4

Paulo haka’as sarani sira atu sai laran ida deit

                ¹ Ne’e duni, ha’u ema dadur ida iha Na’i, husu imi atu moris lo-los tuir imi nia vokasaun. ² Tulun malu ho domin, la hodi hanoin imi an rasik, maibe ho laran kmaus no pasiensia. ³ Halo buat hot-hotu atu imi bele sai laran ida deit iha Espiritu, housi dame nebe halibur imi hamutuk. ⁴ Iha isin ida deit, espiritu ida deit, nudar Maromak bolu imi hotu iha esperansa ida deit, wainhira Nia bolu imi. ⁵ Iha Na’i ida deit, fiar ida deit, baptismu ida deit, ⁶ no Maromak ida deit. Nia mak ema hot-hotu nia Aman; Nia ukun ita hot-hotu, Nia book an housi ita hot-hotu no Nia  iha ita hot-hotu.

                ⁷ Maibe ita ida-ida simu grasa nia kmanek oi-oin nudar Kristu hakarak fo. ⁸ Ema dehan: “Wainhira Nia sa’e ba leten aas, nia lori ema dadur barak;  Nia fahe kmanek oi-oin ba ema sira.”  ⁹ ”Sa’e ba leten aas” ne’e katak sa? La’os uluk knanain Nia tun ba rai okos? ¹⁰ Ida nebe tun mak Nia mos nebe sa’e aas liu fali lalehan tomak atu halo nia nakonu. ¹¹ Nia foti balun nudar apostolu, balun profeta, balun tan evangelista no seluk tan bibi atan  no mestre, ¹² ba santu sira hotu nia diak lo-los, ba serbisu ministeriu nian no atu harii Kristu nia isin lolon, ¹³ to’o tempu nebe ita hotu hetan laran ida deit iha fiar no iha matenek kona ba Maromak nia Oan Mane, nudar ema boot lo-los ona, hanesan ho Kristu rasik nia kmanek hotu.

                ¹⁴ Nune’e ita sei sai, la’os tan hanesan labarik deit, eh ema ho laran namlele, ema nebe anin doutrina oi-oin nian hu’u ba hu’u mai, nebe ema lohidor sira bele book ho sira nia hahalok no matenek aat. ¹⁵ Ita moris karik tan lialos no domin, ita sei sai boot iha buat hotu iha Kristu, nebe Ulun. ¹⁶ Nia mak halo isin lolon tomak sai boot ba dau-daun to’o nia hetan nia ilas lo-los iha domin; ba Nia mak liman ain ida-ida serbisu hodi hametin an hamutuk.

Moris iha Kristu

                ¹⁷ Tan ne’e, ha’u husu barak hodi Na’i nia naran atu imi la bele moris tan hanesan gentiu sira, hodi hanoin buat oi-oin iha sira nia laran; ¹⁸ sira nia hanoin iha nakukun laran; sira dook housi moris iha Maromak, tamba sira beik; sira matan delek iha fuan; ¹⁹ tamba sira la iha esperansa, sira saran tiha an ba moris nebe la hatene moe, no ba hahalok foer oi-oin ho laran karakten nian. ²⁰ Imi la hatene Kristu hanesan ne’e. ²¹ Imi rona ona kona ba Nia no ema hanorin ona imi tuir lialos kona ba Nia. ²² Husik tiha imi nia moris tuan nian, nebe aat tamba halo tuir hakarak aat sira. ²³ Hafoun imi nia laran ho espiritu ²⁴ no simu tiha ema foun, nebe moris mai tuir Maromak nia ilas iha justisa no santidade lialos nian.

                ²⁵ Tan ne’e, husik tiha lia bosok; ema ida-ida koalia lo-los ba malu, basa ema ida-ida liman ain ba malu. ²⁶ Imi hirus karik, keta halo sala; keta husik loron monu ba imi nia laran nakali. ²⁷ Keta fo fatin ba diabu. ²⁸ Ema nebe uluk na’ok, lalika na’ok tan, maibe buka serbisu ho liman atu bele hetan buat ruma atu fo ba ema nebe iha susar laran. ²⁹ Keta husik liafuan aat sai housi imi nia ibun. Koalia deit liafuan nebe diak atu hametin imi nia maluk nia fiar, atu nia bele halo diak ruma ba sira nebe rona nia. ³⁰ Keta halo Maromak nia Espiritu Santu laran susar; iha Nia mak imi simu sinal ba loron maksoin nian. ³¹ Hadook tiha housi imi leet laran moras tomak, laran hirus, laran nakali, lia aat no lia hasouru Maromak no mos laran dodok. ³² Maibe imi laran diak ba malu, nudar Maromak haraik tiha ba imi iha Kristu.