deit nia liman-ain; sira simu promessa ida deit, iha Kristu Jesus, housi evangeliu.⁷ Maromak foti ha’u atu sai evangeliu ne’e nia atan, housi presente grasa nian housi Nia, nebe fo ida ne’e mai ha’u ho nia rasik nia kbiit. ⁸ Maromak saran grasa kmanek ne’e mai ha’u, nebe kiik liu santu sira hotu, la’os deit atu haklaken ba gentiu sira Kristu nia  rikusoi wa’in, ⁹ maibe mos atu fo sai oin sa bele fahe ba ema misteriu ida ne’e. Hori otas wa’in, misteriu ne’e subar hela iha Maromak, nebe hakiak buat hotu-hotu. Tan sa? ¹⁰ Atu kbiit na’in no ukun na’in sira iha lalehan bele hatene ohin housi Kreda Maromak nia matenek wa’in teb-tebes, ¹¹ lo-los tamba hakarak nebe iha ona Nia houri otas iha Kristu Jesus, ita Na’i. ¹² Tan ne’e mak ami berani atu hakbesik ba Maromak ho laran metin, housi ami nia fiar iha Nia. ¹³ Ne’e duni, ha’u husu imi, keta laran la metin tamba deit susar nebe ha’u hetan tamba imi; ha’u nia susar mak imi nia kmanek.

 Paulo nia hamulak

                ¹⁴ Ne’e duni, ha’u hakneak iha Aman nia oin. ¹⁵ Housi Nia, familia ida-ida iha lalehan eh iha rai simu nia naran. ¹⁶ housi nia gloria kmanek liu, Nia haraik ba imi nia kbiit housi nia espiritu, atu imi nia laran bele sai maka’as liu tan, ¹⁷ atu Kristu bele moris iha imi nia fuan housi fiar, no nune’e, ho imi nia abut no hun iha domin, ¹⁸ imi bele hetan kbiit hamutuk ho santu sira hotu atu hatene luan no naruk, aas no klean, ¹⁹ to’o wainhira imi hatene ona Kristu nia domin, nebe aas liu matenek hotu, imi sei sai nakonu ho Maromak nia kmanek tomak.

                ²⁰ Gloria ba Nia! Nia kbiit nebe book an iha ita nia laran, halo barak liu fali buat nebe ita bele husu ka hanoin; ²¹ gloria ba Nia houri otas ba otas iha Kreda no iha Kristu Jesus tinan ba tinan. Amen.