6

Aman inan sira

                ¹ Oan sira,  halo tuir imi nia aman inan sira nia hakarak. Ne’e mak buat nebe los. ² “Hamtauk o nia aman inan” mak ukunfuan uluk liu nebe iha promessa, katak ³ “atu o bele haksolok, no o bele moris naruk iha rai.”

                ⁴ Aman inan sira, keta halo imi nia oan sira laran susar. Maibe hanorin sira disiplina no Na’i nia doutrina lo-los.

Atan no na’i sira

                ⁵ Atan sira, halo tuir imi nia na’i nia hakarak, ho hamtauk no laran tomak; halo hot-hotu ho laran los, hanesan imi serbi Kristu rasik. ⁶ Halo nune’e, la’os deit wainhira sira hare imi, tamba imi hakarak monu los ba sira laran, maibe ho laran tomak imi halo Maromak nia hakarak, nudar Kristu nia atan sira. ⁷ Halo imi nia serbisu nudar atan ho laran haksolok, hanesan imi serbi Na’i, la’os ema deit. ⁸ Hanoin katak Maromak sei selu ema ida-ida nia kolen, nia atan ka la’os atan, tuir hahalok diak nebe nia halo.

                ⁹ Na’i sira, halo nune’e mos ho imi nia atan sira. Keta halo sira tauk. Hanoin ba katak imi no imi nia atan sira iha Na’i ida deit iha lalehan, nebe sei tesi lia ba ema hot-hotu ho sukat ida deit. ¹⁰ Ikus mai, hari imi nia kbiit iha moris hamutuk no Na’i, housi nia kbiit nia tulun. ¹¹ Tau hatais funu nian nebe Maromak haraik tiha ba imi, atu imi bele ba hasouru diabu nia babeur aat hotu. ¹² Basa ita la halo funu hasouru ema deit, maibe ho babeur diabu nian nebe ukun otas ne’e. ¹³ Ne’e duni, tau Maromak nia hatais funu nian ohin kedas! Nune’e, wainhira loron aat sei mosu mai, imi bele ba hasouru funu balun, no wainhira imi halo tiha funu to’o rohan, imi sei manan. ¹⁴ Matan moris ba, ho lialos nudar imi nia futu kabun, ho moris los atu tahan imi nia hirus matan;  ¹⁵ ho imi nia laran kmaus atu haklaken liafuan diak dame nian nudar imi nia sapatu. ¹⁶ Lori fiar nudar imi nia eskudu ba nafatin, basa ho nia, imi bele ba hasouru rama ho ahi nebe mai housi diabu. ¹⁷ Simu maksoin atu taka imi nia ulun no Maromak futar lia nudar surik nebe Espiritu fo ba imi. ¹⁸ Halo buat hotu ne’e hodi harohan, no husu Maromak nia tulun. Hamulak nafatin ba, nudar Espiritu lori imi. Tan ne’e, matan moris ba, hamulak ba Maromak nia povu tomak. ¹⁹ Hamulak mos ba ha’u nia diak, atu Maromak haraik mai ha’u lia menon ida wainhira ha’u atu koalia ona, atu ha’u bele koalia ho aten berani hodi fo sai buat hotu nebe subar hela iha evangeliu. ²⁰ Tan evangeliu ne’e ha’u sai manu-ain ida ona, maski ohin ha’u iha dadur laran. Imi hamulak ba atu ha’u hetan aten berani wainhira ha’u koalia kona ba Evangeliu, nudar ha’u iha knaar atu koalia.

Kumprimentu ikus

                ²¹ Tiquico, ha’u nia alin doben no maluk serbisu na’in diak iha Na’i, sei fo hatene ba imi buat hot-hotu kona ba ha’u, atu imi bele hatene oin sa ha’u ba oin. ²² Tan ne’e mak ha’u haruka nia ba imi, atu fo hatene ba imi oin sa ami hotu iha ne’e la’o ba oin, no atu fo ksolok ba imi.

                ²³ Aman Maromak no Na’i Jesus Kristu haraik ba imi hotu dame no domin ho fiar. ²⁴ Maromak nia grasa hela ho sira hotu nebe hadomi ita Na’i Jesus Kristu ho domin nebe la mate.