FILIPE
1
Kumprimentu
1 Housi
Paulo ho Timoteo, Kristu Jesus nia atan, ba sarani sira iha rai Filipe, hamutuk
ho sira nia bispu no diakonu sira: ba imi hot-hotu iha Kristu Jesus.
2 Grasa
no dame ba imi housi Maromak, ita Aman, no housi Kristu Jesus, ita Na’i.
3 Ha’u
fo agradese ba ha’u nia Maromak wainhira ha’u hanoin imi; 4
no wainhira ha’u resa tamba imi, ha’u resa ho ksolok; 5
ha’u la bele haluha buat hotu nebe imi halo no fahe hamutuk ho ha’u
wainhira ita serbisu atu haklaken Evangeliu; hori loron uluk to’o ohin. 6
Tamba Maromak mak hahu buat diak ida ne’e iha imi, ha’u hatene lo-los
katak Nia sei halo nia lo-los to’o Kristu Jesus nia loron.
7 Ne’e
mak ha’u nia esperansa kona ba imi, basa ha’u lori imi iha ha’u nia fuan;
wainhira ha’u iha dadur laran ka buka atu tahan no hametin Evangeliu, imi
hamutuk ho ha’u no halo parte iha grasa nebe ha’u simu.
8 Maromak
hatene katak ha’u hadomi imi teb-tebes ho Kristu Jesus rasik nia domin. 9
Iha ha’u nia hamulak, ha’u husu atu imi nia domin lori imi loron loron ba
matenek boot liu, hodi hatene diak liu tan, 10 atu
nune’e, imi bele hare momos buat hot-hotu nebe diak liu. Nune’e imi bele sai
laran mos liu, hodi to’o ba Kristu nia loron, nudar ema sala laek, 11
nakonu ho santidade imi fuan, nebe mosu mai housi Kristu Jesus, atu ema
hahi no fo gloria ba Maromak.
Kristu mak ha’u nia moris
12 Ha’u
hakarak katak imi hatene ne’e, maun alin sira, katak buat nebe mosu mai ha’u
tulun duni atu habelar Evangeliu. 13 Lo-los, funu
na’in sira nebe iha pretoriu laran no mos sira nebe iha uma boot nia liur
hatene katak ha’u iha dadur laran tamba Kristu. 14 Liu
ida ne’e, ha’u nia situasaun nudar ema dadur ida fo aten berani ba maun alin sira barak atu haklaken Maromak
futar lia iha ema sira nia oin, la ta’uk.
15 Los
duni, balun haklaken Kristu ho laran moras, maibe balun haklaken Kristu ho
laran los. 16 Sira ne’e haklaken tamba domin; sira
hatene katak ha’u iha ne’e atu tahan Evangeliu. 17 Maibe,
sira seluk haklaken Evangeliu atu ba hasouru ha’u. Sira haklaken Evangeliu ho
laran foer; sira hanoin katak sira halo ha’u hetan todan liu tan iha dadur
laran. 18 Maibe mai ha’u, sira haklaken ho laran
mos ka laran foer, ne’e la halo buat ida: sira haklaken Kristu, no tan ne’e
ha’u haksolok; ha’u laran la susar ida.
19 Ha’u
hatene katak buat sira ne’e hotu sei sai grasa mai ha’u, tamba imi nia hamulak
no tamba tulun nebe Kristu nia espiritu fo. 20 Ha’u
hein, hodi hatene lo-los katak ha’u sei la mo’e. Ha’u hatene nafatin hanesan
iha tempu uluk nian katak, ha’u moris
ka ha’u mate, Kristu sei hetan naran boot housi ha’u.
21 Mai
ha’u, moris katak Kristu; mate mos folin boot mai ha’u. 22
Maibe ha’u moris nafatin karik, ha’u sei bele serbisu ho fuan barak liu
tan. 23 Ne’e duni, ha’u hanoin rua: ha’u hakarak
mana-manas atu husik ona moris ne’e hodi ba ona hamutuk ho Kristu; ida ne’e
diak liu tan; 24 maibe diak liu ba imi katak ha’u
hela lai iha moris ne’e. 25 Tamba ha’u hatene mos
katak ha’u sei hela hamutuk ho imi, atu imi bele ba oin hodi hetan ksolok iha
fiar. 26 Ha’u sei fila fali duni ba imi dala ida
tan; ha’u sei halo imi gaba an tamba imi Kristu ninian.
Laran metin iha fiar
27 Ne’e
duni, halos imi nia moris tan Kristu nia Evangeliu, atu ha’u iha imi leet ka la
iha imi leet, ha’u sei rona katak imi laran metin iha espiritu ida deit, hodi
buka tahan imi nia fiar iha Evangeliu ho laran ida deit. 28
Keta ta’uk sira nebe hasouru imi; imi nia laran ida deit hatudu ona katak
sira sei lakon, no imi sei manan. Buat hotu ne’e mai housi Maromak, 29
basa housi Kristu, imi simu grasa, la’os deit atu fiar iha Kristu, maibe
mos atu terus tamba Nia. 30 Ohin, imi halo parte
iha funu ida deit, funu nebe imi hare ha’u halo ona no sei halo dau-daun.
|