2

Jesus nia haraik an

                ¹ Imi nia moris iha Kristu halo imi maka’as, no nia domin fo ksolok ba imi. Imi laran ida deit ho Espiritu, no imi laran kmaus no laran sadia ba malu. ² Ha’u husu imi atu halo ha’u nia ksolok lo-los hodi hanoin buat  ida deit, hadomi malu, no sai laran no neon ida deit. ³ Keta halo buat ida hodi hanoin deit imi an nia diak, eh hodi hakarak hetan naran boot, maibe haraik an ba malu, hodi hanoin katak ema seluk sira diak liu fali imi. ⁴ No keta buka imi rasik nia diak, maibe buka uluk ema seluk nian. ⁵ Buat nebe ema hare iha Kristu, halo ema hare mos iha imi: ⁶ Maski nia Maromak lo-los, Nia la hanoin nia an nudar Maromak, maibe nia haraik an, ⁷ hodi sai atan ida no halo an nudar ema; ema sira hare duni Nia nudar ema. ⁸ Nia haraik An hodi halo tuir to’o mate, mate iha krus. ⁹ Tan ne’e, Maromak foti Nia hodi fo ba Nia naran ida nebe boot liu naran sira hotu, ¹⁰ atu nune’e, ba Jesus nia naran, aintur sira hotu hakne’ak, iha lalehan, iha rai, iha mate sira leet, ¹¹ no nanal tomak haklaken katak Kristu Jesus mak Na’i,  ba Aman Maromak nia gloria.

                ¹² Ne’e duni, maun alin sira, nudar imi hotu halo tuir nafatin ha’u nia liafuan wainhira ha’u sei hela ho imi, ohin, wainhira ha’u dook housi imi, haka’as an liu tan atu buka imi nia maksoin ho laran tauk no laran nakdedar. ¹³ Maromak mak halo imi, laos deit  atu hakarak, maibe mos atu halo duni buat nebe monu los ba nia laran. ¹⁴ Halo buat hotu, la hodi ibun botubotu, ¹⁵ atu nudar ema sala laek no la iha buat aat ruma, imi bele sai Maromak nia oan lo-los iha ema laran aat no maksalak sira leet. Imi mak naroman iha sira leet, hanesan fitun sira iha raiklaran, ¹⁶ hodi laran metin ba liafuan moris nian. Ha’u sei haksolok hodi gaba an kona ba imi iha Kristu nia loron, wainhira ha’u sei hare katak ha’u nia haka’as an no serbisu la sai leet deit. ¹⁷ Ha’u fakar ha’u nia ran karik hamutuk ho  imi nia fiar nia buat karan no serbisu, ha’u sei haksolok hodi halo parte imi nia ksolok, ¹⁸ no imi mos sei haksolok no halo parte ha’u nia ksolok.

Timoteo no Epafrodito

                ¹⁹ Na’i Jesus halo ha’u hein katak la kleur ha’u bele haruka Timoteo ba imi, no simu liafuan ruma kona ba imi. Ho ida ne’e, ha’u sei hetan laran ksolok. ²⁰ Basa ha’u la iha ema seluk; nia deit, nebe hanoin imi teb-tebes. ²¹ Ema barak hanoin deit sira rasik nia diak; sira la buka Kristu Jesus. ²² Maibe Timoteo hatudu ona nia an, nudar imi hatene. Nudar oan mane ida iha nia aman nia sorin, nia hela ho ha’u iha ha’u nia serbisu ba evangeliu. ²³ Tan ne’e, ha’u hein katak ha’u bele haruka nia ba imi wainhira ha’u hare lo-los oin sa buat hotu mosu mai ha’u. ²⁴ No Na’i halo ha’u hanoin katak ha’u rasik bele fila fali ba imi.

                ²⁵ Ha’u hanoin katak ha’u iha knaar atu haruka fali ba imi Epafrodito; nia serbisu no halo funu hamutuk ho ha’u. Imi haruka nia mai ha’u atu tulun ha’u wainhira ha’u kuran nia liu. ²⁶ Lo-los, nia hanoin imi teb-tebes. Nia laran taridu basa imi rona katak nia moras. ²⁷ Tebes, nia moras duni, besik atu mate, maibe Maromak sadia nia no ha’u, nune’e hado’ok ami housi susar boot. ²⁸ Tan ne’e, ha’u hakarak teb-tebes atu haruka nia fali ba imi, atu wainhira imi hare nia, imi sei haksolok no ha’u bele hakmatek. ²⁹ Ne’e duni, simu nia ho ksolok, hanesan lo-los iha Na’i. Hare didiak ema sira hanesan nia, ³⁰ nebe, tamba Kristu nia serbisu, hakbesik mate, laran hadia an atu lakon nia moris atu serbi ha’u iha imi nia fatin, wainhira imi la bele serbi ha’u.