5

Banati tuir Kristu ba

                ¹ Imi banati tuir Maromak, nudar nia oan doben sira. ² La’o iha domin, hanesan Kristu hanorin imi, hodi saran nia An nudar buat karan ida mai ita; sakrifisiu nebe morin liu ba Maromak. ³ Hanesan ema santu sira, keta husik ema ida iha imi leet temi sala foer eh buat foer tomak, eh laran karakten nian. ⁴ Hadook tiha lia foer, beik eh halimar nar-naran deit nian; sira ne’e hotu folin la iha. Maibe imi fo agradese barak liu tan. ⁵ Hatene di-diak ida ne’e: ema nebe halo sala foer, ema laran foer eh buka resin rikusoi, sira ne’e hotu hanesan adora lulik sira, ema sira ne’e sei la hetan liman rohan iha Kristu no Maromak nia reinu. ⁶ Keta husik ema lohi imi ho liafuan mamuk sira tan liafuan hirak ne’e mak halo Maromak nia laran nakali tun ba oan sira nebe hasouru Nia. ⁷ Ne’e duni. imi keta la’o hamutuk ho sira ne’e.

Imi naroman nia oan

                ⁸ Uluk, imi iha nakukun laran, maibe ohin imi naroman ona iha Na’i; sai tiha naroman nia oan sira; ⁹ naroman nia fuan sira bele hare iha moris diak, moris lo-los no lialos. ¹⁰ Buka hatene buat nebe Na’i hakarak housi imi, ¹¹ hodi hadook an housi hahalok folin laek nakukun nian. Halakon sira ne’e hotu. ¹² Ema moe atu koalia kona ba hahalok sira nebe ema sira ne’e halo sub-subar deit; ¹³ maibe wainhira ema leno buat beik sira ne’e, sira ne’e la subar ona, no buat nebe la subar hetan naroman. ¹⁴ Tan ne’e, ema dehan: “O nebe dukur hela, hader tiha no hamriik housi matebian sira leet, no Kristu sei leno o.” ¹⁵ Ne’e duni, hare oin sa imi moris. Keta moris hanesan ema beik, maibe hanesan ema matenek. ¹⁶ Usa buat hotu nebe diak, basa loron sira ne’e aat. ¹⁷ Keta beik, maibe buka buat nebe Maromak hakarak imi halo.

                ¹⁸ Keta lanu ho tua, nebe halo aat deit imi; sai hakonu imi an ho Espiritu. ¹⁹ Koalia ba malu ho liafuan salmu nian, ho knananuk no dadolin santu nian, hodi hananu knananuk no salmu ba Na’i, hodi hahi Nia iha imi nia laran. ²⁰ Iha Na’i Jesus Kristu nia naran, fo agradese ba Aman Maromak tamba buat hotu. ²¹ Haraik an ba malu ba tamba imi hamtauk Kristu.

Kaben na’in sira

                ²² Feto sira, halo tuir imi nia laen nia hakarak, hanesan imi halo tuir Na’i.,  ²³ basa laen ida ukun nia feen hanesan Kristu ukun Kreda no Kristu mak Kreda nia Ukun no maksoin ba nia isin lolon. ²⁴ Ne’e duni, feto sira sei husik sira nia laen ukun sira nudar Kreda husik Kristu ukun nia. ²⁵ Mane sira, hadomi imi nia kaben nudar Kristu hadomi Kreda no saran nia moris tamba nia. ²⁶ Nia halo ida ne’e atu, hamos tiha Kreda iha be, Nia bele saran nia ba Maromak housi nia liafuan, ²⁷ nune’e Nia bele simu Kreda ho nia kmanek tomak mo-mos no sala laek, la iha buat foer eh aat, eh buat seluk tan nebe halo nia la furak. ²⁸ Mane sira sei hadomi sira nia kaben hanesan sira hadomi sira rasik nia isin lolon. Mane nebe hadomi nia kaben hadomi nia an rasik. ²⁹ Ema ida la hirus nia isin lolon, maibe nia fo han no tau matan ba nia nudar Kristu tau matan ba Kreda. ³⁰ Ita hotu Kristu nia isin lolon nia liman ain. ³¹ “Tan ne’e, mane husik nia aman no inan hodi moris hamutuk ho nia feen, no sira na’in rua sai isin ida deit.” ³² Ne’e misteriu boot duni, maibe ha’u dehan ne’e kona ba Kristu ho nia Kreda. ³³ Kona ba sira seluk, mane ida-ida sei hadomi nia kaben; hadomi nia hanesan nia an rasik, no feto mos sei hamtauk nia laen.